Montegrande (Teverga)

Textos:

-Lleenda de la florina namorada.

-Textos dialectales.

-El cantar de la texera.

-La "Virxen de Llungueru"

-Les gafeces.

-¡Adiós mundu!

Lleenda de la florina namorada

Nel mediu  d´una roza, 

peles cotolles cudiada,

ximielgábase gociosa

una florina espigada.

Llucía nel cotollal

cual princesina encantiada,

fartuquina  d´antroxar

al sintise  acoricada 

pel vientu que, con veyures,

dexábala  empapiellada.

Enes nochis d´asonsañu

dulzayu un roidín l´añaba,

meciéndola en dolces cancios

que la soledá esnidiaba.

Acubixaben sos suaños

les gotes que-y algamaba,

cual llagrimines brilloses,

el rocíu, quien-y moyaba 

con tenrura les fueyines

mientres illa apigazaba.

Con tantes agarbaúres

el pimpoyín se cimblaba

d´un modu mui llasparderu

que munchu  la xaraniaba.

Mecíense nilla dolzures

y arrumes qu´esmigayaba

apinada de bayures

qu´amorosiega llancaba,

amogosando en so almina

lo que tantu deseyaba.

Xuncía a istos patacuellos

les que l´alba-y regalaba
cuandu al albanciar el díe
dalgún rayín allegaba

a besala sosiegosu,

tan selín, que si allendaba

cualesquier soplu del vientu,

con esi soplu, esñalaba.

Nun mundiu de sortilexos

la rosiquina folgaba.

Per un día un abeyón

que peles brañes llibaba

el dolzor  de les florines

que pel camín atopaba,

averóse aquel verxel

per ver si nelli papiaba

manxar mui apetecíu,

dau qu´allí s´amorgonaba

con golorín perfumosu

y un collor que gayolaba.

Averóse al par la flor

mientres atentu oservaba

aquel peacín de cielu

y el llimbu que la rodiaba, 

aforquetáu nel cantu

que ´l  llugar enguedeyaba.

Nun la llibó, mas besóla,

y ca vez  qu´un  chuchu-y daba,

la florina, con rescamplu,

el so  tallu enderiezaba.

Ñervosu, como taramiellu,

por si ´l so sintíu suañaba,

foi  saborgando d´a pocu

lo que ´l destín-y ufiertaba,

rellambiéndose dafechu

col gozu qu´acostinaba.

Ronceru l´atapecer

despacín  s´enximielgaba

desfaciendo so zapera 

cuando l´ecu reviciaba.

Nel ocasu de la tardi,

mientres el raitán folgaba

y solamente ´l curuxu

la paz na tierra alteriaba,

foise l´abeyón contentu

con rungar que barruntaba

l´allegría y los remelgos

que ´l so cuerpu allabanaba.

Fexo un mantu de silenciu

la nochi qu´emprencipiaba.

Namoróse l´abeyón

de la florina encarnada,

y en mañanes soleyeres,

col lloviu o la xelada,

diba ´l galán  presurosu

a festexar a so amada

faciendo esquiebres nel vientu,

cando dalguna tonada

o mosquiando como un xatu

al llau de la galantiada.

Aquesti divertimientu

de subida y  abaxada,

repetíalu, ensin fuelgu,

con vueltes a la rodiada

y el molondru allevantáu 

sin perde-y la regüeyada,

faciéndolu tar na creyencia 

qu´illa taba falagada.

Tou yera lluz y collor 

naquel  sitiu d´antroxada.

Arrumes a fartucar.

Armoníes d´ensuañada.

Gorxaben los xilguerinos

na ramina floriada,

y el cuquiellu  parlancheru

cunta dis  de casoriada 

pa que la probe mocina

nun se quede atristayada.

Fueren corriendo los dís.

L´abeyón  entamaba

cantiquinos que, dafechu,

al so amorín gasayaba,

mientres qu´aquesta, melosa, 

cuantes más la festexaba

más calorín sintía dientru

y en sos fueyes resaltaba,

encendiéndo-y el collor

qu´al da-y la lluz, rellumaba.

Les manes d´un segador

y un rozón, na albanciada, 

cortaren el cotollal,

tamién la flor foi segada.

Caeren al suelu sos fueyes,

el tronquín  quedó ensin nada,

semeyándose  al tarucu

d´una panoya  esbillada.

Musties quedaren les yerbes

sin la florina adorada.

Cotolla enriba  cotolla

ensin apuru axuntaba

el segador y, contentu,

un reciu cantu  entonaba, 

que l´ecu apuxaba lexos

y nes brañes reblincaba 

desamurmiando  al silenciu

que tranquilu s´esponxaba

entre filvanes d´oru

cuandu l´alba s´asomaba.

Pocoñín a pocoñín

la roza foi    despexada;

el rozu cargáu nel carru,

faciendo bona  pinada.

Ximió la exa  del carru,

por nun tar enxabonada,

y alexóse   ´l segador

manexando la guiyada.

La florina sol morgazu

quedábase  estrapallada.

Esmorguiosu l´abeyón

allegó   cuandu clariaba,

rezañando bien de lloñii 

lo munchu que refalfiaba.

Plasmáu, quedóse oservando

lo que nel sitiu alcontraba,

sintiendo  dientro so cuerpu,

dalgo que lu esfargataba,

faciendo trices so gozu

y ximíu lo que rungaba.

Pónxose  ´l cielu  paxizu.

Tratayu ´l  sol  s´alexaba 

sin fuerces pa escalecer 

el duelu que lu axelaba.

Afogó so canciu ´l tordu

que la campera allegraba.

El grillu nun llancia ´l  vientu

el xiblíu qu´espoxigaba,

mosquiando ´l probín tristayu

pel llugar qu´espatuxaba.

La brisina acoyedora

ya ´l so pasu aforfugaba,

mientres seliquín l´ecu

o sonsañu acuruxaba.

Fasta ´l ronceru rapiegu

nel cuévanu se cincaba

sin ánimu pal rebuscu

que la so andorga-y llenaba.

Pónxose amargu ´l silenciu

tan profundu, qu´aparraba.

Les fueyines de la flor

el vientu les amontiaba

d´una nuna y, dolcemente,

xunta la fonte dexaba.

La riega diba p´abaxu

col so son  que murmuriaba,

y pel alma la florina

tienres  plegaries rezaba.

El mofu atapó les fueyes

y la fontana lloraba.

Míseru ta ´l cotollal

qu´arrodió  tala llacuada.

Ya nun s´enximielga ´l vientu

la rosina cubixada.

Cunten les xanes parleres

falando  entre la enramada

qu´en nochis  de lluna enllena,

xunta la fonte platiada,

óyinse seles sollutos

d´una flor enamorada.

Cuentos pa neños. Poesíes. Enrique Pérez Álvarez.-

Textos dialectales

In tíu Duloru  foi pa ´Strimadura a facer madeira cun a sua  cuadricha, ya in Castañor d´Ibor ricomindóulli a un homi  d´aquel llugar que si quiría  búa madeira di carbachu  pa facer custiellas pas cestas, que si fora a Astierna, ya  que priguntara  eilli  pur a sua muchier qui si chamaba  Manula Gavela. Il bon siñor imprindíu il viax ya al chigar a Astierna  priguntóu  pour a tía Manula.  Forum hamalla a sua casa, ya baxóu  anquéi Picia, ya dixu, “¡Aha, tíu! ¿Usté  cuñicirá al mióu Manulu, quiciabis?” Ya esti homi  cuntistóu.  “Nó, you  a quen cuñozu ya a Manuel Gavela”. Ya intoncias cuntistóu a muchier, “¡Ési, ési, ési! ¡Ési  mismu ía!”

Josehg A. Fernández. (De la obra El habla de Sirterna)

In cierta oucasión chiganum Jusé di Dutín  ya Manulu Ligeru a ua pousada di Cacabiellus.  Discarganum  us machus  dus fardus  di cubirtoris cun qu´iban cargáus, mitinum  us machus na corti, puxínunllis il piensu, ya dispuois  priguntánunlli a pousadeira  qui llis pudía  facer di cinar Cunstistóullis qui si  quirían uas sopas di achu, ya dous  huovus cun patacas tustadas ditrás. Ellus cuntistanun qui si, ya sintánunsi al par dil llumi. Ya intoncias a pousadeira priguntóullis que cúmu quirian michor as sopas, si cun achu machacáu ou ispurriáu, ya ellus  intru us dous dixinun”.  “¡Hué! pus cumu ya sabemus  cumu ía machacáu, pónganulu usté ispirriáu”, hasta qui vinun  qu´a muchier mitía us dentis di achu na boca, mazcábalus ya siguidamenti iscupíalus subri la palicha das sopas. Ya a ellus  diullis noxu ya dixinun  que las cumira ella, ya cambianun a cena ya púxullis un gallón, qui taba más duru qu´as penas di Carubiu. 

Josehg A. Fernández. (De la obra El habla de Sirterna).-

El cantar de la Texera.

Mui ilustre siñorín,

si me quier dexar la venia 

pa falar unes migayes

al estilo de un civiella;

cura párracu de Santa

Maruxina Magdalena,

que non cabe na sotana 

con el gocio que lo afuega;

mayordomos arrogantes 

con la bolsa bien repleta,

que non saben qué facer 

si non facen obra güena…..

y cofrades mui amados

de la villa y de l´aldea,

qu´espetasteis cuando yo

la cuyar e na  escudiella…

Escuchaime, si voz plaz,

el cantar de la Texera,

que lo canta muncho bien 

la bandita Madalena.

¡Ay Texera! ¡Texerina

de mis ansies! En concencia,

non ye bon avilesín 

quian de tigo  s´escaezca.

Soilo yo desde magar 

el mió espiritu navega

per enriba los Piqueros,

L. Arabuya y la Grandiella,

porque asina ye preciso

que lo diga  quian lo sepia 

como yo, qu´ en to corriente

remoyaba la pelleya,

cuando yera yo más home

y la ropa más pequeña.

Regatín de miós amores,

que asomeyes una trenza 

de cristales, en qu´el sol

de continu rellumera;

que t´encueyes o t´espurres,

al blincar de piedra en piedra, 

de la presa pa la ñora

del molín de Ceruyeda

y de todos los demás 

que maquilen la molienda

con el agua cristalina

e to probe cañaleta.

Regatuelo rumoroso

del oasis de la tierra

más galana, más florida, 

d´entre todes la más bella;

que t´esmuces selemente

por el fondo de la vega

entre xuncos y  espadañes 

que te facen reverencia;

si me quiés como te quiero,

p´ayudame n´esta endecha,

has echame la gabita,

con que apurra, tan siquiera, 

una sola teyiquina

pal reteyo de la fiesta.

Mui ilustre señorín 

si me quier dexar  la venia 

pa falar unes migayes

al estilo de un civiella;

Cura párroco de Santa 

Marixina Madalena,

que non cabe na sotana

con el gocio que lo afuega;

Mayordomos arrogantes

co la bolsa bien repleta, 

que non saben qué facer

si non facen obra güena;

y cofrades mui amados 

de la villa y de l´aldea, 

qu´espetasteis cuando yo 

la cuyar e na escudiella…..

¿Non ye cierto qu´el regato,

regatín de la Texera,

tará lloco de contento

con el rumbo de la fiesta?

¿Non ye cierto, non ye claro 

como el sol que rellumera

que vertió el pedricador

tonelades de alocuencia 

n´alabanza del misterio

de la noche de la cena, 

que da más en qué pensar

cuando más en él se piensa?

¿Non ye cierto l´ornamiento

del altar y de la ilesia, 

convertíos n´escues dioro

de los pies a la cabeza?

¿Non ye cierto que la xinta,

por entero seculenta, 

a les bodes de Camacho

non yos debe ni una perra?

¿Ye lo cierto? ¿Ye verdá?

Pos oyeime con pacencia 

que me falta por decir

lo que lleva la palmeta.

Camarades de mi alma, 

si yo fos un gran poeta, 

de la grande procisión 

que sé yo  que vos dixera.

Vila yo cuando al salir

pe la puerta de la ilesia,

tab´allí Avilés entero

pa facei la reverencia,

Vi pasar el Arca Santa,

maxestática, suprema,

col Viril e na Custodia,

filigrana que hai que vela.

Vi que cuatro capellanes,

la portaben con fachenda,

dándoi guardia cinco números

de la heroica benemérita.

Vilo yo qu´entre dos files

de devotos con la vela,

el Bendito y alabao

diba por la carretera.

Y al oir tocar a gloria

les campanes de la ilesia,

y la música que bate

marcha rial, y que na tierra 

tá fincada de rodiyes,

muchedumbre tan inmemsa, 

mientres canten los xilgueros

al Siñor en l´arboleda, 

cuido yo que todo xunto

tá diciendo a boca llena:

Glori´a Dios e nes altures,

y pax vobís  en la tierra.

Ya lo sabe la parroquia 

que se afaya satisfecha

con el Cura, que non sabe 

si la tién,  o si la sueña;

ya lo sab´el cura párroco

los amigos con que cuenta:

un regalai una imagen

de la Virgen; otro-i envía 

los faroles p´allumar ;

otro da la vestimenta

del altar, el encensario,

cuanto ye mester que dean.

Todo       ye de agradecer, 

está bien que se agradezca,

porque tién el que agradez

la virtuz que más se aprecia:

pero aquel cuando i pieden 

unos tacos de madera

correspuende  al petitorio

de la forma más espléndida,

regalando la custodia,

filigrana que hay que vela;

el que fai un gran teatro

maravilla de la escena

en osequio de la villa,

na que vió la luz primera,

esi….. ye ´l avilesino

que faltaba  n´esta tierra.

Y como esto ye verdá 

que denguno me lo niega,

y a mi tócame brindar  

los los freres de la fiesta,

al echar por Anxelín

la cachada más tremenda,

que vos  coste que non güelvo

a sentame na tayuela

sin decivos  que Avilés

tién con Anxel una deuda,

que la debe de pagar

con moldialo en bronce y piedra.

Y i non lo fai asina,

como caso de concencia,

ye que, así me salve Dios, 

acabóse la vergüenza.

Orbayos de la Quintana. Marcos del Torniello.-

La “Virxen del LLungueru”

Vana facer una fiesta

a la “Virgen del Llungueru”

qu´está ´ncima “La Pumar”,

i face ya munchu tiempu

de que allí se ciellebraba

con bastante llucimientu.

Quieren aquellus vecinus

facer agora lo mesmu

que fixenon los d´antañu,

ricordandu  aquellos tiempus.

Quieren qu´háiga  bollu i ramu

pa dimpués asobastalu

e´na “Virxen del Llungueru”.

Quieren los comisionaus

facer un baile trementu

e´nonde al son del tambor

puean los mozus del pueblu

dimostrar la axilidá 

de que ye capaz so cuerpu.

Quieren ver cuántes mudances

saben los mozus solterus,

i ver si les rapacines

les bailen al mesmu tiempu.

¿Quién ha de ser el qu´en baile 

dé los pasos con aciertu,

nueva garbosu los brazus

bailandu siempre con tiempu

pa que podiamos dicer 

que ye ´l gallu del conceyu?

Ya mos provez por saber

a quién esi nombre demus,

por ser quien miyor bailó

e´na “Virxen del Llungueru”.

Dende que morrió ´l Zarricu,

dende qu´el Ferre foi muertu,

desque morrió la Marquesa

i el Malvís  dexó esti suelu;

desque se se morrierun tantus

que jueren tamién comu estus 

persones de munchu arraigu, 

d´experencia  i de rispetu,

ya non se golvió a bailar 

comu agora vus dicemus,

e´na camperina aquella 

de la “Virxen del Llungueru”.

Por esu quieren que sea

ricuerdu d´aquellus tiempus,

i güelvan les romeríes

a ser comu antañu fuerun.

Quieren que se güelva oyer 

cantar el “Señor Sampedru”

i la “Virxen Soberana”

que fai tiempu  non oyemus.

Quieren ver cómu se baila

i que baile cad´un sueltu;

ca´parexa frenti a frenti

mirándose con afeutu.

Los mozus ´n una ringlera

i les moces frenti d´ellus.

El de más fama d´el baile

siempre se pon  a un extremu:

ye ´l que saca les mudances

pa que tóus bailen lo mesmu.

Ansina bailaben antes,

ansina dicen los vieyus;

el baile yera descansu,

el baile yera consuelu.

Por esu quieren agora 

de que nunca lo ´lvidemus,

i güelvan bailar ansina 

e´na “Virxen del Llungueru”.

Anton el Chiova. Versos.-

Les gafeces

Hai que fuxir d´afechu, non pisales

que les gafeces ¡mialma! son dañibles

y convién  que se fagan los pusibles 

pa non veles siquiera nin topales.

Les mordedures d´elles son mortales,

pos noculen venenu, vengatibles,

y reparaes bien son perhorribles

que sembulicen los mayores males.

Cuélebres, basiliscos, gusarapos,

escalamuerzos, chinches, mosques, sapos, 

llagarteses, babosos, rates, fieres,

calaburnios, llangostes, saltapraos,

arañes, cucaraches y llimiaos, 

víbores, escorpiones, sacaveres,

Enfermedades qu´entren pela boca 

Enantes de comer hai que dicir esto:

Jesucristo, Rey Divino

aquel que nació en Belén

nos bendiga la cumía

y a nosotros tamién.

Dicíen esto enantes de beber nuna fuente:

Periquí  pasó la Virxen

periquí volvió a pasar….

si esta me ficiera dañu

que la güelva a gomitar.

San Pedro y San Xuan

per un camín van.

Diz-y  San Pedro a San Xuan

“Ahí va un queméu…….

Di-y  qu´escupa  tres veces 

y pronto será curéu.-

¡Adiós mundu!

¡Ay Virxen querida! ¡Virxen soberana!

acábase ´l mundu, el mundu s´acaba!

per un llau se funde, per otru s´aplasta,

per utru ´n magüestu, que too lo abrasa.

Y´un día ´l Vesubiu  qu´un gómitu ´ntama,

y alá del bandullu salpica la llava,

qu´un añu tras añu  avaru la guarda,

y fieru retiembla, terrible brama,

y gufa con juercia y empuxa con rabia,

qu´ hasta mesmu cielu so fuebu llevanta,

¡paez que, un malditu resopla ´n la llama!…..

Sube ´n remolinu; de secuti baxa;

too lo que topa  a su pasu, mata;

sema la tristura por u quier que caiga,

de lo que fo vida, non dexa migaya;

óyense llamentos que dan pena ´l alma;

quexes del que fuxe que doliente llancia;

ayes del que muerre tostáu per la llava

ruxíos que atronen, válagu qu´espanta:

llántase too  a una so´l mundu  con ansia

como si un castigu de Dios nos baxara.

Ya un día la tierra d´un llau s´esfarrapa

y estruxa  ´l obreru  que ´l probe trabaya,

rincandu del fondu riqueza preciada….

¡quién sabe si allegre  nel trabayu canta

pensando ´n los fíos quiziás na rapaza, 

qu´amorosa ´spera so feliz llegada!

Y allí queda ´l home fechu repla….. nada

¡polvu de que semos, lluz que fo y s´ apaga,

povisa que sube pel vientu arrastrada!

D´utru llau ximielga  ´l llombu  con rabia;

d´un calón al suelu los fogares bastia;

y ábrense barrancos na vega floriada,

onde un llanu viose, un monte llevanta;

y utra vez tristures, la llergia que fraya

y utra vez el home a quexase  ´ntama,

y mirando  al cielu, busca allí la calma

qu´abaxó ´n la tierra, el probe no afaya

y  ascomienza ´n  gritos de dolor, que plasma

¡Ay Virxen querida! ¡Virxen soberana!

acábase el mundu, el mundu s´acaba.

Pachín de Melás. Obra Completa. Volumen I.-