Puerto de Palo - Pesoz - Cela - Sanzo (Allande)

Texto:

-Dibujo de la Ilustración Gallega y Asturiana.

-Entrada de Mª Cristina de Borbon en la ciudad de Oviedo 4 de Julio de 1852.
-La güelta del americanu.
-La pata de Xuaco.

Dibujo de la Ilustración Gallega y Asturiana.

Puerto de Palo: Allande. 

Entrada Dª. Mª Cristina de Borbon, en la ciudad de Oviedo el día 4 de julio de 1852.-

Interlocutores Don Pedro - Xuanon

D.P. Vaya Xuanon, bien venido,

gracies á Dios que te vemos.

Muncho trairás que cuntar

delo  que pasó en Uvieu, 

y non siento  poco yo 

qu´esti  rumatismu neciu

non m´haya dexao dir…..

Xuanon Pos escúcheme, Don Pedro.

Cuando entré pe la ciudá 

pensé que yera otru pueblu:

blanques  estaben les cases

como la ñeve en Xinero,

y les calles tan barrides

y con el pisu tran frescu

que nin escupir dexaben 

á la xente per Uvieu.

Pero la casa meyor, 

la de mas acatamientu,

yera la casa Velarde:

¡allí sí qu´estaba güeno!

Colgaben unes cortines 

por sobre ´l enrexamientu

de los balcones, qu´amigu,

según me dixo un maestru,

co los cuartos qu´elles valen

hay pa mercar un conceyu.

Non ye pol oro y la plata, 

(que non tienen), ye pol tiempu, 

por la muncha antigüedá,

y el llabor de muchu esmeru.

Ficiéronles los Romanos

y traxéronles los Griegos:

asina lo aburuyó 

un estudiante muy tiesu

qu´esplicaba les batalles 

á cuatro ó cinco paletos.

Pero ´l casu  ye qu´allí 

debin tener el pucheru

la Reina Doña Cristina

y la xente qu´ella trexo.

Entré pol portal p´alantre 

sin qu´hubiés dengun tropiezu,

y al dir pasar la otra puerte

pa poder colarme dientro, 

pescome pel brazu un guardia…..

pero nel istante mesmu

quixo Dios  qu´allego  allí 

un Siñorón del Infiestu

á quien yo serví una vez, 

y mandome entrar corriendo.

Coleme sin mas nin mas

en un pátiu qu´era un güertu.

Tantes flores, tantos ramos,

tantes pavíes y piescos

perales y guindalinos

vi de repente, Don Pedro, 

que miániques si non cri 

que yera cosa d´un sueñu.

Dempues que subi parriba

tropecem´otru  porteru

al que mandó ´l Señorón

mas que de prisa y corriendo

enséñame los salones

y lo qu´estuviés compuestu.

Fuimos por tres pasadizos, 

y dende ´l últimu d´ellos

divisé un salón muy llargu,

llenu de ricos tayuelos:

pero antes d´entrar e-nel

dixom´el  siñor porteru

que posara los zapatos

pa que no ´mporcás el suelu

tapau con unos paños

que costaren gran dineru.

Al colame pe la puerte

causóme munchu respetu

un Siñor qu´estaba allí

engalonau y derechu.

Beso á so mercé la mano, 

dixe entóncienes al vellu,

y mal apenes lo dixe

golví patrás el piscuezu

al escuchar les risaes

qu´empezó  á dar el porteru

por que falaba á un retratu

como al Siñor Conde mesmu.

Pero ¡quién había pensar

que non yera carne y güesu!…….

Fuí sentam´en un sillon

de grana de terciopelu,

y en cuanto m´afinque ´n él

afondé tanto pa dientro

que pensé que se fundía 

toa la casa d´afechu.

Agarreme como pude

co les uñes al asientu,

y al llevantame parriba

entre encoídu  y derechu,

vi que sin tocar en mi 

se bambiliaba el mió cuerpu

pa hácia  allatre y pa hácia atrás

sin sentir yo ´l movimientu.

Púnxeme descoloridu

y arremeillando los güeyos,

¡Virgen del Monsagru!, dixe, 

amparaim´en esti aprietu!

Estando ´n aquel encantu

echome mano ´l porteru,

y con-él cuatro Siñores

qu´á les miós voces vinienon.

¡Qu´asucede? ¡qué pasó?,

y al esplicayos el cuentu

non facín mas que reise,

y dixom´el del Infiestu,

pero pollín,  ¿tu non vez 

qu´aquel vidriu ye un espeju, 

qu´el sillon está delantre, 

y qu´al  ponellu derechu

fué menester meneallu?

Pos faite cargu, magüetu,

que los cuadros y les silles

y les meses y tú mesmu

si, al movese, estais delantre

andareis al retorteru.

Mas que de pasu dexé 

el salon de cumplimientos, 

como lu llamó un Siñor

qu´estaba col del Infiestu,

y fuimos á una salona

donde tenín el refrescu.

Eren tántes y goloses 

les coses qu´allí habin puesto

qu´encomencé yo á llambeme

y á resfregar el  botiellu.

Dígame, Don Pedro, agora, 

gusté qu´entiende más d´eso, 

¿qu´i paez? esos Siñores

que cuiden tanto ´l pelleyu,

duermen en cames dorades, 

y comen siempre torreznos; 

dempues qu´estiren la pata, 

qu´al cabu  non tien remediu, 

¿vivirán nel otru mundu

tan fartos y tan contestos?

D. P.  Esa pregunta, Xuanon,

est captiosum argumentum……

Toos tienen una cruz…..

Xuanon De más ó menos pesu:

y yo de min se dicer…..

D. P.  Heresiarca, vade retro…..

Xuanon Bien puede sé la verdá 

lo del arca per adientro, 

domo diz el llatinazu

que gusté me trai á cuentu,

por qu´apenes  hay dengunu

que pon enriba del pechu

de cruces y relicarios

non ximielgue mas de un cientu.

D.P. Merecides les tendrán, 

con que non te metas ´n-eso,

y non t´olvides qu´estabes

e´na sala del refrescu.

Xuanon Viendo que non daben nada

y que yera perder tiempu

estaralli mas, salime

dando gracies al porteru

que me mandó dir á ver

el arcu  trunfal d´Uvieu.

Marché pa la Puerta Nueva

y allí ´staba el arcu puestu, 

verde, floridu y hermosu.

Ansina como hacia ´l mediu

asomeben dos estantes

qu´á los pies tenín lletreros.

Unu decía, Don Pelayo:

y el otru Alfonsu terceru,

Vusté los conocerá.

D.P. Pos mira, Xuan, en el tiempu

en que Dios nuestru Siñor, 

cansa de sufrimientos,

quixo mandar un castigu

pa qu´escarmaren los pueblos,

consintió qu´en toa España

mandaren los Sarracenos:

xente tan endegoriada

como los Degorios mesmos.

Llegaron a les Asturies

y estándo ´n Xixon supienon

que xunta Cangues andaba 

Don Pelayo co los nuestros.

Unviaron un general

con cien mil d´aquellos perros

pensando que yera cosa

de merendalos d´afechu.

Yeren no más qu´unos pocos

pero ayudolos el Cielo

por qu´empuñaben la Cruz

contra ´l pendon del Infiernu.

Don Pelayo en Covadonga 

con toos  sus compañeros

pide á la Virgen amparu,

ponse e na cueva derechu,

y mal apenes entraron 

dando berrides sin cuentu

los Moros po la vallada,

desatáronse los vientos, 

y reventaron les nubes, 

y restallaron los truenos, 

y Pelayo co los suyos,

dende aquellos pericuetos,

peñes y troncos llanzaben

faciendo matanza ´n ellos:

y de tal modu ayudó 

la Virgen santa á los nuestros,

qu´hasta les fleches morisques

sobre los Moros volvieron.

Entoncies vió ´l Mosulman

que no ´staba too fecho;

que tenia la guerra ´n casa, 

y co la ayuda del cielo, 

Y Don Pelayo y Alfonso,

y San Fernado y el pueblu

y los dos Reis católicos,

de quien fué brazu de fierro

el Gran Capitán Gonzalo, 

volvió á formase esti Reinu

qu´allegó á ser el mandon

de tou ´l mundu modernu.

Agora sigue palantre.

Xuanon  Yeren si mal non m´acuerdo

cosa de les cuatro y cuartu

cuando m´asenté ´n el suelu

atrocando un guapu sitiu

pegadin al arcu mesmu.

Dieron seis, non venía:

sonaron las siete, menos.

Cuando ya diva á marchame.

un cañonazu tremendu 

dió siñal de qu´allegaba:

pundonores ´n movimientu

el Alcalde y Rexidores, 

los músicos y cueteros, 

y al cabu de media hora

allegó todo ´l cortexu.

Aparolos el Alcalde

que llevantando ´l sombreru

y faciendo  ceremonies

dixo:  Señora, esti pueblu

estaba ya deseosu

de que Vusté …. si por cierto, 

de que Vuestra Maxestá, 

deseosu estaba el plueblu,

y por que….

D. P.  Non digas más,

pa Diputau yes buenu

cuando haiga eliciones….

Xuanon Ye un trabayu que yo tengo.

Aprendio de memoria

y olvidóseme, Don Pedro.

El casu ye que m´esplique, 

y como i diva diciendo,

entre tantu  rebulliciu 

de músiques, campaneo,

y de xente alborotada

por toes partes corriendo,

allegó Su Maxestá 

fasta la plaza d´Uvieu

donde estaben esperando, 

puestos nel balcon del mediu

del Consistoriu, seis neñes,

como Angelinos del Cielo, 

vesties toes de blanco

con floriquines en pelo,

y palombes e na mano

pa soltar al mesmu tiempu

en que la Reina pasase

por xunta ´l Ayuntamientu.

Soltar soltárenles bien,

pero la Reina á todo esto

non pudo facese cargu

por qu´un orbayu muy neciu

no i dexó salir del coche

fasta que la recibienon 

allá na casa Velarde, 

como ya i dixe primero, 

el Rexente y Oidores

y otros mandones d´Uvieu. 

Metiese alli y buenes noches, 

cada páxaru al so ñeru

y que Dios i dé salú 

y la dé tamien al Reinu.

Oviedo, 5 de Julio de 1852.-

La güelta del americanu

Tovia mi paez que tengo un ñudu atau mesmamente na barriga de tantu rime. ¡El degorriu de Raonín el Goxeru! ¡Ye el pecau! ¡Diómosla bien con quesu! Yo allégrome, hom; pa que toos isos que non faen más que ximielgar la llengua dexen tranquilu a un y non se metan en fondures. ¿Qué diañu i os importa a illos les vides de los demás vecinos, hom? Ye lo que digo yo: ca un ye ca un…

Pocu antes de allegar Colasucu, el fíu Ramonín el Goxeru, non se oyía p´el pueblu mas que: ya esembarcó en Xixón Colasacu; non trai un cuartu; ya tará quemau so pa; y dicien que traía atromóvile y tóo…. Güeno; que non dexaben en paz a un, nin pa arrascase. ¡Si non trai dineru, pior pa el, resoño! A illos que i os importaba?¡Bon chascu llevaron!¡Non, lo qu´es, yo rime d´alma!…

Mirándolo bien, yera pa creelo. El mesmu Ramonín non decía naa de como i diba al so fíu per les Amériques.¡Ta fechu bon zorrucu! Ahora caigo na cuenta, que por iso  un día, viniendo yo de segar un pocu yerba, taben él y el señor Cura falando metá una caleya y Ramonín  decíai, además de otres coses que non pude oyir… teo dir a Uvieo a cambiar por pesos isti cobertorucu-y ensiñabai un papel- que me mandó el mio fíu  de L´Habana…¡Non ta él mal cobertorucu! Yo nel momentu non caí de la burra en baxu pero diome cunta ahora.

Conque,  recibe Ramón del so fíu un papel azulau con ringlones blancos nel que i dicía que llegaba al pueblu a les doce. En menos d´un menutu supiémoslo toos los vecinos, y a les once tábamos mediu pueblu empantasmaos na carretera. Porque, ya se sabe, non traendo perres d´allá, había de venir po la carretera con la maleta, toa atá con sogues, al llombu, por que los atayos ya se i olvidarien. Así habíen venío el cuñau Firme Portiella, Belarmo el Ponticu, el nietu quico Bartuelo, y tantos; que por cierto taben allí toos bien contentos por que al fin Ramonín diba venir per onde illos. N´esto va Naleto el de xunto al molín, y eso que dicen que ye medio pazguatu, y diz A Colasín pasoi lo que a istos-y puntaba col deu pa los que habíen tao na Habana y ahora taben allí- cayor la valixa al agua. ¡Hubo dalgún que se punso bien collorau!

N´esto, vien por la carretera un atromoble blancu, más grande que la corrá del Siñor cura, piegando unes berríes que metíen mieu; y tóo esto pa ná, porque  non había un alma na carretera. Y él comu si non ¡vengan berríes! Cuando taba cerca nosotros paróse. Toos creimos que se i había ´stropiao algo. Conque, va a baxase  un siñorón altu, de sombreru de paya y toes les manes enllenes de sortixes. Hasta que va el siñor Curin, que ta en tóo, y diz: ¡¡Pero, si ye Colasucu, el fíu de Ramonín el goxeru!!¡Non hubo dengún patatús per un milagru, pero, mialma,  non afaltó munchu!. ¿Quién  dibe a dicir que aquel siñorón tan prencipal yera aquel Colasucu que llindiaba la Pinta y la Gallarda facía abondos años?

Yo entamé a rime d´aquellos que pensaben que diba a venir co la maleta so el llombu; y tantu me rií que d´eso debo tener mesmamente na barriga un rindu atau.

Pacino Villaverde. 

Llestres Asturiane. Academia de la Llingua Asturiana. Nº 56.

La pata de Xuaco

Non, non espatuxeis nin gorguteis más, que la cosa non fai munchu  que pasó, nin voy cotavos con defuntos; tan tous ahí bien pertiesos, bien bonos, con una salú como xatos. Preguntailo, si non, a Piñón de Colás de Tomasa, al  xenru Manolín el Curiu y, sobretou, al Siñor  Cura del pueblu, que foi por mor d´él por quien Xuaco, el mió fíu, el que va dempués de Quilo, non tien a estes hores una pata toa sequina, el probe.

Verais como foi la disgracia. Yera el viempu los figos; y aquel añu taben bien bonos: ista ye la verdá; daba gustu prebalos, yeren pura miel. Pos güenu; Xuaco, el mió fíu, y utros rapazucos como él, foron a illos. Y como los guajes son el mesmesimu diañu, que non ´scurren  como presones, dayos por esguilar una figal, y cuando taben enriba picipien  a fartase de figos. El cuentu ye que un d´ellos ximielgoó les cañes, y el mio fíu, que taba escudiau, cayó de la figal en baxu tou espatarrau, tal que un sapu,  quedando el probitín alloriau del trompazu. Los utros rapazados dan gritos pa llamar a los vecinos, austados los neños. Vien el xenru Manolín el Curiu y llevame so´ el llombu  al mio fíu pa casa. Yo que taba sentau na tayuela por que había viníu de segar, cuando lu veo entrar per casa pa dientro co´ el mio fíu  al recostín non atinaba a llevantame. En cuantis lu ví, tou amariellu y una pata colgandoi, creí  que yera cadabre.  ´N esto llega Rosa, la costiella, y en cuantis vió al rapaz d´aquellas faches… ¡Virxen del Cielu..! home,  yo pensé que tamién la mió muyer morría. Dieroni amorios y tou.

Pos güenu, per conseyu  les vecines, porque  ´ en estos casos ta un pazguatu, unviamos por Antonón el Roxu que que yera un bon curanderu. Y en allegando entamó a retorcei los güesos, encoyei y ´stira les pates- y poniai una rodiella nes espaldes cojiai les manes y tirabai d´elles p´atrás. ¡Abondes veces pacciome que diba partímelu en cachinos! Por fin mandomos que i diésemos unes friegues con vinu blancu fervio, romeru y avinagre tou mecíu; y dixo que dentro d´unos ochu dís taría sanu com´un coral, que aquello non yera ná. Tou si lo creimos; pero  ¡quiá! pasaron  los ochu dís y ná, pasaron dos meses, y el mio fíu tenía la pata tan encoyía comu el primer dí. Golvió a dai mas friegues, y que si quiés.

Hasta que ya cansaos  del curanderu, que non yera más que un saca-cuartus, entamámosla yo, el fíu y la muyer pa Uvieu, pa dir de vesita a un médicu.

Miroi la pata, plizcoila, pincholu con unes aguyes, y por fin salta con que non tien remediu, que quedarai la pata asin pa toa la vida, y que non i la salvaba más que un milagru.  Cobromes cuatro pesos y quedose tan campante. A Rosa por pocu i güelve el amoriu y sobretou al oyir lo de los cuatro pesos. ¡Bona llaceria de fiu díbamos tener!¡Tan sanu, tan robustiu que taba,  que tenía tantu bríu com´un güé! ¡Tener que andar to la via entre aquelles estaques!

Llevámoslu a utrus mélicos y toos dixeron lo mesmu, que la cencia non i podía sanar la pata y que solo podtría curiala un milagro.

Fuimos tar con D. Joanín,  el Siñor Cura, que ye tan bono y tan llistu; y de camín a preguntai quien podía facer el milagru, que había tar enterau, que pa iso yera Siñor Cura.

Con que, diendo, va  i diznos que solo los facíen los santos del Cielu; que podíamos dir a Covadonga y pedir moi homildemente a la Santina que i curase la pata al nuestru neñu. Con que, va Rosa y dizme: Vamos dir a Covadonga a pedirlo, siempre tuve muncha fe ´n ella. Güenu, dixe yo, diremos.

Cogí, un día de mercau, la Cordera, llevela a Uvieu, vendí, y pa Covadonga tiramos yo, Rosa y el rapaz. Ficimos lo aue nos dixera el Siñor Cura.

Con que, al mes, Xuaco, el neñu- que siguía andando con estaques-al llevantase de la cama dizme que i paecía que podía encoyer la pata un pocu en sin mancase.Non ficimos malditu casu. A los pocus dís dizme que le espurre un pocu más. Entóncenes voy yo y miroi la pata; y  ¡eldiañu nunca me lleve, yera una verdá comu ´n  horriu! Coyemos al neñu de seguida y pa Uvieu a ver utra vez al mélicu. Y ¿sabeis lo que mos dixo? ¡Plasmai! ¡Qu´el neñu non tenía na en la pata, qu´el non yera él! ¡Fijaivos si el pa non va conocer al fíu?

Que la pata del utru sabía el como taba y non tenía remediu y que la d´ isti, en cuantis que se i espurriera un tendón que tenía encoyíu, podía correr com´un  llargatu.

¡A la muyer y a min caiamos la baba! Va Rosa y diz a gritos:¡La Virxen, la Virxen lo fizo, sí, foi la Santina! El mélicu, al  oyila, con un den barrenó la so vidaya y miraba pa mín, como quien diz: ¡Esta muyer tá algo lloca!

Pos a istes feches el mio  fíu Xuaco, gracies a la Virxen, tien una salú com´un gochu de matanza, y anda  tan tiesu com´un fusu; y golvió antiyer a Melilla onde había díu de quintu. ¡Por eso venimos nosotros a Covadonga, a dai les gracies a la Santina, porque a más de curánoslu de la pata trixónoslu con salú del sirciciu.

Pacino Villaverde. 

Llestres Asturiane. Academia de la Llingua Asturiana. Nº 56.-