El ñeñu enfermu {Antigüa poesía Asturiana}

Textos: 
-El ñeñu enfermu.
-Vieyu carrín d´esquirpia.
-Libertá.
-Casu y casoriu.
-Niuches d´otoño.
-Una isprisión.
-La hombrada.
-Non ta sola.
-El cantu ´l romeru.
-El báilale oso.
-La nuiche.
-Carta t´escribo.....
-La fontina.
-Una vaga mar.
-Carta de Perico a Carmela.

El ñeñu enfermu

Medio apagadu el candil 

Y antes q´el gallu cantára 

Tuxa llagrimosa y sola 

Cabo el so ñeñín velaba.

So cuita aumenta el silenciu

 Que reina pe la enramada: 

Solo la mar de muy lloñe

 Con sordos ruxidos brama: 

Solo el arroyu del monte 

Entre les peñes restalla. 

Y dalguna vez en güertu 

Canta el paxarín del alba. 

Triste como sos pesares. 

Doliente como so alma. 

Y los rayos de la lluna 

De pardes ñuves velada. 

Amortecidos pasando 

Pel medio de la enramada. 

En el rostru decaidu 

Do fexo el dolor morada. 

Les llágrimes solitaries 

Sorprenden de la cuitada. 

Q´en so semblante parecen

 Como parez la orbeyada. 

Sobre la flor del romeru

 Cuando risca l´alborada. 

Les melenes despeinades 

Abaxando pe la espalda. 

Sin pañuelu de cien flores.

 Sin corales la garganta. 

Co la mano na maxella 

Pe la pena solliviada, 

De la cuna del so neñu 

A la par está sentada: 

Sentada, cuidosa y triste

 Por el dolor aguixada. 

Mas que palomba del monte

 Que llora de rama en rama. 

En sombríes carbayeres 

La so perdida mitada. 

¿Y qué munchu si non tien 

Otru fiu la cuitada?

Ye el frutu de sos amores 

Coidu recien casada. 

Retratu del que bien quier. 

Prenda d´una namorada. 

Míralu tienra y sospira 

Porque el so penar la mata; 

Y les manines de cera 

Mientres la fiebre lu abrasa. 

Cien y cien veces i besa

 O allá en so senu les guarda. 

Y la carina encendida 

Con sos llágrimes i baña 

Ansi ñuve del veranu 

De goterines preñada. 

Rocía con elles les flores  

Q´el sol tien amortiguades: 

Y non reñacen ni tornen 

a ser del pradu la gala; 

Del pradu donde ñacieron 

Y donde el calor les mata.

 ¿Qué fará la probe Tuxa

 Cuando el so ñeñín s´abrasa.

 Y ye perdidu el so lloru 

Y á mexoralu non basta? 

Velu sofrir y quexase .

 Y pa solliviar el alma

 De les penes que la aflixen 

Ansi doliente les llanza.

 Anxelin hermosu, bixu de to má

 Que penes i dieres 

¡Si Dios te llevas!¡Probequín ! 

¿Qué tienes? ¡Qué te fexo mal?

 Calla; mil alma, calla

 Non te quexes mas. Mira; 

tengo date un corriverás . 

Y un xatín pintadu 

Como el de to pá. 

Tapa les manines ;

 ¡Ay, que friu fai! 

Cierra los güeinos 

¿Non te dormirás? Ora ñeñin ora, 

Vixu de to ma; 

¡Non sabes, queridu, 

que penes i dás!. 

¿Si Dios te me guarda. 

Has dir a Candás. 

Y un ñeñín de cera 

Al Cristo darás. 

El gorrete nuevu, 

Valona has llevar; 

La saya de xambre

 Pañu de madrás. 

¡Pero non me escucha!

 ...¿Si lu agüeyará 

La vieya Rosenda 

Del otru llugar? 

Desque allá na cuerra 

Lu diera a besar, 

Poqueñín a pocu 

Morriéndose vá. 

Dalgun maleficiu

 La maldita i fai; 

Que diz q´ á Sevilla 

Los sábados va, 

Y q´anda de noche 

Por todu el llugar. 

Chupando los ñeños

 que gordos están, 

¿Si el míu la bruxa 

también chupará? 

témolo en concencia 

Témolo en verdá. 

Mañana sin falta

 (Si he que llego allá) 

Con agua bendita 

Lu tengo asperxar. 

Y ponéi la cigüa 

Antes de mamar, 

y dai pan bendito 

Mezclau al papar, 

Y de San Benito Se i ha de colgar,

 La regla que fora 

del Padre Bastián "

 i como lu punxeron! 

¡Ay, que talu está ! 

Era gayasperu, Alegre, xovial;

 Soliquín andaba, 

Soltára a falar; 

Daba gustu velu

 Correr cabo el llar,

 Faciendo veyures 

D´aquí par´allá; 

Y agora amusgadu 

Sin fuelgu tomar. 

Non tien mas que güesos; 

Morriéndose va 

¿Par´eso dolores 

Costasti á to ma? 

¡Par´eso hasta agora 

te dió de mamar. 

Y trexote en cuello 

Sin tomar vagar, 

Y llevate al sallu 

Y á casa te trai.

Y pasa les noches 

Aña q´añarás? 

" Ay Señor, que penes

 Me da isti rapaz! 

Pasálo por elli 

Mas quixiera, más; 

Q´el triste sos males 

Non sabe esplicar, 

Y quéxase y llora 

y faime llorar. 

Y remediu en tantu 

Non puede afayar. 

¿Qué dirá so padre 

Que na siega está ?

¿Si vien y morriendo 

Lu atopa quiciás.

 Si quier Dios acasu 

Non lu vea mas. 

¿Qué consuelu entoncia 

Y podrá bastar? 

¿Donde está el

 mió ñeñu Del alma, dirá ? 

Mió Xuanín queridu, 

Que asi me dexás! 

¿Nin veré tos rises, 

Nin t´oiré falar. 

Ni á ver los xatinos

 Vernás al corral. 

Ni en pradu ente flores

 Mas treveyarás. 

Mientres que la yerva 

Guadaña to pa? 

¡Pa quién les cereces

 Tengo yo algamar, 

y traer á casa 

Ñeros de reitán, 

Y fer xiblatinos 

Y llumar el llar? 

Pasó como el 

fumu tan gratu solaz :

 Perdite queridu. 

Non te veré más . 

Llevasti contigo

 L´amor de to pa: 

Llágrimes  y dexes, 

amargu pesar.... 

-"¿Qué digo? Estó lloca; 

Mátame so mal. 

¡Anxelin hermosu 

Vixu de to má.

 Que penes i dieres

 Si Dios te llevás! 

Calló Tuxa y el neñín

 Como si quiciás calara

 La pena que dá á so madre 

Y s´empañás en calmála. 

Mas galan que un anxelín 

Co la cara sonrosada. 

Volviéndose hácia so má.

 Que no i quitaba güeyada.

 Gasayóla i sonrióse;

 Y faciendo una monada,

 Allargói los braciquinos

 En ademán d´abrazala.

 Diói é na frente un besín

 Y la cabeza enclinada 

Sobre so senu de ñeve.

 Allágrima la so cara;

 Falagóla y allugadu 

En nél fexo so morada 

El sueñu cerrói los güeyos; 

Quedó so pena calmada. 

Q´el cariñu d´una madre

 Ye melecina probada. 

Y lo que non fai ñatura.

 Nunca del arte s´alcanza. 

Vieyu carrín d´esquirpia:

Siempre te conocí

 tal como agora,

ximiendu pel camín, 

triste, doliosu. 

¿Qué penina t´escuez,

 embruxaora, 

pa que berres así,

 carrín graciosu? 

Cuntábame mió güela, 

 siendu ñeñu,

 maldecios, que m´apandaben

 e na cama ´l sueñu faciéndome

 tiemblar d ´escalofríos. 

¿Sabes tú de dalgun,

carrín triste? 

¿Quiciaves ´n otra nochi, 

ya pasada, atechadín 

debaxu ´l horru oyiste, 

per cualquiera güela, ser cuntada? 

Qu´otra custión, si non, 

puedi amustiate con un dollor, 

asina, tan prefundu?

 Toi convencíu, y atrévome

 a xurate non ha ser el tó mal, 

mal disti mundu. 

Viéndote tras los güés,

 d´andar calmosu, 

como rey y señor de la caleya, 

naide puede pensar 

non seas dichosu y tengas 

que berrar com úna oveya.

 Non t´avergüences, non

 ¿Por qué has facelu?

 Yes rústicu, probín, 

llén de ferreñu. 

Peru, per riba d´esu, 

has de sabelu, yes fiel 

al tó deber co nel terruñu.

 Si non foise por tí, 

pol tó serviciu;

 llevar a los llagares 

les manzanes?¿Quién diba 

carretar, piensa y 

non berres, el maízu,

 les fabes y pataques? 

Y has de pensar tamién, 

posadamente qu´un camín

 en sin carru no ye aldega; 

Y sin aldega, Asturies, 

ye talmente como un bollu 

de Pascua en sin mantega. 

Porque l´Asturies nuestra, 

tuya, y mía, ye refaxu y calzón.

 Y son bardiales, Ye gaita 

y ye tambor. Ye romería.- 

Vaquez pastiandu en prau. 

Son manzanales. Ye la Cruz 

de Pelayu enriba ´l monte. 

Son los llagos, ñublaos d´Enol

 y Ercina. Ye ´l sosurrar del ríu 

y de la fonte. Son los horros,

 la sidra y la Santina. 

Ye ´l retratu, carrín, de tó fegura.

El tó modo de ser,

 sencillu y rudu.

Tó pértiga, cargada de veyura

 ye d´ista Asturies,

 el meyor escude. 

Ha faete , p´adornu, 

una enriestrada de llaureles 

y fueyes d´ocalitu.

 Pa guardate del fríu y 

la orbayada, he de chate

 pelleyes de cabritu. 

Pa quitate pruyíos e nos exes, 

pe los roces,

 tal como yo abarruntu, 

y que puedin ser causa 

de tós quexes, de date, 

sin más, nes ruedes, untu. 

He llevate per Pascues a la villa, 

co los güeyes meyores que posega,

 pa que lluzcas allí la

 maravilla d´un pagazu, 

viviente, de l´aldega.

 Y disgraciau d´aquel 

que per tontura, 

per dáseles d´agudu, 

t´ensultase. 

Ya que per sinvergüenza 

y cara dura diba llevar

 nel llombu hasta fartase. 

Que pa salir por tí tá la mió

 manu despuesta siempre

 a arremangar la ´staca; 

ya que xugar la ñuez 

per un hermanu, 

mialma non val, 

el preciu una pataca. 

Allégrate, carrín,

pon cara risa. 

Non güelvas a berrar 

con desconuelu, 

que nun ye ´l que más reza y

cuerri a misa aquel que 

ha de ganar más prontu ´l cielu. 

Que non porque los 

años se t´escuerran; 

que todu lo que al 

siempre fo eternu. 

Ríte sin más pesar,

 carrín graciosu. 

Ríte, mió carriquín; 

ríte con ganes.

Ríti con isi rir

 qu´armen ruidosu, 

al cayer los goxos, les ablanes. 

Echa con allegría una tonada.

Non pienses d´ista vida nes penuries.

Tú cumples, sin retruque,

 la obligada llabor de 

perpetuar a la tó Asturies.-

 De Bernardo Guardado Rodríguez -Avilés 1913.-

Libertá Tenía dos xilgueros el neñu de Xulián que pescara con liga en medio d´un payar; y porque non comien y non cantaben ná, llorando, istes palabres -yos decía ´l rapaz: ¿ qué tenéis xilguerinos que non queréis cantar? Yo tráyovos alpiste lo miyor q´aquí hay, y del miyor panizu que colecha mio pa. Enllénovos la xaula de migayes de pan, y cuando tien cereces la nuestra cerezal pélovos les miyores y tráyoles p´acá. Agora, pel veranu, que tanto calor fai, cúbrovos la xaulina con fueyes de la figal y flores de Benitu, lloréu y tomillar. ¿Non conocedes vos que non puedo fer más? ¿Entoncies que vos falta que non queréis cantar? Y diz que los xilguerinos del neñu de Xulián , igual que si falaren y dando les alines dizeren al rapaz: "Non queremos alpiste, nin panizu, nin pan, nin flores de Benitu, lloréu nin romeral. Si quiés, nenín del alma , si quiés venos cantar, non nos des pan ni flores; danos la libertá ".-

Casu y Casorui Al golver de la fontica  metanes la saltaera,  encarióse Nisiquina   con Sabín de la Botexa,  Vizconde del Rebollal,  anque pel mote lu ofienda.  Estaba ellí pensatible  y finxau com´una pértega,   y, empobinándose allí  co la ferrá n´a cabeza  allegábase  la xana,  sonsañando una cuarteta.  ¿Qué seluques ahí, magüetu?  dixo ente oscura y  melguera.  Preguntes ocioses,  Nisa, arrespondió   el probe llueta.  Si en cencia  yes más  qu´el cura ¿pa qué mé´ntrugues artera? ¿A quién atisbara yo,  que non chocáramos, neña?  ¡Y más yo y tigo, palomba,  palombina  mensaxera   del maravallu que siento  magar t´afayo rinsueña!   Tú yes la flor más lliviana   que s´atropa  n´a campera  y tos rises candialines  allorien al que te vega   po l´amor de ser tos llabios   más dulces que la cereza,  y yes orisca y mansuca,  e  non sé como yes, neña;  pero ¡ay! esi palmiquín  y esa roxina guedeya   y esa cara tan esñidia,  más nidia que la mantega,  ababórienme les mientes  y pónenme  l´alma en pena  porque de tou el fembrío  ganes pa min la palmeta.  Por eso to que decite,  alaxina pinturera, malgarita de mios suaños, regalu de mió querencia  que siento ´l pechu por ti   com´una cotolla, encesa,  que vo cuidate los pasos,   que me taraza la llerza,  y que casara por Pascua  si esa presona quixera   y a esa presona  gustase  la facienda  que esta  lleva y si esta presona  agrada a la que tién  en presencia, que po´l día  la acocara y suaña dimpués con ella.  Fala, fala sin sostancia,  platica abondo,  Botexa que si non sé  los tos suaños como  si nada sopiera,  bien se algama condenau,  que fosti un añu a la escuela  a deprender picardíes   pe la Gramática prieta  y te proye ´n trabucame  pa que arresponder non sepia.  Dime, Sabín ¿con qué suañes?   ¡Non me tientes la pacencia !  - Suaño con unes cosines   ¡Recorcio ! si lo dixera;  pero atendi, Nisiquina,  non me tires de la llengua   porque ´scurro vas fuxir,  con oillo,  a la carrera.  Pos engázalo , pecau,  que non la barrunto fresca,  y anda con Dios, xirigatu. ¡ El degorriu de babieca!  No te´nfurruñes, Nisina,   aúyelo  sin más treta.  Suañé que yeres gallina   y yo pitón . ¡Ay, qué fiesta!   y oyéte cacarexar,  respongóseme la cresta  y con el ala caída entamé  a facer la rueda  y arremetí ´scontra tí; yo non sé lo que  fixera  pero al dir piegar  un blincu  fixiste una  furtadiella  y yo caí de  ñarices de la ´ndiablada tixera,  mancorniándome d´afechu  y estrapallando  una dea;  anque del casu lo pior fo  que dí un sustu  a mió güela.   A los tres meses dimpués   del pasu la saltaera,   camín de Pola de Sieru  espatarrau va Botexa  so l´espinazu un pollín   con más sucos que la Güestia,  desencolau y esprimíu   com´una  sardina arenca,  pos nin fué solmena ´l rau,  nin ye a llevantar oreya  y como ta mancorniadu  en ca rebalgu que echa   fai un saludu  a la  xente qu´afaya  n´a carretera.  Tamién va l´amu mohín,  mazcando  un cachu pamesta   con un bolsau de cirgüeyos  pa criar daqué de juerza,  pos va a arreglar papeles   pa casase co la neña.   Cabo al  llugar de Lliceñes  hay cántiga  y pandereta,  cuetes, gaita y tamboril  porque casó con Botexa  la gayaspera Nisina.  Ya baxaron de la Ilesia   a llamber el chocolate   los novios y parentela. Diba Sabín  en ´a capa   enrollau fasta la oreya;  aunque de Xunio postreru  fai un sol qu´un  güe atuesta,  y estrenó Nisa zapatos  con un xugón de bayeta.  Extendió ´l mozu la capa  so la cama de la neña,  y entramos se rispingaron   quiciaes  co la mesma idea.  Fo de padrín  Celestón,  un siñor de la Carrera  qu´anda muncho en votaciones  co los de la mano negra,  y de testigos Celín,  Perfecto de la Piniella,  Valentín el de la Hazaña  y José el de la Maestra,  dando  fe po´l siñor  Xuez con muchu posu   y majencia  Don Dorino,  el llagareru, que pisa  en ca la Iabela. Yantóse  ¡ que fo yantar! una pata de tenrera una  boroña  por barba,   un quésu  de arroba y media,  cuayada semá d´azúquere,  un barril de sidre  aneya,  al pie un galipu  d´ablanes   y arroz con lleche y canela.  Al tute xugóse  abondo   y dalgún  de la tixera  colgó arteru un campanorio  pa que se asustás la neña  cuando al soplar el  candil se volviés  pa la pareda.  Ansí casó perdichosu  con Nisiquina, Botexa,  mas pa que ñunca  s´algame dicha, sin llárimes,  cierta: mató aquel día  la pollín  una condenada aviespa - Fabriciano González (1868)

Nuiches d´otoño:

Yera nuiche de domingo Templadina y azulada, La lluna va pocu á pocu Faciendo so caminata; Y nin siquiera una ñúbe S´atreve á tapai la cara. La villa tá silenciosa; Sólo dalgún  qu´utru pasa, Pa les fuentes van los mozos Falando con las rapazas Oyense cánticos, rises Y nin siquiera una flauta Que sollute, que sollute L´eternu anhelu del alma. ¡Ay, dulces nuiches d´otoño Templadines y de calma! ¿Qué tenéis que de los güeyos Facéis brotar una llárima?- Antología del bable . Tomo II. 

Una isprisión

Roñé con Pepe ´l Corío Po ´l asuntu d´una cárcoba. Y tiro úna isprisión Que ye la que mas me cala.
Entós yo, sin mas ni menos, Peguéi una mormiellada, Estrozándo-i el dentame Al so cochino canaya. Que me llamen sinvergüenza, Pelgar, desprudente, Guaxa, borracho, mocero, burro, Manguán, fio d´una cabra, tramposo, lambión, xudío, rancoyu, musguin, lilaina. Combayón, magüetu, mísere, gocho, vaqueiru d´alzada, pioyón, tiñoso, embustero, entruso, malbis, pantasma, gafez, payoto, fatón..... Non se me da una corbata. Manque me llamen maricu Non arrespondo palabra; Si dicen que tengo roña, O que toy enllén de cáspia Y soy enxencle y falseru. Cuido que naide me falta; Y aguanto com´un santin Que digan que tengo sarna. Premito que m´arrabuñen Y que m´apiedren la casa Y me cuspan nel focicu, Y m´arroben la manzana, Y que me pongan la torga, Y que me mexen ´na cama, Y abracen a la muyer ( non siendo más qu´abrazala). 

Peru lo que non consiento, asina me coman l´alma, Ye la isprisión que ´l Corio Tuvo a bien de chame ´n cara; Pos de cuantes isprisiones S´agomiten, la mas mala Ye ... peru val mas callar, Porqu´el fiégadu me baila. ¡Por vida ´San Xuan Ladiao Y de toda la mio castra!¡Vamos, que dicim´a mi Que non tenia crianza! José Fernández Quevedo. Antología del Bable.- Tomo II.- 

La hombrada

Filando las doce salí de la tasca

 y díome la vena facer 

una hombrada. 

Tomé una caleya, 

canté una tonada, 

y en sin más pensalo 

subi a l´atalaya do tá 

el cementeriu envueltu 

n´a tapia llarga, fría,

 triste como la mortaxa 

d´una novia muerta, 

blanca, blanca, blanca..... 

A la media noche, 

cuando tó ye calma, 

salen los defuntos

 en cuerpu y en alma 

pa facer la ronda, 

pa espantar la Guaxa.

Si yo lo presencio 

¿non será una hombrada?

 ¿Fíxolo otru mozu? 

¿Habrá quién lo faga? 

El candil de plata de la Lluna, 

taba tan llenu d´aceite 

que tó lo allumbraba. 

Cayía una estrella 

com´una bengala. 

Un negru silenciu 

la sangre cuaxaba. 

Mármoles y cruces y sombres.

 Tó y Ná. Esa Ná que pesa, 

se palpa, nos garra.... 

Olor a gardenies 

y a tierra moyada. 

Dos cipreses altos

 guardiaben la entrada. 

Dos cirios perpetuos 

qu´allumbren sin flama.

Lleguéme a la rexa; 

intenté franquiala. 

Un soplíu de nieve 

axelóme el alma. 

Algo me coxía, 

algo m´apretaba, 

algo a les mis 

pates s´engarrutiñaba. 

Un fantasma grande

 hacia mi allegaba.

 Les cuenques vacides

 y una capa llarga, 

fría comu el xelu,

 comu el xelu, blanca.

En la mano un ciriu, 

quixiá una gadaña.

 Juerza de flaqueces

 saquéme del alma. 

Corrí com´un gamu. 

Di brincos de rana.

 Tomé p´el ataxu;

 dexé l´atalaya. 

Cuantu más corría, 

más corría el fantasma. 

El fríu de so aliendu

 mió llombu xelaba. 

Y ¡zas! un escayu 

trincóme una pata, 

y en el santu suelu 

di la gran panzada. 

Llevantéme rotu,

la carne frayada, 

y cuaxau d´estrelles 

de les qu´atopara

 al dar el trastazu 

con la mesma cara. 

Sentí a les espaldes 

una carcaxada 

que rompió el silenciu.

 Yera el mío fantasma 

que con munches rises 

de mi s´alexaba. 

Conocilu al puntu. 

Yera el que non falta

 cuando nos metemos

 n´alguna fazaña. 

Yera esi metecu 

que nos acompaña

 en nuestres xatancies 

y el vinu nos agua. 

Yera el Mieu 

qu´allegre y burlón, 

marchaba, llevandu 

en su abonu mió hombrada. 

Antología del bable. Tomo II.

Non ta sola

Llevaron la neña Na caxina blanca Magar que la llume Del son se ´smuciaba, Y baxo ´l lloreu La probe descansa. Quedó soliquina. ¿Pa qué quier compaña Si juese muy lloñe Quien la galantiara? Muy lloñe, perlloñe, Después de besala. Dentrós risiquines Non hebo en so cara. Perdieron los güeyos La llume ´splandia. Y á los xilgerinos Ya penes non causa Con so voz melguera Con so voz platiada. Muy lloñe, perlloñe. Llevároni el alma Desque pa la guerra Fuxó el que l´amaba. Dentoncies los cielos Non hébien lluz clara Nin ente les flores Va ruxendo l´agua; Españen troníos Adientro del alma Daquella ñeñina Que muere amustiada. En el campu-santu Dexen la rapaza En una caxina Permaxa, permaxa. Quedó soliquina ¿Pa qué quier compaña Si los llucerinos Viénin á allumala? Quedó soliquina. ¿Pa qué quier compaña Si dalgún n´aldea De nuichi, cantaba: Que no la llames Que ya no viene Que se ha quedado dormida Debajo de los laureles?- Enrique García-Rendueles- Gijón 1880-1955. Antología del Bable- Tomo II.- 

El cantu´l romeru

Yera fresquillina La nuichi, el romeru Lloñe de sos campos Perdióse dafechu, Y llegó á la bardia Del floridu güertu Semadu de flores De roses de ensueñu. Echó una tonada Con gran sentimientu Pidiendo descansu. Por Dios, pal so cuerpu; Caleció á la llume, Tastió de lo aneyo, Dixo los cantares Que-i deprendió ´l cielu; Mentando á la neña Que-i tizara ´l fuebu Tres veces les llárimes Moyároni el pechu. Y elli entrastayada El alma de duelu, Cantando yos diba; L´adiós del romeru" Apenes el alba De lluz y contentu Rodiara la cría Afuxó ´l romeru, Como l´arandina Al llegar l´hibiernu. Colaron los dís Y axelóse ´l riegu; Ñacieron les fueyes, Esmucióse ´l vientu; Una mañanina  De sol abrilliegu La neña moría Arrecendía el güertu Y allá pe los campos Cantaba ´l romeru. Antología del Bable.- Tomo II.-

El báilale oso:

Al báilale oso, Al son del panderu Fáise lluego ´l corru Xúntense los neños; El húngaro errante Da nel parche secu. Y el son ye monótonu. Non ye aguilanderu. Ya doliente y sordu Como el del disiertu. Llevanta les manes El osu severu. Da una güelta y otra, Y apárase enmediu; El amu averdáscai Y fácese ´l muertu. Apenes gurguta. Non tien ensaliendu; Y lluego llevántase. Gárrase col dueñu; Repite les güeltes Llevando ´l panderu. Saca tres ablanes Dos figos, un piescu: Y sigen la andancia Per utru senderu. El osu camina. Y camina ´l dueñu El to sentimientu! Y pasen les sebes Y crucien el puertu, Canta vagamundu. Canta en sin aliendu. Y ¡hala! pa delante. ¡Non perdáis el fuelgu! El sol non alluma Lo que manda é fuebu; Arditu ta l´aire. Perardíu el suelu. El osu camina Y camina ´l dueñu: Aquel muertu fame. De sede isti muertu: ¡Y, hala, pa delante Col to sofrimientu! Finaba la senda. Y tendios en suelu Un morrió de fame.  Utru d´andariegu. Enrique García-Rendueles (Gijón 1808-1955)- Antología del Bable. Tomo II.-

La nuiche

¡Qué dolces tan los cielos Al fenecer la tarde, Cuando non hay un ñublu... Cuando non xibla un aire.... Cuando llume sereña Selino caye.... caye... Y esnidia ... y alonxana... Y esvanécese .. y vase....!¡Qué guapa ye la nuiche Cuando ´l tesoru esparde De son arrellucientes Fermoses lluminaries! ¡Con cuántu afán los güeyos Nel so misteriu espáyense. Y esnala ´l pensamentu Tres d´ellos á rodiase D´estrelles y luceros.... Como tarán los ánxeles En sos paseres d´oru Y ripios de diamantes!¡Ah nuiche, dolce nuiche, Q´al alma bona trayes Y deyes malencóliques Pertienres y persantes!¡ Ah nuiche, dolce nuiche. Que yes pa los morales Un llibru relluciente D´enfenetibles planes. Que tien ringlones d´orbes Que polvu d´oru orbayen. Y lletres de lluceros y estrelles de palabres...! ¿Que ye la lluz solana Que dende ´l cielo caye Dende que ´l alba amiga Fasta que vien la tarde. Qué ye, na comparanza,. Contigo comparable? ¿Contigo que t´allumen Centelles engazades De rollos de rellámpagos Y foles amburantes Que ´n ámbetu ´n que roden Fástase ´l abrasen?¿Hay chispa que non muerra? ¿Hay lluz que non pigace?¿ Hay sol que non se clise, Nin fueu que non se mate?.... Pero hay to ñoble sombra Tesa, terne ´nfondable; To sombra que non muerre, To sombra que foi antes Que él mesmu sol, pos taba En sueñu eternu amándose Nel so trubiecu de étere Mentantu que i cantaben Cantidos del misteriu Les nuiches etenrales. ¿Hay flor que non s´esfueye, Color que n´atristaye. Bravén que non amustie Y arume que n´acabe? Hay una, non más una: La flor de to linaxe. 

 Hermosa flor prendida Del ámbetu nes rales So s¡´strañu raizame; D´estrelles y lluceros Ye so vistosu cálice. Y pal Siñor en illi Busquen la miel los ánxeles. Tú, nuite soberana Non puedes ser de mármole; Tú tienes que ser fecha De ti mesma, y trabate Del ámbetu del cielo Pel altu colondrame. Con tristes tapeceres Y dolces alborades Con llumes muremundes Y sombres tiñeblaries ¡Y ´l pavor del misteriu De tos escuridades! ¡Oh, nuiche, dolce nuiche. Rixu de Dios amante. Ramu d´estrelles pures Que per el cielo espayen Arumes del Etenru! ¡Dexa que ´l alma vaguie Per tos misterios! Déxala Beber nos mananciales De soma y lluz que broten De to senu ´nfondable: Y dexa á la mió alma Gociosa arrodiáse Y á to imperiu l´ofierta Facer de miós cantares. De todes mios angusties Débati yo les llárimes, Débati yo miós quexes, Débati yo miós cántigues. Y la gloria que vego De Dios, que ´n ti resplándie.... Que ye como ´l guarnéscola Que ponxo ´n to semplante. Pepín de Pría (Nueva-Llanes 1864-1928) Antología del Bable. Tomo II.-

Carta t´escribo...

Ya se fue ´l domingo ´l Gordu, martes d´Antroxu esfumóse; ya ´ntierraron la Sardina, la Cuaresma ´ntró al galope y tendremos qu´aunar... la sangre non s´alborote. ¿Cómo pasásteis les fiestes?¿Chásteis na forna boroñes?¿Comiésteis munchos fixuelos?¿Fixisteis les picatostes con güevu, miel y mantega?.... ¡Mialma que tarien bones! Vos rellamberíeis de gustu con les fuentades atroces d´arroz con lleche y natilles, qu´al colase pe ´l gañote, pa que no s´empapizara el campanín ¡redemontres!... con copines d´anís dulce el gaznate remoyóse. Si llenásteis bien l´andorga, y non tuviésteis dolores de ventrisca, o calentures... nin apuru de calzones, nin agua de Carabaña pa llimpiar les digestiones, bienaya cuanto comiésteis llenos de satisfaiciones. 

Abondos años com `isti pid´a Dios vos proporcione, y que veáis a los fíos con salú, pan y doblones. Aparte d´eso, dexaime que vos fale d´otres coses: tuviemos una semana sin respirar  los polmones, con fríos, ñeve y xelades na ciodá, nó os praos, ne´l monte; blancu´l teyau de les cases, blancu él suelu con alfombres de ñeve hasta les rodíes, blanques y blanques les copes de les palmeres del parque, de les ilesies, les torres; blancu´l muelle y los xardines, les lanches y los vapores... Con tantos trapinos blancos como baxaben día y noche, apetiguñaos n´el aire, texien mantes llechoses qu´al facer el arcu iris so lluz nos güeyos rompióse. Y el copleru, per cansau, dexa de descurrir coples.. Adiós... Conservaibos bien; de mió familia expresiones... y pa San José, el tu Santu, nuestres felicitaciones. Moisés García y Fernández Vallín. (Gijón 1877-1969) Antología del Bable. Tomo II.-

La Fontina

´Nel prau, onde Xico Les vaques llendaba Había una fontina, De cantu de xana Qu´empeñu les mates Tenín en guardala. El mozu al pie d´ella Echau á la llarga; Mirab´, allá lloñe, Llucir como plata La villa, co´l besu Del sol al dexala, Y al probe, mil suaños Nacín é nel alma. Cuando él fora ricu, Faría más alta la casa sos padres, Pondríala muy guapa Pa vivir con ellos, Qu´él non los dexaba. Por dir á la villa; Y á la so fontana Diría munches veces A dáse importancia. Baxaben les sombres, Baxaba la calma y Xico despacio Volvía pa casa. Solo la fontina De cantu de xana Qu´empeñu les mates Tenin en guardala Rompiendo los suaños Lloraba, lloraba. Una tarde, Xico Marchó pa l´Habana, Non yera d´aquelles D´aquelles de plata; Non yera de suaños, Non yera de calma. La mar taba fosca Y el viento bufaba La xente´n villa Corría alloriada A ver s´iba él barcu Marchar pa l´Habana; Y dábayos risa Mirar tanta llárima. ¡En vez de sentíu Tenín una llábana! ¡Ay, Quiquín, mió Quico, Mió Quico del alma! Y el probe non pudo  Decíi más palabra. Qu´apretai un ñudu La voz´na garganta. Baxaben les sombres. El vientu les fala; Los padres de Quico Volvínse pa casa. Y al pensar´nel fíu. "Nel fíu del alma" D´entrambos les llárimes Moyaben la cara. Y la fontiquina  De cantu de xana Qu´empeñu les mates Tenín en guardala Como los probinos Lloraba, lloraba. Quico vieno un día ¡ Tan ricu que plasma! La villa ´sperábalu Vestía de plata, Como aquelles tardes En que él la miraba Lluciente co ´l besu Del sol al dexala. ¿Yera suañu aquello?....Y quico amoriaba ¡Dormíos los sitios, Los sitios del alma!..... La xent´na villa Don Pancho lu llama, Y él diba vestíu, Vestíu de caza. A ver los sos sitios, Los sitios del alma; Y allá muy adientro De Quico lloraba La probe fontina De cantu de xana, Que ¡ay, non! non pudieron Les mates guardala. Ricardo García-Rendueles y González. Antología del Bable. Tomo II.-

Una baga mar

¿Que cuándo foy? 

Un día desapués d

e la puesta del sol, 

caundo ´ntamaba 

a ´ngolvese l´aldea

 ´n un válagu de 

sombres de la

 mar a la tierra. 

Pel ámbetu del cielu 

n´esclucaba una ´strella. 

Un aire calentacu

 baxaba de la sierra 

tan pesau y tan gordu, 

qu´un apenes pudiera 

alendallu, pos dábai 

picor ena gorgueilla, 

hinchábai les coraes, 

mariábai la cabeza, 

apusllábai el fégado, 

cociai la redeña... 

Yera un aire de forno 

qu´engruñaba 

la fueya del árbole, 

y turriaba la flor 

na planta mesma. 

Tremaben los tapinos,

 tremaba campera, 

y entamaba ascuchase 

p´hacia  debaxo tierra 

un ruxiu temerosu 

como si ´n senu d´ella 

gurniaren los resollos 

que de la mar na vera

 retiñen agüerando

 que vien una turmienta.

 Per tou cuantu algamaben 

los güeyos ´n hora aquella, 

q´atapecía, la mar paecía

 una caldera trevolgando,

 ferviendo, con patina 

´zulienta o negruxa;

d´afecho taba toda cabrera, 

gufando en sin cachines, 

espumariando  llercia,

 com ´unu q´arremanga, 

roña, cuspe y patexa.

 Una franga, de sópitu,

 al llongu de l´oriella, 

llonga cuantu´n columbra,

 y ampla com´una llegua, 

fo henchipando, erguiendo

 más trémbole, más ñegra,

 el llombu de salmoria 

cada vez más regüelta. 

Cuando ya ´lzaba tantu

 como ´l castru de peña,

entamó una rexaca rabionada, 

tremenda, que llevaba 

arrastrando p´adientro

 cuanta areña teníen 

les covacxes y´l 

afirmau de piedra 

truquiando regodones, 

pero con tanta fuercia 

que non más con oyelo

 temblaba la redeña.... 

Lo mesmo que ´l carneru, 

cuando ta na pelea,

 dase atrás, toma furia,

 pa dir con más potencia

 la mochada ´l contrariu 

purri-i co la so testa

 ansi la mar; sonsácase 

un poco p´haza juera 

como pa coller vértu..,

 a so tiempu, fervollera, 

afumando espantible, 

henchipando la cresta, 

fasta que ya ´sclucando

 p´enriba la ribera, 

azótase rabiona contra

 él murial de peña, 

resálvialu y embúrriase

 furioa pe la tierra

 rincando campu, plantes, 

cases, ganau, facienda... ; 

quedando al riscá ´l día

 de la mañana ñueva, 

dende l´oriella ´l monte,

 una mar durmilienta, 

nun remansu tranquilu 

que fexo la marea, 

una ría que s´ña sobro

 lo q´antes yera felice pueblu,

 y ´gora ye una perdida güesa 

fundida ´nte salmoria, 

q´apenes se ximielga

 col xiblu de la brisa, 

quiciais porque respeta

 los enfenitos muertos 

que llexen sobro d´ella, 

y ayeri yeren xente del pueblu 

o de l´aldea que tapó ´l agua,

y güey... dieren ya a Dios

so cuenta.

Pepín de Pría (Nueva, Llanes 1864-1928) Antología del Bable. Tomo II.-

Carta de Perico a Carmela

Ye la fiesta del llugar

que tien per nombre Canzana,

pueblu muy afayadizu

fincau en una montaña.

Ya les campanes repiquen,

ya del tambor y la gaita

el xirigateru son

fai revuelvos en el alma:

ya gufen los volaores

y estallen pe la quintana;

ya los mozos y les mozes 

van á llevai á la santa 

ramos en llenos de cientes 

y rosques de pan d´escanda,

mientres embabucadina

Carmela la de tia Pacha, 

que ye la más pinturera 

y la más guapa rapaza

de cuantes tien el conceyu

y una llegua á la rodiada,

co ´l dengue de terciopelu

la cotilla colorada, 

unes sartes de corales 

que i arrodien la garganta,

pañuelu espintaraxau, 

zapatos, saya floriada 

y blanques medies de filu;

en la tenovia sentada,

arremellando los güeyos,

deletriando tá una carta

que i unvía d´allá los mares.

el só Perico de Xuana, 

y que lletra más ó menos 

d´isti modu n´ella i fala:

“Carmelina la melguera, 

“la de mios sospiros ama,

“la que me tien  en sus güeyos

“prisioneres vida y alma;

“mándesme que yo te cunte 

“too lo qu´ aqui me pasa, 

“si m´afayo n´estes tierres,

“si so calor non m´abrasa, 

“si son guapes les rapaces

“y hay dalguna tan melgada 

“que con veyures y  dengues

“fai que quiera enquillotrala

“olvidandu el to cariñu…..

“¡Ay! non por Dios, calla, calla,

“que mal me facen tos dudes 

“y me sollivien el alma

“pos les moces que aqui hay

“puestes n´una  enfilandrada

“dierales yo xunto á ti

“per un ñisu ó una corbata.

“que nin siquiera  esto valen.

“comparaes con to gracia.

“Yo solu n´el pensamientu

“traigo tó imáxen  fincaa,

“y d´ella non me aseparo, 

“porqu´ella á mio vida salva

“de llaceries y de males

“piores qu´el trasgu y la guaxa

“Si me vieres, Carmelina, 

“riyéreste de mio facha:

“con calzones coloraos, 

“centurion  con espingarda,

“morrion muy  arrellumbrante 

y una casacona llarga

“que m´allega á los calcaños

“y les garies m´atapa.

“Pregúntesme si son munchos 

“los trabayos qu´aquí un pasa 

“en esta guerra del Diaño

“donde un home á l´otru mata,

“sin arreparar que son 

“fueyes d´una mesma  rama.

“¡Ay! Mela de miós entrañes,

“non pienses que ye folgancia 

“nin tararira ximuestre

“ó dalguna moxiganga,

“lo que sofrimos los probes

“qu´ estamos n´esta esfoyaza:

“Si vinieres per acá

“y  atopáreste en batalla

“con esta xente de Xúdas 

“que el Degorriu la llevara, 

“pudieres ver  per tus güeyos

“cuanta pierna se taraza,

“cuanta costiella se quiebra,

“cuantu brazu s´esmigaya,

“cuantu llombo s´estocina,

“cuanta corada s´arranca,

“cuanta mollera se fiende

y cuantu cuayu se maya.

“Entre fumu  y polvarea

“paez qu´isti mundo s´acaba

“y nin s´oyen les trompetes 

“nin la voz del que nos manda:

“solo s´ escucha un xibliu

“que mete el  fuelgu n´el alma

“y dempues d´ esti cotarru

“los quexidos  que allí llacian

“homes tiraos pel suelu

“ximielgándose con rabia

“entre só sangre y diciendo

“¡Ay madre de la mio alma!

“Y si per  milagru santu

“saques tó pelleya salva, 

“con fame, calor y sede

“volvies á coyer la marcha

“y aguíxente pa otru llau

“donde ye peor la danza.

“La Virxen del Cármen quiera 

“llevame aina á mio casa, 

“pos son munches ya les ganes 

“que tengo de ver tó cara 

“y de platicar contigo

“sentaos n´alguna llata,

“ó coyéndote les manes

“á la par de la ventana;

“y pos prontu ya será 

“la romería en Canzana, 

“has de llevai á la Virxen

“de mio parte una cuayada

“y rezai cuantu t´avague

“á tan millagrosa santa,

per isti probe rapaz

“que te quier con toda l´alma.

“Adios Mela la melguera 

“la de mios sospiros ama,

“la que me tien en sos güeyos

“prisioneres vida y alma, 

“non i pierdas el cariñu

“ a tó 

Perico de Xuana.”

……………………………..

Carmela, ensugando apriesa 

perlines que pe la cara

tien esparcíes, cual rosa

con goteres d´orbeyada,

besa les lletres del nombre, 

fai dobleces á la carta

y tovía empapiellando

é n´ el só la guarda.

Atanasio Palacio Valdés. 

Revista de Asturias- científico-literaria.

Oviedo 5 de Octubre de 1878.-