Malleza-Brañas
Paxaros ya paxaras
El páxaru pintu, curbatina roxa,
la páxara pinta de picu raxón,
fixenum cun xeitu el sou nialín
na groma d´un teixu verde verdeirón.
Tenían sua casina aquetsa parexa,
cantaban cuntentus cun un guapu son,
fonun a bañase nuna funtanina,
muchábanse un poucu, puníanse al sol.
L´augua yera tsimpia, tiróuse ´l pintín,
víu una muruca ya samarguchóu,
un gatu muntés espurría la pata,
garrólu, cumíulu cun plumas ya tou.
La páxara pinta que tou lu víu,
la páxara pinta de picu raxón
alburutóu ´l vatse cun chorus, cun queixas,
cuntandu las penas del sou curazón.
“Adious compañeiru, curbatina roxa,
adious, adious mante, adious micu amor,
adious guviquinus que nun gurareimus,
nuesus paxarinus nun nacerán, non”.
Aflixida, triste, ¡probe paxarina!,
la páxara pinta de picu raxón,
ximiendu, ximiendu….. díu la bucaradas
al tsau d´aquel teixu verde, verdeirón.
Train las tsavanderas papolas marietsas,
palombas turcaces cural de xardón,
tordus, verdeirones, curales d´umeiru,
tamién viuletas-tsi truxu ´l gurrión.
Plumas culuradas train las pimenteras,
ya las carbuneras carqueisas en flor,
cacafús, cuchorlas, suas pluminas prietas,
d´outrus culurinus martín pescador.
Truxu l´escribanu guapas margaritas
ya las andurinas cun muitu dulor,
etsas ya cerricus fixenun curonas
cun plumas, papolas, curales ya tou.
Fixu ´l picatueru una furaquina
choran los xilguerinus ya abarcuxador,
choran los curquietsus, choran azulexs,
cantándu-tsi ´l duelu chora ´l ruiseñor.
Brañas d´antanu ya xente d´anguanu.
Eva González Fernández- Roberto González-Quevedo González.
Comentarios
Publicar un comentario