Alles (Peñamellera Alta)
Los bollos de Pascua
Adientro d´una ventana
toa de vidrios rodiá,
que llamen escaparate
(y non dexa escapar ná)
vense per riba, per baxu,
pe la vera y p´hacia allá,
uno duces, que barrunto
son duces d´autualidá.
Llámenlos Bollos de Pascua;
y seránlo en realidá,
anque apuesto a que la pastia
non ye fariña amasá.
Oí dicir a la xente
que yeren de “mazcapán”.
Y si son de pan mazcao,
(que non debe ser verdá)
d´aproballos tan siquiera
llíbreme la Caridá.
Y anque sean como sean,
bona disferencia va
de esos bollos a los bollos
que me daba la mio ma-
drina, mientres que juí su afiáu
o mientres que juí rapaz,
Aquellos si qu´eren bollos,
pero bollos d´amistá,
con más cuernos que la vaca
que tien Mingo en ´ a corrá;
pero agora ye la moda
de dar pastia debujá,
y cuando fala la moda
diz la xente: ¡Bien está!
Por eso les señorites
punxenon montera ya,
y si non gasten calzones
y polaines y guiá
ye que non vieno la moda;
pero ….. entavía vendrá.
A. P.
Lletres Asturianes. Nº 60.
Caldones 31 de Julio 1857
Sabrás amigu Pepito,
Pepitu amigu sabrás,
Como recibí tos lletres
Quesperaba ha bona ya.
Enfadau me tenís
Comun cuélebre, rapaz,
Al ver quen tampocos dís
Me pudieres olvidar.
…………..
Desque vine de les Caldies
Y non te vi pere cá,
Pregunté ¿ul mio Pepín?
¿Qué se fexo? donde está?
Entos cuntome un amigu
Cal serviciu te marchás.
¡Triste de min pel mundo!
Al serviciu fue el rapaz!
Y sin poder remediallo
Berrides empecé á dar,
Que oinse del Mataderu,
De Perlora y de Candás,
Y quiciabes lo habrá uido
Dalguno de mas allá!
Pero Dios q. no ye bobu
Quítalo como lo dá,
Y bien lluego me dió modu
De que yo me consolás.
Vino to hermanu Floriencio
Y al veme ansina llorar,
Preguntome que tenía,
Si ma flixia algun mal;
Cuntey el pasu, muchachu,
En sin poder alendar
Que ma fogaben les llagrimes,
Mas gordes que mió verdá
Que mazanes del Infiestu
O cirgüeyos de San Xuan,
Sacóme lluego de casa
Que habia calor demás,
Y sentaos á la sombra
Debaxo de la figar,
Sacól bote, echó un cigarru
Y diome amín de fumar,
Y empezó desta manera
A quereme consolar.-
-Non ta flijas manjaderu
Caunque al serviciu marchás
No lu han de comer los llobos
Ni la fuina, ni el milan.
Vilu yo ha mucho dís
De los Madriles pa cá,
Enun pueblu grande y guapu
Que llamen la Capital
De los llugares y villes
Quen toda Castia ay-
Llevaba morrion con funda
De ule o de cordoban,
Y una lebita muy maja
Con botones de metal,
Un cordelicu doradu
Enrrolladu al espaldar
Yun collarin coloradu
Como si jues un reitan:
En fin compadre esta fechu
Todu un brabu melitar,
Pos lleva con gran donaire
Los arreos de matar,
Y mas fiereza nel rostru
Quel mesmisimu Roldan.
…………
Parose aquí el buen Florenciu
Que tamien cansa al falar,
Y yo quedé contenticu
Al ver q. non te va mal.
Sabrás q. la mi Ruperta
Por fin cargoseme yá,
Gracies á tres llabatives
Que y echó el pollin de Xuan,
Pollin de gran llonganiza
De superior calidad,
Según los pedos y respingos,
Que al sentíselo colar
Fizo la nuestra Ruperta
¡Dios nos la libre de mal!.
Aquí me tienes metidu
Jechu un solenne manguan.
Del prao á la carbayera,
De la guerta al palomar;
Esperando calgun día,
Marche isti picaru mal,
Que me tien fechu un bederre
Sin poder prestar pa ná.
Vino Florencio el Domingo
Jartomonos de platicar,
Y despues q. Gedeon
Nos compuso de xintar
Montamos ena so burra
Y escapamonos á Granda
A ver les moces danzar.
……
Xente de Xijon había
Y no poca en mio verdá,
La Parrocha, Mariona,
Les de la mi vecindá,
Guadalupe y otres munches
Corriendo daquí pa llá,
Bailando la jiraldilla
Con muchu garbu y compás.
…
Cuando diba escureciendo
Bolvimonos contra cá,
Muy triste y desconsoladu
Al ver a todos gociar,
Entanto que yo probete
Solo me toca mirar.
Dicen que el musicu vieyu
Solo conserba el compás.
Y ahora amigu Pepito
Hasta otra vez queda en paz,
Que aunque tovia me queda
Contigo q. platicar,
Ya non ye migaya ceo
Y tengo munchu ca rendar,
Y quiero acabalo lluego
Pa despues coyer el pan.
Rafael.
Comentarios
Publicar un comentario