Lagos de Saliencia (Parque Natural de Somiedo)
Cartas á Pepe Coroyu
Hoy cambié de domiciliu, amigu Pepe. Convidárenme á parllar dende ´l púlpitu de El Oriente, y como yo en esto de dar la lluenga malamente ero una especialidá, teniendo corru y algo con que moya ´l gargüelu, non aguardé á la segunda; puensi ´l pucheru míu á cocer na cocina ´l Pueblu, y dimpués de sopla ´l juéu y dexalu jirviendo como Dios manda y mi da á entender, viénime al Oriente, non á preparar platos juertes, que si yos gustan, cocineros tendrán á bondu pa esi menester. Vengo á dabos un entremés suavín, y si la mió cabeza diera de sí algo tan del gustu de los letores como e l´ intención, así Dios me salve si non habíés de chupabos los didos de gustu.
Gachupín de Mañanga, desimule po lo entremetíu, anque e cosa que da ´l oficiu, non está demás tené la fineza de pedíi perdón por metese en so campu, sobre tou siendo él un revisteru que dá el ole y jaz las cosas con tanta agudeza y saleru, y cunta que non adulo, que bien notoriu e que esi lujo non se gasta ´n mió casa. Porque sabía que tien bastante que jacer co las romerías de Llanes y non puede acordase de nosotros nin de Santa Ana, la de Naves, jágalo yo de güen gana, entamando por dicir que anque presumo de home de prló y rapaz formal, canté y bailé y rejinché jasta enronquecer, co lo que dí fe de ciertu á un refrán que deprendí en monte l´otru día: “el que con llobos anda, á agullar apriende”, el cual refrán non lu discurrió Sancho Panza, que diólu el meollu de los homes de nuestra tierra, que, cuando llegan á vieyos, güélvense más socarrones y más defíciles que toos los Panzas que hebo n´ esti mundiu.
Anque non ti diga quiénes son los llobos de la mió camada, direti lo que hicieron, al pie de la letra, de como habíanlo prometíu, y eso que non repartieron programas.
La víspera estevo un pocu desanimau el negociu por mor de Santiago que nos llevó la xente á Posada. Sin embargu, pe la noche componióse algo na Flor de Naves, co la concurrencia de Rumaldo, Xico Gandaya, Xuan Matasiete y yo. Cantamos y bailamos, y anque estábamos solos, como dicía ´l gallegu, non echamos de menos l´orquesta, que de pistón era la que formaba Xuan, repicando los vasos, Rumaldo, dándoi al balde, que jacía de tambor, y Xico, tocando la guitarra ´n palu l´escoba, que non paecía sino que los mesmos demonios habían veníu del otru mundiu á char una cana ´l aire. Eso, sin cuntar la mió garganta que, mal añu pal diablu, si na vida hizo gorgoritos nin repicó la voz tan pe lo finu nin tan á pelu, como se pué ver.
Juime á cortexar á Faro
en casa de la Temprana.
Por munchu que madrugué
amaneciómi na cama.
¡La Soberana!
En tou ´l conceyu de Llanes
no hay fiesta como Santa Ana,
nin cara más pelegrina
que la que tiene mi dama.
Non i faltó á la copia más que extendese un poqueñín más pa dicir que pe la mañana jartámonos d´echar maldiciones á los músicos que que nos vinieron á quita ´l sueñu ´l alba con una marcha fúnebre de so invención, y si non yos echamos más que maldiciones, jué por aquel del qué dirán y non por no tener á mano que.
Hebo misa solemne con un montón de curas, procesión y sermón que predicó unu que i llaman don Jenaro Cuervo y que e catredáticu de l´escuela onde deprienden los curas, por ciertu que jabló mu bien sin acordase pa mal de los indianos, por milagru e Dios, co lo cual, y con non jacer apavientos nin metese en jonduras que caen juera del so ministeriu, demostró que e home de valía, que merece la pena de oílu en cualquier parte con respetu y atención.
Hebo fabada con acompañamientu de morciella, jocicu de gochu, oreyas con llacón y arroz con lleche. Como el platu era juerte estuvimos en tenencia jasta las tres, á motivu de la digestión que jué amenazada ó amenizada, como se diz en señoritu, po la banda los gallegos y l´estampíu de los cohetes.
Pe la tardi y la tardina hebo lo que hay en toes partes onde non viven las panas: baile sueltu y agarrau, por bula especial de mió amigu Rodiles, sidre y cierveza jasta dexalo e sobra, y sobre tou unas mozas, tantu de juera como de dientro ´l pueblu qu´esmechaban.
Non sé si sería pol acaloramientu la cierveza; pero lo que sé diciti é que hebo algunos momentos en que mi paecía ver los castaños del Polleru bailar al son de la música, y eso que po l´aparencia ya pasaron los probes de la primera juventú.
Pe la noche pasóse la borrasca á la carretera, onde durá jasta que non hebo patas que char al aire nin didos pa dar las castañuelas, Novedá non la hebo, que yo sepa, como non sea que Canterón trexo tou ´l día la boína derecha.
Non ti digo más. En custión de moceríu non hay que jablar; jaz más d´un mes que non hay pregones. Barrunto que e porque non se presenta güena la collecha ´l maíz por mor del agua. En cambiu hay una plaga e yerba que vamos á venos negros pa consumílo, po lo que sube ´l preciu ´l ganau que e un escándalu.
La collecha e indianos baxó esti añu bastante. Y siéntolo po los puros; pero alégrome, mialma, po las mozas,que tienen que andar á lo que pinta.
Desimula po lo enrevesau, y manda á to tocayu.
Pepe el Malatu.
El Oriente de Asturias. Llanes, 1º de Agosto de 1908. Nº 1209.-
Comentarios
Publicar un comentario