Llamas de Grado y Teixéu (Grado)
A Don Victor Saenz.
Diz un refrán cstellanu:
que “la salú non s´arrienda”.
¡Ay, Victor!, por mió desgracia
ye la verdá pura y neta.
Aquí me tienes, queridu,
panza arriba so la fueya,
cavilosu, enguruyau,
como llagartu e´na cueva,
con el pasa-pan tomau
com´el Puertu cuando nieva,
sin dexar colar migaya
q´al estómadu de fuerza.
¡Quiero caldu?! … Por amigu,
de tal modu se me pieslla
el condenáu gañote
q´al llegar una gotera
a la nuez (que ye la cáspia
de la manzana que Eva
taragañó a Adán)
non entáme a da´la güelta
con un dolor de vidayes
q´escalabrau me dexa.
Sopes, fabes, fariñes,
anque gorollos non tengan,
solo a mir´les m´atrevo
afumar en ´a escudiella.
Nunca cuidé que de fame
dar les boquiáes pudiera,
hasta agora q´el portazgu
paga la escupita mesma.
Dícenme que son enginies,
que ye la mayor llaceria
q´en el gargüelu d´un probe
Barrabás ponéi pudiera.
¡Ay, Victor! San Bras gloriosu
te guarde, libre y defienda
d´estos malditos gorollos
que fechos una pesllera,
por non decir tarabica
calabía o pasaera
dan en presllar la garganta
sin topar llave maestra
con guardies que pueda abrila
pa que ´l agua colar pueda.
Non hay remediu dalgunu
que yo, amigu, non fixera,
nin yerbatu en´ a botica
q´a lo que sabe non sépia.
Mas q´el Misal tien de fueyes,
y non te miento en concencia,
tengo yo de papelinos
en q´el mélicu receta.
Ya punxe mas cataplasmes
q´arrugues tien una vieya
en el rostru de la cara
cuando pasa de noventa.
De les gálgares que fixe
perdí, queridu la cuenta,
pos paezco una carraca
siempre co´la boca abierta.
De dar tantu perdilubiu
tengo pulgando una deda
y un calcañu en carne viva
que me duel, pincha y resquema.
Estoy como ves, mió probe,
d´afechu fechu una plepa,
como gaita sin roncón,
o punteru sin pajuela,
como muérganu sin fuelles,
como pianu sin tecla,
como flauta in furacos,
como trompón sin cabeza,
como vigulín sin arcu,
como ´l arcu sin la cerda
o clarinete sin llaves…
ó coxu sin la muleta.
Por lo cual, queridu amigu,
por mucho que yo lo sienta,
non pueo dir a escuchavos,
ya que tocar non pudiera.
¡Oh!, si esti mal del degoriu,
que poco a poco m´afuega,
pos cuanto mas lu afalago
pa que sane, más m´aprieta,
me dexara por dos hores…..
com´un galgu, a la carrera
diría, de les Antorches
a oyer la marcha soberbia.
Dái, en acabando, a Carlos
la más franca ´norabuena,
y que a no estar en´a cama
yo en presona se la diera,
que ya sabe que los músicos
queremos a quien profesa
cariñu al arte divinu
q´alivia ´l alma de pena.
¡Divinu! pos pon al home
de Dios en correspondencia,
cuando en dulcísimu cantu
el corazón fai de llengua.
Esto digo porque hay xente
q´en conociendo una negra
y deprendiendo una danza
de memoria co la lletra,
ya se crén ¡Valgalos Xudes!
con tanto saber y cencia
como ´l que empezó de neñu
y a peinar canes empieza.
De ciento…..noventa y nueve
dan mil taches d´una orquesta,
cuando en vez de buen oídu
solo tienen bona oreya…..
Non quiero seguir, queridu,
pos m´enrita esta materia
y d´ escribite egachau
tengo algo de cerviguera.
Po lo mesmo non contesto
a Fermín el de Canella,
q´á estar bonu ya i daría
a la so carta rimpuesta.
Mil coses a los amigos,
y tu ya sabes t´aprecia
quien queda faciendo gálgares
pa sanar……..
Teodoro Cuesta. 9 de Febrero de 1870.-
Teixéu. Localidad del concejo de Grado y perteneciente a la parroquia de Santianes. Está situada a una altitud de 400m. En la actualidad cuenta con una población aproximada de 13 personas y 10 viviendas.
Comentarios
Publicar un comentario