Ruta: Bello-Pico Renorios-Cascada de Xurbeo-Santibáñez de Murias
Textos:
-Alma Asturiana.
Alma Asturiana
Tá tristi, muy tristi l´aldea ´sturiana;
quedóse ´n sin vida; quedóse ´n sin alma.
Non óyese apenas el gritu que lláncia
el mozu qu´atútia, que lloñe asonsaña.
La neña cuidosa, xentil, per galana,
ya tá la probina d´amor solliviada,
por naide a so vera ni un cántigu ´ntama.
¡Tá tristi, muy tristi l´aldea ´sturiana!
El sol que ´n día relluma que plasma,
paez que d´un soplu so fuegu s´apaga;
les flores golioses, l´arume i-os falta;
el aire tá quietu, non muevi la rama;
los páxaros, mudos, non canten al alba;
la fonte y el ríu chirloten el agua….
talmente lo facen con pena y galvana.
Tá tóo en silenciu nel eru, na braña;
non berra la oveya, non muxe la vaca,
non sona el turuyu, non sona la gaita.
¡Morrió ya d´afechu l´aldea asturiana!
¡Quedóse ´n sin vida, quedóse ´n sin alma!
Los cuentos qu´n día la güela cuntaba
sentá ´n el escañu, hoy naide rellata.
Non vése ´l “Nuberu”, non vése la “Xana”
bañase ´n el ríu, fuxir per el agua;
non vése la “Güestia”, la Santa Compaña,
rodiada de lluces roldar la quintana.
¡Morrió la leyenda, morrió ya l´Arcadia;
matóla ´l progresu qu´Asturias arrasa.
Fendieron los montes, fendieron la braña!
fumeru qu´afuega, cuerre per la campa;
el ruidu aturulla, ruxidu que plasma
alborota ´l valle que tranquilu taba.
El home avariosu la vega ´smigaya
rincando del fondu tesoros que guarda
nel senu escondíos la tierra ´sturiana;
¡pensando dai vida arrinquen-i el alma!
………………………….
Tá solu ´l copleru, en so dolce fabla,
nel bable fermosu les sos penes canta;
so cántigu tristi el vientu lu arrastra
y llévalu y trailu del lleru a la ´staya,
y fuxe con elli per entre la rama;
el ecu repuende con voz quexumbrada:
-Non cantes, copleru: dexa la cantata;
¿non ves que tá tristi la ´ldea ´sturiana?
¡Morrió la to Asturies! ¡Morrió la to Arcadia!
¡Quedóse ´n sin vida; quedóse ´n sin alma!
Pachín de Melás.
El Oriente de Asturias. Llanes, 27 de febrero de 1926.
.JPG)
Comentarios
Publicar un comentario