Ardisana y playas de Troenzo y Borizu (Llanes)
Textos:
-Probitina.
-La fontina.
Probitina
Allí taba sola,
¡qué guapina estaba!
So cara paecía la cara d´un anxel
con blanca mortaya.
ya sos llindos llabios
de coral, non falen
cuntándome cosas, siempre contentina…..
¡Ay neña del alma!
¿Ye verdá que´l ánxel
qu´a la tierra baxa
fuxe a les altures utra vez contentu
porque Dios lu llama?
Abri esos güeyinos,
ábrilos, rapaza.
¿Cómo tú fuiste siempre tan alegre
pues estar callada?
Traes coralinos
puestos na garganta,
to pelo, tan negro como ´l acebache,
cuelga pe la espalda,
cuando fuxas lloñe,
lloñe a la morada
onde alegres cantan toos los anxelinos
dulce serenata
al mirar tos güeyos,
al mirar to cara,
¡qué farán los probes, al vete tan chusca,
al vete tan guapa!
Como yo ´nel pechu
¿sentirán la llama
del amor que fierve cual volcán eternu,
que xamás s´apaga?
Mírame y dispierta
sólo una migaya…..
¿Non dixist´un día, que resucitabes
si yo te besaba?
Y en sos llabios fríos
y en so llinda cara,
mil besos ardientes dexé nun menutu,
y non despertaba.
Miréla un ratuco,
¡qué guapina estaba!
Y aunque sonreía calladinamente
entre la mortaya,
¡aquellos güeyinos
ya non me miraban
y sos lindos llabios, tan coloradinos,
agora axelaban!
Juan Menéndez Pidal. (1861-1915)
Antología de poetas asturianos.
´Nel prau, onde Xico Les vaques llendaba,
Había una fontina, De cantu de xana,
Qu´empeñu les mates Tenín en guardala.
El mozu al pie d´ella Echau á la llarga;
Mirab´, allá lloñe, Llucir como plata
La villa, co´l besu Del sol al dexala,
Y al probe, mil suaños Nacín é nel alma.
"Cuando él fora ricu, Faría más alta
"La casa sos padres, Pondríala muy guapa
"Pa vivir con ellos, Qu´él non los dexaba,
"Por dir á la villa; Y á la so fontana
"Diría munches veces A dáse importancia".
..............................
Baxaben les sombres, Baxaba la calma
Y Xico despacio Volvia pa casa.
Solo la fontina De cantu de xana
Qu´empeñu les mates Tenín en guardala
Rompiendo los suaños Lloraba, lloraba...
...............
Una tarde, Xico Marchó pa l´Habana,
Non yera d´aquelles D´ aquelles de plata;
Non yera de suaños, Non yera de calma.
La mar taba fosca Y el viento bufaba,
La xente´n villa Corría alloriada
A ver s´iba ´l barcu Marchar pa l´Habana;
Y dábayos risa Mirar tanta llárima.
¡En vez de sentíu Tenín una llábana!
"¡Ay, Quiquín, mió Quico, "Mió Quico del alma"!
Y el probe non pudo Decíi más palabra,
Qu´apretai un ñudu La voz´na garganta.
........................
Baxaben les sombres, El vientu les fala;
Los padres de Quico Volvínse pa casa,
Y al pensar ´nel fíu, "Nel fíu del alma",
D´entrambos les llárimes Moyaben la cara.
Y la fontiquina De cantu de xana
Qu´empeñu les mates Tenín en guardala
Como los probinos Lloraba, lloraba.
.............
Quico vieno un día ¡Tan ricu que plasma!
La villa ´sperábalu Vestía de plata,
Como aquelles tardes En que él la miraba
Lluciente co ´l besu Del sol al dexala.
"¿Y era suañu aquello?..." Y quico amoriaba
¡Dormíos los sitios, Los sitios del alma!....
...............
La xent´na villa Don Pancho lu llama,
Y él diba vestíu, Vestíu de caza,
A ver los sos sitios, Los sitios del alma;
Y allá muy adientro De Quico lloraba
La probe fontina De cantu de xana,
Que ¡ay, non pudieron Les mates guardala....
Ricardo García-Rendueles y González. (Gijón 1867-1913)
Antología del bable. Tomo II.-
 |
Comentarios
Publicar un comentario