Braña Antolín (Cangas del Narcea)

Textos:

-La vaquera.

-Esqueicides.

-Alcordanzas.

-El perlindango.

-La braña de la Degollada.

-Del dichu al fechu.

Braña Antolín (Cangas del Narcea)

La vaquera

Pregueirón ya veceirina, 

pa con ellos la vaquera, 

guardaban el ganadín

en todas las brañas nuesas.

Na braña la Fontellada

taba la guapa Carmela,

yera la primera vez 

que-lly tocóu ser vaquera.

Que yera quedar na braña

por sí moscando viniera

dalgún res hasta los praos

ya estrozos nellos fixera.

Dixéra-lly la súa mama:

“Amira, la mía pequena,

muñe namás la túa parte

de la vaquina Morena.

Déxa-lly pal tenralín

dous tetos, porque nun seya

que nun se farte ´l probín

ya zanfoinu se puxera.

Mañana de pregueirón

va ´l tíu Xico de Florenta,

de veceirina  Marica 

ya serás tu la vaquera.

Amira muito  nun entren

pal predín ou Las Olleras,

tampouco a Los Llamaurenes

nin nas Tronconas, mía nena.

Nas Escuras ya ´l Quintete

nin nos Praos Nuevos, nun seya

que baxen hasta ´l Xixón

ya la cabeza nos duelga.

Bien sabes qu´habelas hailas

lladronas, ¡tu sos tan nueva!

Si te dormeces, monina,

esbardagüertos fixeran”.

“Fairéi  lo qu´usté me mande

pos gústame obedecela,

yá verá qué bien lo faigo

muito  allegre ya contenta”.

¡Probe rapaza! La sangre

salía cumo una caniella,

a voces cuanto podía 

glachaba d´esta manera:

“¡Triste de mi! Aiquí solina

muerro onde naide me viera,

qué pena  pa la mía mama

ya pal mieu  papa qué pena”.

Escuitóla desde lo alto

el tíu Xico de Florenta,

baxóu a saltos el monte

ya esflaquecida la alcuentra.

Atóu-lly el cintu por riba

ya buenas plantas cochera,

machacóulas con dous cantos, 

na ferida las puxera.

Nun murríu la rapazuca,

sanóu a escape Carmela,

foi la mechor vaqueirina,

veceirina ya brañera.

Pregueirón ya vecerina

después de muñir xubieran

conos bueis ya conas vacas

ya la outra menudencia.

Barríu cocina ya corte, 

llavóu ollas ya escudiella,

púxo-lly augua al tenralín,

peinoúse fixo las trenzas.

Truxo augua, tizóu ´l llume,

rapóu patacas Carmela,

puxo  pote na pregancia

ya al picu ´l  Campu xubiera.

Desde L´Oteiru amiróu,

nin rabu  de ganáu viera,

sazonóu los cachelinos

ya con lleite los comiera.

Aillí de Los Piornales

truxo una cándana seca,

cochíu ´l macháu pa cortala

ya díu con él nuna pierna.

Onde la palabra pousa. D´Asturias a Miranda. María Cueto Fernández - Xulio Viejo Fernández.-

Esqueicidas

Silenciu de las esquilas:

la cuadra quedóu vacía

ya nin siquiera d´un xatu

s´escuita la campanina.

Colgando d´unos gabitos

adormecen las esquilas

envueltas en telarañas,

nel silenciu esqueicidas.

Ya nesti mesmu  silenciu

despierta na alma mía

el recuerdu que me truxo

a esta cuadra güei vacía;

ya güelo a cuitu ya lleite

ya escuito  la campanina

d´aquel xatín que mamaba

mientras la vaca comía.

Pero despierto del sueñu

ya la cuadra ta vacía;

nada güel nin nada escuito,

solo veo las esquilas

que colgan de los gabitos

en el silenciu esqueicidas.

Onde la palabra pousa. D´Asturias a Miranda. María Cueto Fernández - Xulio Viejo Fernández.-

Vo facer una bandurria, d´un troncu de cerezal,

El restriellu  ye de texu,  el caballu de nozal,

El peyeyu d´un corderu, los tornos del recimal,

Les cuerdes son de pitina, el rabil ye de peral.

Vo cortar el rau a la yegua, pa preparai el sedal,

Y cantar enes velaes, pa que me den de cenar. -

Vaqueirina

María si vas al monti

Nun me traigas lleña verdi

Que tando sentada ´n tayu

Saltóme una chispa al dengui.-

Alcordanzas

Qué nun diera pol volvere

a vivire aquellos tiempos,

enque fora un solu día 

ya enque ´l día for pequenu.

 Tar outra vez na mía casa, 

ver los mious padres ya buelos,

los mious primos, los mious tíos,

mious vecinos, mious mayestros.

Patear aquellos sendeiros

entre cantos ya baldueira,

dir pol augua templanín

calzadina de madreñas.

Tar dentro d´aquella escuela

conos outros escolines,

yéramos un rebañáu,

güei apenas hai rapacines.

Vería los homes llabrando,

apencando a plenu sol,

ya las mucheres  llavando,

nel ríu ou nel canalón.

Las llargas tardes del branu

axuntaos conos calechos,

ou aquellas nuites xeladas

xunto al llume, bien encesu.

Pongo  por casu, ía fiesta;

de fixo, tarían los mozos

xunto al chigre del llugar

como partidu de bolos.

Cuando yéramos mocinas, 

por nun oyeos desbarrar ,

nun díbamos por onde ellos 

siempres, pol camín d´atrás.

Oyería tocar la cuerna

ya alborotar los chingarros,

vería emponer la vecera,

pol camín pindiu  ya llargu.

Estremalas pola tarde,

siempres nel mesmu llugar,

entremientras qu´asomaban,

nós xugando sin parar.

Chevalas pa la súa corte,

que nun faltara dengua,

ou si non de casa en casa,

por sí sobraba dalguna.

Que nun diera you por vere

el molín, moliendo ´l trigu,

el fornu, cociendo ´l pan,

dar la murga a los vecinos.

Los bailes naquel salón,

el pandeiru retumbando,

glachando  al son, las mucheres,

ya las parexas, baillando.

Ya hasta aquellas nevaradas

con faloupos cumo trapos,

llibrándonos de la escuela

fayendo santos macarros.

Faltábannos  muitas cousas,

que güei  todos las tenemos,

pero sei que l´allegría,

nun nos cabía no peitu.

Todo esto, ya muito más,

prestaríame tanto velo….

Seilo, sólo oía soñar

mas ¡ía tan fermosu ´l suenu!

Onde la palabra pousa.

María Cueto Fernández - Xulio Viejo Fernández.-

EL PERLINDANGU

Probes mariñeiros,

tristes ya afligidos,

las vuastras muyares

con outros maridos,

las vuastras muyares 

con outros maridos.

Unas colos curas,

outras colos frailes

ya las más hermosas 

colos capellanes.

Santina hermosa,

dame outru maridu,

porque esti que tengo 

nun duarme comigo, 

porque esti que tengo 

nun duarme comigo,

Calla, picarona,

mira cómo miante;

que duarme con ella

pero nun lu siante,

que duarme con ella 

pero nun lu siante.

El miou Xuan a Uviedu

foi pola mañana, 

dio-y la ventolera

ya volvéu pa casa, 

dio-y la ventolera 

ya volvéu pa casa.

La que vian de nuache

a La Fonte ´l Cantu

algo la entretián 

miantras llena ´l xarru,

algo la entretián 

miantras llena ´l xarru.

Por ir buscar agua 

a La Fonte ´l Cantu,

tuvo un chuquinón

ya escachóu el xarru,

tuvo un chuquinón 

ya escachóu el xarru.

Si tianes qu´ir sola 

ou salir de nuache, 

por si atopas bruxas 

lleva l´acebache,

por si atopas bruxas 

lleva l´acebache.

Tian el miou Perico 

una mala maña,

que si sal de nuache

vien pola mañana,

que si sal  de nuache 

vien pola mañana.

Tian el miou Perico 

una mala maña,

de mexar en fuau

ya cagar la cama, 

de mexar en fuau 

ya cagar na cama.

Unos que si asina, 

outros que si andando;

sin dar el mandil

nun hai perlindangu,

sin dar el mandil

nun hai perlindangu.-

La Braña de la Degollada

La Braña Baxa yera una de las cinco conas que contaba ´l mieu pueblu van muitos, muitos anos. Chamábase Braña Baxa porque taba yá cerquitina ´l llugare. Naquellos tiempos la xente vivía namás del ganáu, d´aquel ganaú del país, duru pal fríu. Daquella, los montes yeran tupos, concarbachales, piornales, acebales ya bedulares. Arbolinos por tolos llaos.  No llugare había taién muitas castañales ya conxales. Güei conas queimadas  ya subastas de madera yá nun ía lo mesmo.  Tovía quedan muitos bedules no monte ya castañales ya conxales no llugare, pero muitas secanon ya outras vendiénonlas pa madrea.  La xente nueva nun plantamos outras, polo que too va a menos.

En La Sierra ya nos montes altos, antias ya tamién agora, tenemos campos con comida a farta pal ganáu de cualisquiera clas.  Nos tiempos tovía más antiguos  puei que pasara nel branu  todita la familia ya d´eso oyí you cantare que na Braña de Pedrosu vivían los vaqueiros, que llou baxaran pal Castru dafeitu. Pero eso you nun soi quien p´atestigualo, lo que sí foi verdá yía qu´aillí vivíu  xente, pos  al pía de las cabanas  toditas son corralas ya las corradas namás  las alcuentras nos pueblos.  Nuna corrada d´esta Braña de Pedrosu tovía vi you  la pedricona del altar onde los antiguos vaqueiros  faían sous ritos, ufriendas ou lo que fora. Nun sei si agora ta aillí, pero cumo  you  conociénonla  toditos los que no mieu pueblu entovía viven. De los antiguos vaqueiros namás quedan  pa la parte de más arriba de La Braña de la Fontellada los restos d´una braña  nun sitiu que se chama  Las Vaqueras.  Mía madre conocíu a dalguna d´aquellas vaqueras, porque pasaban  d´Asturias a veces a vende-llys queisos a las brañeras de La Fontellada.  Pero los vaqueiros  namás venían dalguna vez pol ganáu que se perdiera.

Lo qu´acontecíu na Braña Baxa foi cuando yá todita la xente taba de quieto tol anu  no llugare.  Namás un home ou mucher, mozo ou moza  de cada casa diba de brañeiros. Xubían a las brañas a la tardecina esde abril hasta setiembre.  Las vacas baxaban  solas ou xubían al monte a buscalas,  muñíanlas pola nuite ya otra vez pola mañana.  Llevábanlas outra vez al monte ya los brañeiros baxaban pa casa, los tenrales quedaban nun corru tol día.  Na Braña Baxa, cumo  nas outras, alcontrábanse más ou menos docena ya media de cabanas ya outros tantos brañeiros ou brañeras. 

Entre las brañeras de La Braña Baxa había una mocina que yera la que llevaba la gala. Chamábase  Isabel pero toos la chamaban Sabelina, Cuntaban qu´enxamás se viera outra más parlladora, gayolera, allegre ya guapina como ella. Tenía gracia pa too, sin ella nun se faía nada no llugare nin na braña. Ella entamaba  los xuegos, tenía la voz como un xilguerín, polo que con outras cantaba na ilesia ya nas bodas. Cuando bailaban  una xotina, la dulzaina, los pollos ou ´l  baille chanu  todas ou cuasi tidas baillaban bien, pero denguna cumo ella: los sous pías meneábanse  cumo peonzas, cantara ya con aquella súa risa tan clara, tan cascabelera. Onde taba ella nun  s´alcontraban penas. Outramiente yera humildina ya muito cariñosa con tol mundu.  Los suos padres  teníanla  cumo a la nina de los sous güechos.

Pretendía a Sabelina Xuaco ´l de Xuaquinón ya tuvienon yn tiempu de novios. Casánonse  no mes de San Xuan ya las outras mocinas cantánon-lly unos guapos cantarinos de boda.  Quedanon  a vivire na súa casa, pos Sabelina nun tenía más harmanas  ya la casa de Simón sou padre yera grandona. Taba al llau de la tabierna, polo  que si dalgún forasteiru aparaba no llugare al vere a Sabelina tan guapa nun dexaba d´amirala.  Tamién la amiraba muito un cereiru  que pasaba tolos anos mercando  cera ya vendiendo  velas. Vendía tamién cuchiellos, fouces ya foucinas.  Cuando chegaba  siempres pasaba  la nueite na tabierna. La xente chamaba Marcos el cereiru, que yera un mozón  llargu ya forticón, muito  farfantón ya fachendosu. Naide sabía d´ónde yera nin si yera  csáu ou solteiru.  Conocía a todita la xente ya na tabierna quixo vende-lly una fouz a un home, pero l´home díxo-lly que cumo dicía que sabía faere de too, que-lly  la mangara. Aceutóu, l´home  foi pol mangu  ya Marcos mangóulu muito bien  ya dixo que naide  mangaba una fouz cumo él. ¡Buena la fixo! Esde aquel día naide lu chamóu Marcos el cereiru, pa toos foi Mangafouces.

Mangafouces gastaba una faxa negra arrodeada al sol cuerpu  ya metía nella  un cuchiellu. Cumu andaba sacando a veces el cuchiellu pola tabierna ya diciendo  qu´a naide se-lly ocurriera metese con él, tolos homes que diban a la tabierna  conocían el cuchiellu. A los poucos días de casase Sabalena apaecíu Mangafouces. Dixéron-lly llou quién se casara ya otras cousas que pasaran no tiempu  qu´él tuviera fuera.

El tíu Simón, el vecín del taberneiru ya padre de Sabela, cortárase ujn pía ya nun podía dir de brañeiru, por esde que Sabelila casara yera él el que diba de brañeiru. Xuacu trabachaba muito, pos principiaba ceo la yerba. 

Mangafouces, qu´un ratadín antias viera a Sabela dir pa la braña, foi a la puerta de Simón, que taba aillí sentáu cono pía nun tachuelu, ya entamóu con él muita parola. Dixo:

-Hola, Simón, ¿güei nun vas pa la braña, ho?

-¿Qué cuentas, Manga? ¿Cúmo voi dir de brañeiru si tengo no pía una cortadura que fix cona gadaña? Amira, chacu, nun sei si podréi ayudare al mieu xenru a segare la yerba.

-Vaya, home, vaya. ¡Cúmo siento lo que te pasóu! ¡You que tenía tantas ganas de pasare una nueite na braña si tuvieras tu aillí! ¡Aiho! Si fora un día ¿ónde podería pasare la nueite? Pos na cabana  namás tendrás una cama ¿ía asina uo non, Simón?

-Eso nun da más, home, pa outru anu vaita, nun parreiru entre la yerba duérmese  muito bien ya calentín.

-Pos a lo mechor pa outru  anu viesme por aillí. Pola túa braña ¿tenedes ablanos?

-Sí, home, si. D´ aillí trux you  esta primavera buenas guichadas.

-Pos amira, a la par que conozo  la braña  cortaréi unas guichadas ya unos mangos, pos na mía tierra d´eso nun tenemos.

-¿Ya cuála yía la túa tierra, chacho?

-You nun tengo tierra nin casa, siempres ando polos caminos esque m´alcuerdo. Escuita, Simón, la cabana ¿cuála ía, ho?

-La primera a mano dereita, nun tienes que perguntare a naide.

Parllanon outru pouquín  ya Mangafouces foi outra vuelta pa la tabierna. Díxo-lly al taberneiru  que-lly puera súa mucher  algo pa merendare, que s´alcordara que lu asperaban en Matalavilla, que diba p´aillí  a dormire, qu´al outru día daría la vuelta.

Chocóu-llys al tíu Blas  ya a la tía Catalina  que fora tan tarde p´hacia  aquel llugare. Podía faelo al outru día, ceo. Diénon-lly la merienda  ya al escurecerín soltóu  la mula de la corte, cargóula  ya cochíu ´l camín  de Matalavilla. Pero  al chegar a Las Cáscaras torcíu pal de La Braña Baxa, onde chegóu  de nueite piechu.  Atóu la mula  fuera del camín ya foi  esgachupáu  escuitando lo que pasaba pola  braña. Na cabana de Sabelina nun taba naide,  n´outra  cabana más arriba oyíu voces ya risas. Arimóuse  a gatuñas, amiróu  pal pequenu ya estreitu ventanu, víu  una cuanta xente na cocina ya escuitóu outra  vuelta la risa de Sabelina, aquella risa tan diferente.  Taba cuntando cosillinas ya al vere que nun acertaban, riía, riía.

Mangafouces volvíu  outra vuelta a gatuñas pa la cabana, xubíu la cumbe pola  parte de la corte ya ´l parreiru, llevantóu la pacha, como cuchiellu cortóu los bilortos que la ataban ya pol furacu pasóu al parreiru. Con cuidadín, como eslabón ya ´l pedernal chiscóu, encendíu la mecha, arimóu una fuechina de papel, encendiúse  ésti ya con él prendíu  la vela que llevaba  preparada.  Baxóu pola escalada de palos ya entrando na cocina sentóuse nel arca. Na mano tenía ´l rechu que viera colgáu al llau del corru los tenrales. Asperóu  a escuras, oyíu parllar, venían con Sabelina outras mozas hasta que desapiechóu. Escuitóu  cúmo se despidían:

-Adiós, chachas, hasta mañana si Dious quier.

-Hasta mañana - respondienon  las outras mozas.

La casadina zarróu la puerta cona chave, cono farolín  que llevaba amiróu las vacas ya ´l corru  de los xantos.  Entróu na cocina. Mangafouces tapóu-lly  la boca pa que nun glachara. Ella, sin sabere quién yera, arrabuñóulu conas dúas manos cumo  una gata montesa  ya arrincóu-lly puñaos  de pelos d´a quella mala testa. Al vela que se defendía , cona cueta ´l cuchiellu  díu-lly  con todita la fuerza. Sabelina cayíu cumo si-lly dieran con un porru na frente. Entoncias, cumo ´l farol siguía allumando, cochíula, púxola na cama cono rechu, atóu-lly  los pías a la cama cono pañuelu  d´ él una mano, cono d´ella la outra. Asina, si espertaba del golpazu  nun se movería. Pasóu aillí  media nueite.  Al vela movese clavóu-lly  el cuchiellu naquella gargantina  que lo mesmo na braña  que no llugare cantaba cumo un xilguerín.

Marchóu  outra vuelta esgachupáu, nun zarróu la puerta. Foi p´hacia la mula, desatóula montóu nella  ya machóu  de la braña onde  tantu mal fixera.  Esta vez sí cochíu ´l camín de Matalavilla.  Empricipianon a dole-lly los rabuñones, aguichóu conas espuelas la mula ya chegóu a Salientes. Amanecía ya atopóu un home al que-lly  perguntóu la senda pa pasare pa Omaña ou Llaciana. Diba cona cara tapada cona faxona negra, díxo-lly al de Salientes que s´atopaba malu  ya que quería chegare  a súa casa ceo. Pol día  taba no monte, pola nueite andaba. Nun llugare onde foi a mercar comida preguntánon-lly cómo andaba tan arrabuñáu ya dixo que cayera  pa un zarzal  ya que-lly  costara caro salir d´él. Foi lo postreiro que se supo de Mangafouces.

El cuchiellu de Mangafouces teníalu espetáu na súa gargantina.  Baxanon los brañeiros al llugar, dalgunos fonon tras d´él. L´home de Salientes dixo por onde al ser día traspuxera pa los outros montes. La xusticia na braña, amirando ´l calabre, víu unas uñas de Sabelina xeretos de pellechu d´aquel animal, también puñaos de pelos de la súa cabeza que Sabelina-lly arrincara defendiéndose cumo una gata montesa antias de da-lly cona cueta del cuchiellu. Los xuramentos de los homes remesturábanse  conos choros  ya berríos de las mozas ya rapazas.  Baxánonla  nunas andas. Amortachánonla cona roupa de la boda ya chenánonla  de ramos de papolas. Taba guapina, muito guapa, pero súa boca tenía tristura, abarruntábase nella ´l miedu, la pena  que la probetina pasóu aquella súa última nueite. El tíu  Xuaco  nun volvíu  enxamás, nin sous padres tampouco, a La Braña Baxa, a la que desde aquella pasóu a chamala la xente La Braña de la Degollada. Onde la palabra pousa.  María Cueto Fernández - Xulio Viejo Fernández.-

Del dichu al fechu

¡Pa viella y pa caciplera

la madre del siñor cura!

Sobre vieya, regañona,

sobre regañona, bruxa,

sobre bruxo empertinente,

sobre empertinente una 

calamidá verdadera

que de sí mesma marmura.

Ye asina y non po los años,

anque la su edá ye muncha,

por estintu, por costume,

por temperamentu.  Apura

la pacencia  del más santu

de los santos. Nón ascucha

advertencies nin razones,

nin nada.  Cosa darguna

no i falta, gracies al Cielu

y tamién al siñor cura,

el fíu  que i dá de todu,

y maldiz de la fortuna,

del tiempu, de los achaques,

y non sali d´esta música:

Yera de noche.  Roncaba

la vieya un tantu fartuca

de les fabes de la cena

y el pan de corteya dura,

suñando despierta, viendo

debujarse ena penumbra

del cuartu tales visiones,

q´empezó a sudar de pura

señaldá; y ancendió un fósfaru

y con elli una veluca

de seu qu´estaba metía 

en un candeleru. Nunca

tal ficiera. Pocu a pocu,

sin  roídu y sin ayuda

de naide abrióse la puerte,

una puerte piquiñuca

con cuartarones,  y´ un pollu

llargu, sangrientu, sin pluma,

allevantando  el piscuezu

adoloridu, con mucha 

defecultá, entró temblando

y quexándose com´una 

presona.  Al velo la vieya,

ricordando la fegura

que i fizo el  fíu de la muerte,

lloca de mieu,  tropa, axunta

les sábanes de la cama

y´ el cobertor, y con furia,

feches un duviellu  tírailes 

al animal, que s´ asusta 

y esñala sobre la vieya,

que grita lloca y confusa:

¡Llargo d´aquí, puñefleru!

¡So, pitón, pal  cuartu l´ cura!…..

Quixera morrer, quixera

morrer, probe de mi nunca.

Don Venturo, que y´el fío

d´aquella mala ventura,

arrespondioi  dolcemente

una vez:  Naide lo duda.

Beati mortiu qui in Dómino 

morientur. ¿A quien asusta

la muerte, el duce descansu?

Puede creélo , la tumba

y el gran catre y non m´estraña

q´usté lu  apetecia.

                      Muda

quedó la vieya al oilu

desemulando  la furia

que i facía temblar, y dixoi:

-Oy, mi fíu¿qué fegura

tién la muerte?¿D´esqueletu

o de qué? Non la vi nunca.

¡Diz que trai una gadaña

al  costazu!

                    El siñor cura

arrespondioi:  Y´un pitón

zancudo,  llargu, sin pluma,

y  tou sangrientu. Cando entra 

en un cuartu, ye difunta 

la presona q´allí duerme

o está enferma. La pintura

d´ esqueletu con gadaña 

ye otra cosa.

            Doña Angustia

sospiró y lloró, clamando:

Quixera morrer.

                               Ascura.

Antoloxía  poética. Carlos Garcia-Ciaño Canto. 1925.-