Laguna de Arbas (Leitariegos)

Textos:

-Coplas dedicadas a las Cuagalles d´Arriba.

-La casona.

-Pa ver cúmo taba.

-De romería.

-Platiques de caleya.

La Reserva Natural Parcial del Cueto de Arbas se sitúa en el suroccidente de la Cordillera, al oeste el Puerto de Leitariegos y constituye el límite oriental del Parque Natural de las Fuentes del Narcea y del Ibias. Pertenece al concejo de Cangas del Narcea. La litología de la zona es variada pero principalmente silícea: pizarras, filitas, areniscas, cuarcitas y en ocasiones conglomerados cuarcíticos. En algunos puntos aparecen afloramientos de rocas carbonatadas: calizas, dolomías y mármoles, en niveles de muy escasa potencia pero de gran interés por su rareza en la zona. La elevada altitud del área, que va de los casi 800m de la confluencia de los ríos Molín y Naviego a los más de 2.000 del Cueto de Arbás, hace que dominen en el paisaje elementos característicos del modelo glaciar. Los valles son amplios y abiertos y abundan circos y cubetas de excavación glaciar que a menudo albergan lagunas o áreas turbosas. Aparecen además aristas glaciares y frecuentes depósitos morrénicos que conforman una de las mejores representaciones del modelado glaciar en las montañas del occidente asturiano.- 

Coplas dedicadas a los de Cagualles d´Arriba

-Bonas tardes, Rifayela.

-Santas ya bonas, tíu Pedro.

-Milagru tu por acó,

¿truxisti daque de nuevo?

-Non señor, vengo a espantar

la murnia dando un paséu

ya vengo a ver al miú Mingo

que, desque morréu sou buelu,

inda nun mandóu un rial

pa comprar un pucheiru.

-Pos que sías benvenida 

en mía salvación m´alegro

ya vou pagate unas copas

mientres me dices corriendo

lo que pasa por alló

con paisanos ya vaqueiros.

Siéntate cabo de mí

ya di si lu quies blancu ou prietu.

-Cumo lu queira vustede

que you de todo lo bebo

ya amás que traigo una sede

que nun sou a falar vierbu.

-¡Saca una xarra, Candiles!

-¡Allá va dientro un momentu!

-¡Xasús! que de güei nun añu

que te faiga bon provechu.

Bebi Perico tamién

dixendo “de güei en cientu”

Conque dime, Rifayela,

¿qué dousmil diablos fixenon 

los de Cagualles d´Arriba

nos Collaos a los vaqueiros?

-You-lly diréi  lo que saba

mientres m´alcance ´l talentu.

Escomenzóuse la conta

fará dous años ya mediu,

cuando un fichu de calzón,

que siempres anduvo llambiendo

las uñas cumo los monos,

fixo un foru ¡mal valenu!

con Don Paquito de Sierra.

Danos cachos de terrenu

no medíu La Veiga ´l Palu,

qu´antes chevaban n´arriendu

los vecinos de Cagualles

pagando, si you nun miento,

venti duros cada añu.

Ya ´l probín cuntóu de cierto

que yiba salir de probe,

ya quedóuse pouco menos.

Foi ´l casu que Mateo 

harmanu del contrateiru

axuntóuse con Elías

fichu de Xusto, el primeiru

que seique al diablu outru tuvo

ya si los tuvo, morrienon.

Ya ´l moiracín del Marqués,

qu´ía outru tal ya tan bonu, 

diz que tien milenta duros

que-lly tocanon no xuegu,

pode qu´antes de las nueces 

tenga ´l  bolsu ben lleixeiru.

En fin, axuntánonse todos 

los del sesu mas llispeiru,

subienon al campanariu

bramando cumo becerros.

Quieren tocar las campanas

ya apenas veían los mayuelos

d´enfurecíos  que yiban

cuando, de supetón, vieno

Xustón el de Covaleda

diciéndo-llyis:  “Vós tais ciegos 

tirade d´estos cordeles

que nas campanas tán presos

ya veredes cúmo rezumbian

a todos los cuatro vientos”.

“Tira Pin, tira Marqués

comienza tal cencerréu

¡dindón, dandín, xerabrieos!

paez que tocan a fueu”

Todu ´l pueblu s´alborota.

Salíu la Manca corriendo:

“¿Qué douscientos diablos pasa?

¿Ou resucitóu Chimeno?”.

Baxa Perico de Coque,

sube Manín ya ´l Pequenu

ya Clara de Casablanca,

la viuda del Cosmeno,

Fariñas ya ´l Texedor

ya todos los de Don Pedro,

Ridín, Cuxíu ya Carbachu,

Xuan Diez ya ´l fichu primeiru,

Palombu, Garríu , Tascón,

Baltasar ya ´l  Habaneiru

ya ´l cura ya ´l sacristán

ya ´l diablu que ´ande   con ellos.

Axúntanse todos, todos,

sin quedar rabu no pueblu.

Todos queiren falar muito

a naide s´entiende vierbu.

“¡Silenciu!- grita ´l pedanu……

qu´hai  que falar de gobiernu.

Chute ´l picu  dotu ´l mundu

ya sabedes Pin  lo que fixo”.

Relatóulo en dous palabras 

ya así que lo comprendienon,

volvienon  a alborotase 

muito más qu´ou primeiro.

Unu riesga la chaqueta,

outru  patalexa no suelu,

outros rechinan los dientes,

cumo quien llima un caldeiru.

Outros aprietan los puños

ya encorcoban el pescuezu.

Todos bufan ya reburdian

contra Pin por que tal fixo.

Ya nesto dixo Gabriel:

“¡Atiéndame todu ´l pueblu!

Nun val nada alborotase;

hai  qu´oubrar ya falar pouco.

Esti llugar foi mui ricu

ya ía ´l mechor del concechu,

pero quedémonos probes

por falta de bon gobiernu.

Yá falemos ayeri d´esto 

you  ya Manín ya ´l Pequenu,

ya escurriemos qu´esti mal

inda topará remediu

cochendo entre dous a Pin

cumo quien nada anda fayendo,

fartándolu bien de vinu

ya toucín asáu primeiro, 

ya oufreciéndo-lly lo que queira

pa que riesgue ´l procesu

que tien feitu con Don Paco,

ya esti que faiga outru al pueblu”.

Todos dixen “¡Axaxá!

Esi foi un bon acuerdu,

Que Pin por un bon enchente 

al diablu  vende ´l pellexu”.

Volve Gabriel a dixir;

“Entovía falta outru cuentu

que trai negociu  con alma

pa enriquecer al pueblu.

Nós tamos dando las yerbas

al ganáu de los vaqueiros

ya ellos, acuitando las tierras

ya praos de los de Cerréu,

amallandan nos Collaos

na Veiga ´l Palu paciendo.

Esto ía una perdición 

ben podedes conocelo.

Hai que mandar homes bonos

que tranten conos vaqueiros,

pa que muden las cabanas

xunto La Veiga del Mediu

ya si nun poden pasallas

masque nós-llys ayudemos, 

qu´ía negociu  que sirve

pa nós ya los nuesos nenos.

Si nun quixeran por bonas, 

vamos a mete-llys miedu

dixéndo-llys : pa outru añu

nun cuenten cono arriendu”.

Dixo entós la Feisuleira:

“Eso ben yera faelo

mas ¿quién pon la chueca al gatu?

Si güei dí

a nesti pueblu

nun hai nun home de barbas.

¡Quién volviera acó a míu buelu

ou al tíu Farruco Diez

ou a Perico del Concechu

ou dalgunu d´aquellos homes

que faían tiemblar el suelu!”. 

“¿Qué sabes tu, parllatana?

Si hai güei home nesti pueblu

que tien más barbas na cara 

que de yerbas tien Reciellu,

ya capaz a falar

más qu´un fraile llaconeiru………

¿Nun será Mateo  Calzón

home de barbas ya pesu?”

Onde la palabra pousa. María Cueto Fernández- Xulio Viejo Fernández.-

La casona

La nueite chegóu apaciguada ya silenciosa; sentíanse lllonxanos los sones de la danza ya ´l chasquíu de las brasas na foguera, mientras l´aire esparcía las mochicas hasta ´l cielu; con ellas esnalaban los deseos. La Lluna, redonda ya gafa, mirábase nel espeyu del mar. En La Casona, solitaria, encomenzaba a oyise baruyu cumo si daquién viviera ente las súas paredes abandonadas. Una culobrona queixábase amatagada na balsera, poblada de sapos, rezcayeiros ya arañones. Siempre qu´Adriano pasaba por aquel llugar sentía sensación d´apretación ya angustia. Paecía-y sentir la presencia de dalgo que lu dominaba; acelerábase-y la respiración ya una estraña frialdá invadía-y l´ alma ya ´l cuerpu. A caballo del Cuco, un ruan que comprara diba unos meses na feria de San Antón ya qu´él amansiara con paciencia ya cariñu, diba Adriano a tolas fiestas ya romerías, contentu de deixar el coche na cochera ya poder disfrutar del galope del ruan sin tener qu´esquivar la policía que siempre taba nel llugar más inesperáu pa mandalu soplar. Dende entós podía saboriar tranquilu unos culinos de sidra ya baillar hasta l´amanecer.

Aquella nueite, nun cabía en sí, diba, escapáu, camín de Naveces, a ver la moza  cola que tuviera nas fiestas de Pascua. Al pasar enfrente a La Casona, llugar que siempre-y infundía ciertu respetu, el Cuco dixo “non” ya non hubo forma d´arrealu. Agarrotáronse-y les manos, encomenzóu  a sudar fríu ya ´l miedu ya la congoxa  apoderáronse  del cuerpu del mocetón. Nun sabía qué facer, el ruan paróuse  en seco  ya nin  p´alantre nin p´atrás. Ya, de sópitu, viénose-y a la memoria  aquella historia que tantas veces-y oyera al sou buelu. 

-Nenín, los animales perciben sensaciones que nós enxamás sentiremos nin veremos.

Ya cuntába-y la desgracia de Ramiro, aquel rapaz de Samartín que cortexaba en La Mina.

“Yera un mozu valiente ya echáu p´alantre  ya nun tenía miedu a naide nin a nada. En cuanto tenía unas horas de vagar, apareyaba la súa yegua blanca ya nun tris daba en casa de Delina, una moza galana  que lu tenía encandiláu. La yegua yera miu mansa ya siempre lu llevaba a tiempu a tolos llaos  ya él premiábala  con afalagos ya un bon morral de cebada que-y daba tolos días.

Una nuite de San Xuan, después d´acabar la danza ya la folixa, cuando ´l  borrayu de la foguera alimentaba ´l deséu, el pá de Delina col ceñu fruncíu, fixo-y  una seña dura ya arrampuñó-yla de los brazos; metió la súa fía pa casa  sin da-ys tiempu siquiera a despidise. Ramiro colocóu un ramu  de lloreiru floríu  na ventana de la moza ya dio-y  espuela a la yegua pa que saliera  al trote, reprochándo-y al paisanu  que-y  quitara de los brazos  aquella flor de San Xuan.

Yá entraba la madrugada ya ´l silenciu encomenzaba a reinar naquella nueite de misteriiu; las flores sorbían la máxica rousada que cubría de plata los praos. Encendíu pol calor del amor, Ramiro picaba  la yegua qu´obedecía sin retruque ya galoupaba cada vez más apriesa. Cuando iban a l´altura de La Casona la Lluna encomenzóu a medrar ya a ponese al roxu vivu. Una solombra blanca ya trasparente con figura de muyer tiróuse  pola ventana de la mansión ya caéu al mar ente glayíos de terror. La mansa yegua alterióse  ante aquella situación , encomenzóu  a dar botes ya tomóu  ´l camín  del precipiciu. Ramiro garroúse  fuerte a la piquera de la montura pero nun puido  controlala. 

Queixóuse la curuxa  ya aullaron tolos perros del pueblu. Ya la nueite tornóuse  melancólica,

Al outru día, tol pueblu buscóu al mozu por tolos llaos, pero d´él  nun s´alcontróu rastru. La yegua blanca flotaba  nel augua  del mar d´Arnáu, con fustax del horror  que la llevóu a espeñase pol acantiláu.

Ya pasanon muitos años, hasta que nesa mesma  fecha, repitíuse ´ sucesu. Outru mozu de los alrededores foi víctima de la solombra de La Casona. Ya foi nesi mesmu momentu cuando Ramiro quedóu  lliberáu ya puido  volver d´aquella realidá d´espíritus al mundu  de los vivos.  Encomenzóu a recordar  aquellos caminos  ya a sentir la bravura  del mar. Contemplóu la Lluna  chena ya abrazóuse  a la brisa. Chegóu a La Mina sudorosu  ya encendíu, sedientu  d´amor cumo aquella nueite que los quereres  de Delina-y abrasaban el corazón. Too taba en silenciu. La xente, amusgada, al pie de la foguera muerta, paecían nun pescanciar las súa presencia. ¿Naide lu conocía? Pasóu Ramiro pol mediu de toos ya petóu  fuerte na puerta la casa que taba abierta. Asomoúse  una moza roxa  con una nena nos brazos chorando a llárima viva.

-¿Qué quier a estas horas? -dixo-y la moza estremecida, ya figurándose-y que ´l rapaz yera una solombra.

-Quiero ver a Delina -contestó-y azoutáu.

-Chega tarde, mía bolina fóisenos güei. Ta aiquí na sala de cuerpu presente.

Ya, de sóoitu, cumo si los años pasaran nun instante, Ramiro entamóu a avieyar ya tresformóuse  nun vieyín arrugáu  ya encoyíu, de güeyos  vidriosos ya tristes, cumo una planta que se mustia. Sonaron xemíos p´hacia la playa, ya la nieta de Delina, cola congoxa de la muerte, zarró-y la puerta de güelpe ya metéuse en casa esparovida. Al chegar a la sala desmayóuse.

Ya Ramiro desapaecéu. El sou espíritu  volvéu tranquilu al más allá. Por fin podía xuntase  con Delina, l´amor de la súa vida, ya de la súa muerte, naquel llugar de lluces ya solombras blancas”

Adriano  vivíu estos recuerdos intensamente ya diouse cuenta de que yera la mesma fecha, la nueite de San Xuan, ya atoupábase no mesmu llugar, a la vera La Casona d´Arnáu. Quixo volvese ya dio-y espuela al  ruan, pero yá yera tarde. Rompéuse la Lluna ya las estrellas cayenon al mar. La solombra blanca envolvéulos a él ya al ruan en mediu de queixíos ya xemíos d´horror.

Repetíase la historia.

Onde la palabra pousa- D´Asturias a Miranda. María Cueto Fernández-  Xulio Viejo Fernández.-

Pa ver cúmo taba

Anantes la vida non yera cumo agora. Las mozas dexábanse respetar muncho más ya nun andaban d´unu en outru cumo un trapu. Porque hoi ye too un relaxu que mete miedu, ya a los mozos da-ys lo esmo que ten fartucas d´andar con unu que con venti. Nun m´estraña que nun duren nin dos días de casaos. Alcuórdome siempre que Xulio ´l de Carmina dicía que los novios diban al matrimoniu  cola ilusión de ver na nouche de bodas lo que nun vieran anantes. Mira tu qué van ver hoi si namás conocese yá andan revolcaos cumo si fuoran perros.  Ye verdá  que los tiempos cambiaron abondo  ya las mozas son mucho más espabiladas que yéramos  nosoutras ya nun tienen la inorancia que teníamos. Pero ente lo pouco  ya lo muncho  hai un términu mediu, que las hai que yá andan  de rapazucas  que da ascu velas.  Ya encima nun admiten  conseyos de naide, ya tienes que calla-ys cumo una afogada cumo  si lo supieran too. Nun se dan cuenta qu´unu  ye vieyu ya tien más esperiencia pa orientalas. POrque de xoven vese too mui guapo ya mui formoso, pero luogo vien lo que vien ya hai que palpalo. Ta bien que tengan más llibertá, you  d´eso nun digo nada, qu´anantes, a las ocho o a las nueve teníamos que tar recoídas na casa cumo las pitas. Claro qu´entós tamién las había d´armas tomar, porque alcuórdome de Malia la de ca Xuana que-y  gustaban los homes cumo  a un llambedor ya andaba tras d´illos  tol día. Ya luogo, hasta tuvo suorte pa casase, que diou  con un paisanu tan bounu tan bounu  que merecía que lu besara en culu. Ya dicen que ´l día la boda  nun sei qué fixo  pa qu´él nun supiera que nun yera ´l primeiru col que taba. Ya después de casase aseguróu, ya hasta tuvo dos rapacinos bien guapos yabien formales. Ya illa espoxinóu  lo que nun espoxinara de chavaluca, que cuando vivía aquí colos tíos taba fartuca de comer patacas ya de pasar fame, ya toa illa  nun valía un perrón. Pero quién-y diba dicir que diba casase cumo se casóu.  Porque flete más grande nun lu vías. Ya amás valía-y  cualquiera. Buono, cualquiera non,  que tamién hai  que lo dicir too,  ya la verdá ye que  Malia nun se metía xamás con unu que tuviera moza. La probe sería tolo pendanga que-y  diera la gana pero colos que tenían novia nun quería saber nada. Ya alcuórdome  d´una vez  na fiesta ´l Valle qu´Antón  el de Maruxa garróla  polas tetas  ya del hostiazu que-y doiu nun-y quedaron más ganas d´acercase a illa.  Ya siempre la oí dicir qu´había homes asgaya ensin falta de quita-ylu  a nenguna. Ya neso la probe bien buona que yera. Ya pa la única que foi mala foi pa illa, que nun siendo l´home col que se casóu a última hora los demás nun la querían mas que p´aprovechase ya face-y burla. La muyer yera un pouco pánfila ya bobona ya nun se daba respetar; ya por eso pue dar con un cantu  en pechu que topóu con esi rapaz de contra Galicia que ye cumo un benditu. Porque había ser outru. Que de solteiros taba too mui guapo ya mui preciosísimo ya cuanto más-ys dieras meyor, pero pa casase  nun querían más que las que fuoran  llimpias ya decentes, ya las que supieran illos  que nun anduvieran con más naide.  Que si había algunu que se casaba  con un  pendón yera ´l comiciu de tol mundu.

Ya soi a dicite que you xamás fixi nada que nun debiera, ya anque tuvi algún acompañante ya pretendientes abondos, nun anduvi con más mozu que col que e caséi. Ya él de sobra lo sabía ensin necesidá  de preguntame nada, pero son la madre que los paríu ya cuando  arreglamos pa casanos  ya tábamos preparando boda, tantísimu miedu yera ´l que tenía de que nun  tuvuera en condiciones, qu´un día vieno tou aceleráu  ya díxome que quería saber cómo taba you, nun fuora ser que despuós de casanos s´enterara  de que m´acostara  con outros  ya él quedara cumo un Xuan Lanas.

Onde la palabra pousa. María  Cueto  Fernández - Xulio Viejo Fernández.-

De Romería

Iben la moza y el mozu

bien cogidos de la mano, 

ella agoliendo a claveles, 

él a sidre y a tabacu,

camín de la romería

de San Antón de Torazu.

Van  co la ropa de fiesta

luciendo guapeza y garbu,

sin mirase, nin decise

nin media palabra, andando 

poco a pocu, complacíos

de oir lloñe  allegres cánticos,

soníos de voladores,

y redobles de fandangos

de tambor y gaita. Ella 

con toa el alma enos labios

que non abre, y él inquietu

y amorosu. Pol contautu

de los deos temblorosos 

cuerre así com´un chispazu

eléctricu, que los lleva 

entontecíos, callaos,

sintiendo  dientro del pechu

tou el preciosu regalu

de la su xoventú: flores, 

músiques, marmullos, cánticos,

rayos de sol.  El la mira

llenu de cariñu, al pasu, 

y ella siente la mirada

en tou el cuerpu; y andando

van pocu a pocu diciéndose 

sin dar martiriu a los llabios, 

coses tienres, coses duces, 

que non se dirín falando, 

pus el corazón si fala

con palabras, siempre avaru

del su amor, del su tesoru,

guarda, recelosu  y cautu,

los sentimientos más fondos,

los pensamientos máscaros.

Por esu  van en silenciu

anque van los dos pensando

que solo hay  en esti mundu

xoventú, y amor, engañu

de la vida, que s´escapa

com´un sospiru llivuanu.

De prontu, los dos a un tiempu,

al apartarse la mano

mírense de tal manera

que brillen sus guellos,  fartos 

de mirar la lluz del cielo

sin miralu, y´esti diálugu

entamen: -Dime, Maruxa,

¿quiésme?

-Sí quiérote,

        -¿Tantu como yo atí?

-Más.

-¿Deveres?

-Deveres.

-Prébalo.

-Cando tú  quieras.

- Pus ahora mesmo.

-Ahora mesmo.

-Se sentaron

al borde del camín, mientres 

sonaban allegres cánticos,

soníos de voladores,

y redobles y fandangos

de tambor y gaita, lloñe…….

Lloñe y allí, qu. el regalu

de la su xoventú: flores, 

músiques, murmullos, páxaros,

rayos de sol, los llevaben

con ellos revolotiando……….

Antoloxía Poética.  Carlos García-Ciaño Canto.-

Dixe yo que ´n isti añu les campanes

non tendrien camorres co ´l mayuelu, 

y non se lloraría ´nes quintanes 

la pérdida d´un fíu, padre ó güelu;

mas el diablu s´amuque, si miós planes,

un por un, non los ví rodar pel suelu

y tantes muertes hebo, que durara

que morrieren non mas por dame ´n cara.

Xuntos vi ´l esperteyu y la coruxa

de bon tiempu siñal, y hebo nevada;

vi llucir el coquin en ´a meruxa 

y fexo bono cuando dí tronada.

¡Dixe flín y fó flan! Non quede bruxa 

sin que muerra guayando amagostada, 

si fago otru pronósticu del añu…..

escríbalu col ráu ´l mesmu diañu.

Ponga presa ´l rabion, que fervollando

gomita la montaña  y llibre cuerre; 

tórnelu con peñascos….. y furando

verálu sin descansu  erre que erre: 

el progresu, siñor, podrá callando 

más ó menos sofrir, pero non muerre, 

pos fai  lo que ´l rabion, fura y al cabu

mírase vencedor quien llera esclavu.

Almanaque Asturiano el Carbayón. 1883. Teodoro Cuesta.-

Platiques de caleya

Si quieres que yo te quiera

ha de ser a condición,

que lo tuyo ha de ser mío

y lo mío tuyo, no.

-Home, gústame la copla.

¿quién diantre te la enseñó?

-Naide, tríxomela ´l aire

como trai un güen golor

que s´apega a les ñarices,

y la copla s´apegó

al mi oídu.

          -¿Quién lo fizu?

-Dalgún diañu tentador

que sabe de les muyeres

y los homes. ¿Qué sé yo?

-Paezte que tá bien fecha

esa copia?

            -¡non que non!

¿Y cómo puée ser, Lalo,

si una cosa ye pa dos

que la disfrute unu solu?

Faite ´l cargu.

              -La quistión

ye asina en esi motivu.

Quier decir, válgate Dios,

que todu lo que sea mío

teniendo dalgún valor, 

ha de ser tuyo. ¿Y lo tuyo?

-Y lo mío tuyo, non.

-Es decir, que pa los homes

como tú, todu el amor,

¿y´el interés? Pus, amigu,

el bolsu y el corazón

tienen un cuernu pol medio

que puede volverse dos

o venti, asegún el casu.

Ya lo sabes.

        -Güeno, pos

con dexalo si la cosa

non paez bien s´acabó.

Si la muyer quier al home

con cariñu y alusión,

de verdá, faite la cuenta

que i dará, non digo yo

la voluntá, que ye suya,

cantu tenga de valor

en efectivu en hacienda,

en todu, porque si non, 

¿aónde taba el cariñu?

-¿El d´ella?

            -El d´ella.

            - Ena voz,

enos güeyos, dientro l´alma, 

en tóes partes y al són

ena cabeza, pensando

que sin recompensa, amor

ye un engañu manifiestu,

un bancu coxu. ¿Quién vió

amontar los intereses

sobre ´l cariñu? Si Dios

puxo la sangre enes venes,

por barquín el corazón

pa encendelu,y sólo enciende

siendo lo qu´apucen dos,

¿cómo ha poder unu solu

quemase y el otru non?

Si unu ye vieyu, ta güeno;

si ye feu  com´un dolor,

ta güeno; si tien un viciu

u algo ansina, anda con Dios;

pero cando  ye una moza

gayaspera como el sol

y como el sol guapa y rubia

vendése a un curru pelión, 

dándoi cariñu y dineru

d´albaricies pol temor,

de perdelu, ya lo dixe:

un cuernu que fagan dos,

venti, cientu.

                         -¡San dalgunos!

-Arre palantre.

                -Ya voy;

pero, enténdime Sidora, 

liriu del valle de Foz:

“Si quieres que yo te quiera 

ha de ser a condición”…………………

Antoloxía poética. Carlos García-Ciaño Canto. 1925.-