Mio Xeneral (Comedia Asturiana)
PERSONAXES
Francisco Franco Bahamonde
Carmen Polo de Franco
Pacón
ESCENA
La escena compónse d´una caxa onde tán los restos de Francisco Franco Bahamonde, cuatro velones prendíos, un crucifixu mui grande y delles sielles puestes diagonalmente alredor de la caxa.
De mano la escena ta vacía…. bueno, vacía non…. ta ´l cuerpu sin vida del que fuera Caudiellu d´España, el home que gobernó España como un cortixu. Un reináu llargu triste y gris d´un home despreciable con ambiciones mediocres.
ACTU ÚNICU
VOZ N´OFF: Carta política lleída por Carlos Arias Navarro a la muerte de Franco.
(Per dalgún llau de la sala y sobre una mesa ta ´l brazu incorruptu de Santa Teresa. Tamién hai una bandera col águila y un tocadiscos antiguu “gramófonu”. Per dalgún llugar hai una xarra agua y un vasu.
Entra Pacón, primu carnal del Xeneralísimu y home de confianza a lo llargo de toos estos años de duru gobiernu de los españoles. Enciende los velones. Cuando ta nesti menester, entra la señora con un sable na mano. La señora ye doña Carmen Polo, fía de Felipe Polo que ye de familia media d´Uviéu. Ye alta y flaca, con pies grandes, llargos dientes de caballu y una mirada dura y fría).
SEÑORA (Sin mirar a Pacón) ¡Mira que ye pequeñu esti traste! ¡Claro! Pa l´altura que tienes, tuvisti que comprate ´l sable a midida. Siempre estorbando per toles partes, nunca supi ónde ponelu Paco. ¡Y tu col cariñu que y teníes! Desque yeres alférez d´infantería que lu tienes. Siempre al to llau. Primero nel Alcázar de Toledo, dempués en Marruecos, y más tarde na nuestra boda n´ Uviéu. (Ponlu dientro la caxa) Y mira que te ficieron regalos a lo llargo de estos años: cimitarres turques, yataganes asiáticos, dagues venecianes, fines espades franceses y tiznes de lleenda, pero tu arrequexábesles o les dabes a museos, toes menos esti sable.
(Persignase)
Tomasín el dependiente de la tienda de Toledo onde lu comprasti preguntóte: ¿De qué talla? Tu non sabíes qu´había sables de distintes talles. Polo xeneral, esplicóte, toos miden lo mesmo. Pero dalgunos como esti tienen unos centímetros menos que los otros.
¿Por qué? Preguntasti.
Y Tomasín contestó: Porque hai homes altos y homes baxos, como usté.
¡Que temeridá la d´esti Tomasín!
Rexitró ´l to nome nel llibru de la tienda de don Jerónimo Parra como yera vezu.
Don Francisco Franco Bahamonde, alférez d´Infantería.
Pasaron muchos años desque te gritaron aquellos cadetes en plena cai: (Llevantando la voz) ¡Franquito! ¡Conque yá tenemos sable!
Exactamente sesenta y cinco años.
Y dempués lo del fusil, que te tuvieron que recortar 15 cm, el cañón pa que pudieres facer la instrucción.
¡Vaya bromes! Pero tu nunca te chivasti de los tos compañeros, fechu que te valió l´amistá de munchos pa tola vida, como Juan Yagüe.
(La señora fai una señal a Pacón pa que-y arime una siella)
A lo llargo toos estos años nos que vivimos xuntos llamáronte: de mano Franquito, que don Alfonso XIII te siguió llamando asina hasta que morrió; más tarde, n´Uviéu, llamábente ´l Comandantín; y, col pasu de les décades y según el grau d´entusiasmu y allabanza llamáronte l´homólogu del Cid Campeador, del Emperador Caros, d´Alejandro ´l Grande y hasta ´l César Visionario. Pero ´l más combayón foi ´l de Luis de Galinsoga, director de La Vanguardia de Barcelona, que llegó a llamate sin ningún tipu de reparu El Centinela d´Occidente….. ¡qué guapu! … Dixístime que nunca se t´ocurriera, la verdá ye qu´a mi si se me paso pela cabeza… anque tamién te llamaben Paca "......…" sacótelo l´ energúmenu de Queipo de Llano o Miss Canaries na época na que tábemos destinaos en Tenerife.
(Sacando un pañuelu y llimpiando les llárimes)
…Y agora qué Paco, agora qué va pasar. Por qué la viuda d´un rei sigue siendo la reina, pero la d´un dictador… ¿Cómo se-y llama a la viuda d´un dictador? (Carmen sienta y saca un rosariu. Al pocu ratu Pacón lléva-y una caxa con recuerdos)
Cuando te conocí nun bebíes, nun xugabes a les cartes y nun paecíes tener una afición escomanada poles muyeres, o polo menos eso dicíen los dos amigos… que yo sepa solo acompañasti un par de díes a la fía del xeneral Aizpuru, l´altu comisariu en Marruecos. Un día Yagüe, que nun andaba con tonteríes, díxote:
(Con voz grave) “O vienes un día con nosotros o vamos acabar creyendo que yes maricón”
Nun te pongas asina, munchos, y tu lo sabes, creyeron que yeres marica y munches coses más dicíen de ti na cai. Una d´elles yera que nun te gustaben les muyeres y tando n´Uviéu ún de los tos allegaos dixo:
“El se lo pierde porque n´ Uviéu hai un par de cases de putes de gran calidá, a les qu´acuden lo mas granao d´esta sociedá hipócrita”, y eso Paco, nun ye verdá. N´Uviéu, óyesme, nunca hubo putes.
(Santíguase) (Posa)
Yeres de familia probe, d´orixe modestu. To pá y to güelu vivieron d´un sueldu y tu Paco, tamién tabes destináu a lo mesmo si nun ye porque me conocisti a mí.
A to madre, María del Pilar Bahamonde y Pardo de Andrade, abandonóla to padre, al que namás que-y gustaben el vinu, les cartes y les muyeres, cagó verde pa sacar alantre ella sola a cuatro fíos, a ti Paquito y a los tos hermanos Nicolás, Ramón y Pilar.
Tu, daquella, siempre te poníes de parte de tu madre y, naturalmente, gofetada paterna que se perdía, gofetada que cobrabes, Paquito.
Tienes que me reconocer, que nun conocisti lluxu nengunu hasta qu´entrasti en casa de papa, vamos hasta que casemos…. la verdá ye que nunca apreciaste ´l dineru.
Acuérdome de cuando un día a bordu del Azor, tabes en compañía del to amigu l´almirante Nieto Antúnez y-y preguntasti:
-Oyi Pedroso, ¿ye verdá que faes negocios y que tas convirtiéndote nun home mui ricu?
Él contestó:
-Home, tanto como muy ricu…Pero dalgún negociu qu´otru sí que faigo.
Terminasti la conversación diciéndo-y que nun te paicía bien porque tu nun facíes nengún. A lo qu´él te conestó que nun necesitabes facelos porque yá lo tenies too.
Y claro que lo tenies too, pero bon sacrificiu te costó. Cuántos disgustos llevemos por España.
(Posa)
(Empieza a rezar un rosariu en voz alta pa baxar dempués a un xuxuriu malapenes)
¡Ai, Paco!… cuántes conversaciones tuvimos sobre España, cómodamente na cama recostaos nos nuestros almuhadones, dempués de comete un caldu pita y una ensalada.. ¡Ai!
Elli, na cama lleíes les noveles policiaques d´Agatha Christie y, a escondidielles y sin que yo te viera, lleísti y relleísti un par de veces La Tournée de Dios de Jardiel Poncela.
Y agora van volver a llamame doña Carmen, y doña Carmen suena a patiu de vecinos… colo que nos costó que me llamaren La Señora. Por qu´ al final tuvo que ser La Señora, porque t´empeñasti en nun dame un título honoríficu porque dicíes que nun ficiere nada pa merecelu. Bueno nada de lo que tuviere enterao la xente… porque yo yera la to conseyera en tolo que se refería a España. Espero qu´esto lo tengas claro, anque te lleves el secretu pa la tumba.
¡Ai, Paco!…. y agora van volver los políticos, colo que tu dicíes d´ellos:
“Los políticos son la cangrena d´España, había qu´acabar con ellos antes que colos moros, un día nosotros vamos acabar con ellos”
Y vaya si acabasti… cuarenta años de paz… que se diz pronto.
Tantos años gobernando esti país y la verdá ye que pue dicise que solo tuvisti dos amigos: Alonso Vega y Pacón. Los tres yéreis los que falabeis con toa confianza de los males d´España antes de la gloriosa cruzada.
(Posa y suspiros)
Pero antes tuvieron los años en Marruecos. Destín que solicitasti voluntariamente porque los ascensos solo se ganen n´África, nunca nos cuarteles de provincies. Y naquellos años, África y más concretamente Melilla yera un llugar pa dexar a unu sin voz, puercu, polvorientu, apestosu, coles cais cubiertes de basura y los tenderetes de los comerciantes enllenos de mosques. La población odiábavos, queríen matavos nada más llegar.
El nuestru exércitu nun yera profesional y desque empezasti tuvisti enfotáu nesa profesionalización. Cuando tu llegasti, l´exércitu d´España tenía unos 80.000 soldaos y más de 400 xenerales. Ensiguida te mandaron pal cuerpu de Regulares Indíxenes, compuestu casi dafechu por mercenarios moros.
Escoyisti un caballu blancu como la nieve, desafiando abiertamente a El-Raisuli, que siempre montaba un caballu negru. Pronto ascendisti a teniente, dempués a capitán por méritos propios. Y solo teníes veintiún años. Yeres fríu como un pexe y valiente como un moru, nunca baxasti la cabeza cuando te disparaben. Tamién te tachaben de valiente y cruel, pero la to crueldá nun la provocaba la escitación del combate, sinón que yera una crueldá fría y razonada que buscaba producir pavor.
(Voz grave)
¡Que los mis homes-yos corten les oreyes a los rifeños!
O cuando-y mandasti un cestu enllenu oreyes d´esos mesmos rifeños a la duquesa de Vitoria.
(Risines)
Esa valentía llevóte a caer firíu na batalla d´ El Biutz, que por cierto ganasti. Dempués d´asumir el mandu al morrer el to comandante d´un tiru na cabeza, te pegaron a ti un balazu nel banduyu.
Tolos tos compañeros te dieron por muertu. Les males llingües dicíen que te t´españaren los güevos (Santíguase mirando pal cielu), el ciruxanu llogró cortar dafechu la hemorraxa y tres selmanes más tarde lleváronte pal hospital de Ceuta.
Ellí na cama, firíu, foi cuando-yos dixisti a los compañeros d´armes aquello de:
“Esta guerra va siguir dalgún día n´España. Solo-y pido a Dios qu´esi día yo tea tovía con vida y que me conceda ´l tiempu necesariu pa llimpiar España de políticos, xudíos, roxos y masones!
Si dalgún día llego a tener el poder voi poner en práctica tolo que deprendí n´África. Mano dura y disciplina. A los gobernantes hai que tratalos como si fueren neños, sin almitir caprichos. Empezaría por eliminar a los pacifistas que tantu dañu nos ficieron nesta guerra y a los elmentos d´izquierda, que son los que provoquen el desorde social y animen a los separatistes.
Delguién entrugó: ¿Y qué vas facer con ellos?
Tu sin pensátelo dixisti: ¡Afusilalos!
Por esti llogru tan grande pal nuestru exércitu, el rey Alfonso XIII t´ascendió a Comandante y te destinaron pa Uviéu onde empezaron a llamate El Comandantín, que la verdá ye que te sacaba de quiciu.
(Como ilusionada polos recuerdos)
Foi n´Uviéu, onde nos conocimos, nuna romería, yo malapenes tenía quince años. Merendemos baxo una carpa arrodiaos de xaréu de fiesta prau. Nun me sacasti a baillar, y yo creo que pola diferencia d´altura… y nun t´enfades, pero yo siempre fui más alta que tu Paquito. Ya sabes que los militares naquella época nun tabeis bien vistos, teníeis mala reputación… y a mi padre, Felipe Polo, entregáron-y un anónimu esplicándo-y que nos víemos clandestinamente dende diba yá unes cuantes selmanes, ¡Vaya cómo se punxo mio pá! ¿Y mió tía Isabel, hermana de mió pá? Uff… que mal tragu. Papá llamóme al despachu, ellí taba él sentáu nel sillón, detrás de la mesa y mio tía de pie xunto a él, tenía la cara como La Dama d´Elche.
Mi padre preguntó ónde nos víemos y de qué falábemos. Yá per aquelles feches la nuestra conversación prioritaria yera España. Nun-y negué nada de nada. Y díxi-y que quería casar contigo Paco. Mio tía Isabel plasmó.Y por munches coses negatives que me dixo de los soldaos, de la to edá, te recuerdo que me saques ocho años, de que yeres d´una clase social inferior, y qué sé yo cuantes coses más me dixo…. lo cierto ye que nun fueron a faceme cambiar la opinión de querer casar contigo. Con un comandante del exércitu español que se llama Francisco Franco Bahamonde.
Aquella conversación cerróse con una frase de mi padre:
“Si un día te lu maten, nun me vengas con lloreres”
Acuérdome de la primer vez que vinisti a casa, taben observándote como si d´un esame se tratara. Colos espárragos usasti cuchiellu y tenedor, lo que te valió un cero, pero col piescu te portasti mui bien y te salvasti del suspensu sin apelación posible que te daríen mio padre y mio tía Isabel. Más tarde na conversación que papá y tu tuvistis demientres dispuestu a defender l´orde sable en mano.
(Se llevanta la señora y coloca meyor el sable del Xeneral)
Fueron años difíciles aquellos. (Posa) Separaos tantu tiempu. Anque nos escribíemos a diariu, yeren tiempos duros, lloñe unu del otru. (Posa)
“Sentíame como una auténtica nómada”
Nuna d´eses cartes que m´ escribíes a Uviéu, dixístime, que conocieres a un home maraviyosu. Llamábase José Millán Astray y yera comandante como tu, anque te sacaba dalgunos años. Un verdaderu héroe col cuerpu firíu una y otra vez poles bales y la metralla enemiga. Xuntos creastis la Lexón. Yera un personaxe mui presumíu llevaba unu d´esos cristales nun güeyu, ¿Cómo se llamen? Eh, eh….
PACÓN ¡Monóculu!
SEÑORA … eso Monóculu. Gracies Pacón. Úsalu pa disimular que nun tien un güeyu. Al luxu llamábalu cursilería (Escápase-y una risa) Perdona Paco, foi sin querer, Millán pertenecía al club de los tos meyores amigos.
Nunca-y cayó bien a Millán Astray el maríu de la mi hermana, Ramón Serrano Súñer, dicía que yera más cursi que tocar a ranchu con violín.
(Escapábase-y otra vuelta la risa, suavemente)
Yera un valiente español, que siempre dixo que-y gustaba morrer de la manera más espectacular y gloriosa. Xuntos vos apoyastis nos momentos más difíciles. Ún d´ellos cuando volvisti a instaurar la bandera amariella y colorada de la monarquía quitando la republicana. Nesa ocasión Millán Astray díxote:
(Con voz grave) “Ficisti mui bien, Paco, porque a munchos de nosotros nos resultaría difícil morrer por esi guiñapu impuestu ´l 14 d´abril polos comunistes, socialistes, ateos, xudíos y masones”
Siempre se perdía pela boca siempre. Vamos que yera un bocaces.
Cuando xuntos formasteis la Lexón, tol mundu empezó a tenevos mieu, corríen per tol país les vuestres victories contra los africanos. Los ceutís protestaron nes cais cuando vos destinaron ellí. Creastis un decálogu que podría resumise en tres palabres: “Dios, Patria y Rei”
El rei dixo:
“Millán y Franquito ficieron de los sos lexionarios una ferramienta temible y eficaz al máximu”
(Cantando)
“Lexionarios a llluchar, lexionarios a morrer”
(Pue cantase más d´esta canción y que se xuna Pacón a ponela n´off)
¡Que guapu!
(Garrando una carta de la caxa y lleendo)
“Querida Carmen:
El 17 de setiembre pasáu, firieron a Millán na reconquista de Nador. Anque taba echando sangre pela boca, sintiéron-y gritar:¡Viva España! ¡Viva ´l rei! Yo asumí ´l mandu les tropes hasta la victoria. Lo qu´ellí vi, Carmen, foi dantescu. Centenares de calabres de soldaos españoles apodrecíen al sol baxo nubes de mosques. El fedor yera insoportable. Los mios homes vieron a los collacios degollaos, emasculaos, crucificaos nes puertes. Esos crímenes ficiérenlos les muyeres de los poblaos cercanos con una crueldá inaudita. Nunca hasta agora permitimos nin Millán nin yo que se dispare contra les muyeres. Pero lo que vi, fízome cambiar d´opinión.
¡Matáiles a toes! Grité ¡A ver si asina dexen de parir moros!
(Dexando de lleer)
Los lexionarios escoyíeslos tu mesmu, yeren más qu´homes, yeren besties salvaxes. Lo peor de cada casa.
Cuando llegastis per vez primera a Ceuta, recuerdo que-yos disti pista llibre. Un par d´hores más tarde morrieron asesinaos un chigreru, una prostituta árabe y un soldáu de 19 años que montaba guardia nun cuartel y al que robaron 20 pesetes.
La verdá ye que lo pagaron cola muerte, pero tu contestasti:
“que los tos lexionarios nun yeren monxines de la caridá nin tu la madre superiora”
Too yera pola patria Paco, pola Patria.
(Posa)
El to amigu Millán recuperóse d´estes firíes, pero cesó como Xefe de la Lexón por bocaces. Y tu disgustasti al nun date ´l mandu. Yera dalgo polo qu´esperabes, nun digas que non, contabes con ello y disgustástite cuando nun te lo dieron, Paco.
Yera un bocaces, un bocaces. Perdíase pela boca.
(Pon la oreya como si ´l muertu-y falare)
¿Qué dices, Paco? ¿Que nun te llame Paco? Vamos…. lo que me faltaba a estes altures. Con Millán tampoco consiguisti que dexase de llamate Paco, y el rei siempre te llamaba Franquito. Asina que nun me vengas agora con que nun te llame Paco. ¡Que soi Carmen!
Pues lo que dicía, a Astray perdiólu la boca, siempre taba diciendo coses como:
“Lo meyor que se pue facer con un intelectual ye matalu”
De Queipo de Llano sintióse-y dicir:
“de dalguna manera vamos tener que desfacenos d´esti energúmenu”
O cuando quixo cargase a Arthur Koestler convencíu de que yera espía rusu, pa él todo estranxero yera malo.
Pero lo que yá remató la cosa foi lo qu´ocurrió na Universidá de Salamanca ´l Día de la Raza de 1936. Menos mal que taba yo ellí.
(Se persigna)
Presidía la ceremonia ´l rector D Miguel de Unamuno, en representación tuya, Paco. Nún de los discursos , ún de los personaxes que nun va pasar a la historia, arremetió contra xudíos, masones, vascos y catalanes. Unamuno que yera bilbaín, púnxose a ferver y llevantóse pa contestar al insultu. Entós un lexionariu gritó:
“Viva la muerte”
Los gritos impidieron que s´escuchase lo qu´Unamuno quería dicir.
Entós Millán grito penriba toos:
“Muerra la intelixencia” (Vuelve a persignase)
Los Lexionarios quixeron prender a Unamuno que salvo ´l pelleyu cuando lu garré del brazu y lu saque del Salón d´Actos…si non… esos… esos lu maten.
Eso foi ´l final pal to amigu Millán Astray. Morrió creyendo qu´al final tu, Paco, fadríes volver al rei. Y yá lo dicíes tu bien dicho:
“Cuando se garra ´l poder, ye pa siempre”
(Posa) (Persígnase y reza)
Por favor Pacón, faime ´l favor de traeme un vasín d´agua. Gracies.
¡Centinela d´Occidente! ¡Centinela d´Occidente tu, Paco! (Risines)
La boda tuvimos que retrasala munches veces. España siempre yera lo primero pa ti y yo taba d´acuerdu con esa decisión, anque un día díxite aquello de “¿Nun tarás más namoráu d´África que de mí?”
(Pacón da-y el vasu agua nuna pequeña bandexa de plata y ella bebe)
Pero un día, ¡por fin! celebróse la boda, y foi de postín, una tregua nel combate. Foi na ilesia de San Juan el Real d´Uviéu.
Tol mundu taba ellí, el padrín d´honor yera ´l rei que se dexó representar pol gobernador militar d´Uviéu. Tu esperabes por mi al pie del altar, vistíu col uniforme de La Lexón.
Dalguien gritó:
¡Ui!, pero si ye munchu más baxu que la moza!
Escoyisti les músiques militares, sustituyendo la tradicional marcha nupcial de Mendlssohn pol himnu de La Lexón.
La verdá ye que nun tenés sensibilidad musical nenguna. Solo te gustaben les zarzueles, sobre too “Marina”,que la poníes una y otra vuelta… (Mirando a Pacón ) ¡Por favor!
(Pacón pon la zarzuela Marina)
(Sobre esta Música)
Pero de Bach, de Mozart y de Beethoven, nada. Quexábeste de que la música clásica t´animaba el sueñu. Igual qu´a don Alfonso XIII. Sicasí, dedicásti-y munches hores a la pintura, pola que siempre disti amuesa d´una gran afición. Un día dixísti-y al pintor Piñole:
¿Cómo fai usté esos verdes, Piñole?
-Piñole quedo mudu polo que taba viendo non llenzos pintaos por ti.
-Tu insististi diciéndo-y:
-“Piñole, pregunté-y que cómo consigue usté los verdes de los paisaxes”
-Ai, señorín, señorín…. eso ye oficiu.
Sentíes verdadera aversión por Picasso y xurasti que demientres tu vivieres nengún de los sos cuadros diba entrar nel Muséu del Prado, pero curiosamente gustábate Dalí.
¡Pero volvamos al convite!
El convite foi na Residencia Familiar y nun hubo viaxe de novios yá que tuvisti que volver p´África. Solo tres díes en San Cucao de Llanera, cerca d´Uviéu. Esi día tamién recemos un rosariu enantes de dormir.
(Sigue rezando)
Siempre d´un sitiu pa otru detrás de ti, peru tu lo sabes bien….nunca… nunca dixi nada. Sabía que tu yeres feliz y que ´l to oxetivu únicu yera España.
El mio primer destín xunto a ti foi Ceuta. ¡Nun me gustó nada! Anque me trataron como una primera dama.
A los 33 años punxéronte de xeneral de brigada, Paco, el más xoven d´Europa. Hasta Alfonso XIII te llamó.
Aquel día lloré a tou llorar.
(Emociónase)
Al pocu tiempu nació la nuestra fía. Yo tenía 26 años y tu 34 años. Una neña nacida del amor de Francisco Franco Bahamonde y de Carmen Polo de Franco. (Posa)
Sobre esto falaron muncho a les espaldes nuestres. Dicíen que nunca me vieren embarazada y que la neña yera fía del to hermanu Ramón Franco y d´una tonadillera. Que ´l to hermanu te pidiere que-y cuidares a la neña y que nosotros-y dixímos: ¡Si Camen y yo nos ocupamos de la to fía va ser pa tola vida! Y asina foi, Paco, la neña con nosotros tola vida… anque nunca vieren embaranzada…eso que más da.
Dempués treslladámonos pa Zaragoza porque te nomaron director de l´Academia Militar de Zaragoza.
Ellí taba encantada, me recibió mui bien tola sociedá. Solo queríes profesores qu´ ascendieren en Marruecos.
“Prefiero un fusil bien engrasáu a un llibru de testu con munches anotaciones” dicíes”.
Queríes que los tos cadetes supieren de memoria ´l decálogu que ´l to amigu Millán Astray realizare: Dios, Patria y Rei. Anque lo de Rei se nos escaeciere un pocoñín.
Elli, na Academia formasti homes duros que más tarde nos valieron nel alzamientu. Queríes que desapaecieren de los cadetes los vicios del alcohol, el xuegu y les muyeres, llegasti a repartir ente los cadetes preservativos pa que nun garraren enfermedaes venerees.
Anque tamién lloremos lo nuestro ´l día que nos obligaron a retirar la bandera monárquica, el día que ganó la República les elecciones. Foi Manuel Azaña ´l que mandó izar la bandera republicana en tolos edificios oficiales.
Como dibes tu, Paco, a esplicar a los tos cadetes qu´un día tendríen que derramar sangre por esa porquería qu´ondiaba agora.
Tu, Paco, negástite hasta nun recibir la orde per escrito y, cuando la recibisti, nun quixisti tar presente nal cambiu bandera. Muchos cadetes lloraron nesi actu y ún d´ellos foi l´ encargáu de llevate la bandera, la nuestra, al to despachu. Tu guardástila en un caxón de la cómoda. Esi día tabes de mui mal humor.
¡Qué tiempos, señor, qué tiempos!
¿Y sabes quién tuvo la culpa?
¡Los monárquicos que cambiaron de chaqueta a última hora!
¡Y Sanjurjo ´l primeru de toos! ¡Esi foi ´l gran culpable!
¡Si llegues a tar tu, Paco, al mandu de la Guardia Civil, Lerroux, Azaña, Maura y tolos demás traidores taríen muertos!¡Pero tamién ye culpa del rei por nun permitir que lu defendiéremos coles armes na mano!
(Ponse en pie) ¡Nun tuvo coyones!
(Sienta) ¡Qué tiempos, Señor, qué tiempos!
(Santíguase)
Y el día que te quitaron e director de l´Academia Xeneral Militar de Zaragoza, tamién llorasti lo tuyo pero non de tristura sinón de rabia.
Xuntasti nel patiu armes a los tos cadetes pa dispidite. Atragantástite al final del discursu cuando gritasti aquel ¡Viva España!
Olvidando intencionadamente ´l recuerdo a la República.
Refuxémonos en La Pinilla.
(Posa)
Yo toi contigo en que ´l rei nun tuvo coyones y nun dexo que lu defendiéremos coles armes.
Recuerdo cuando Alonso Vega dixo:
“Por qué coño don Alfonso XIII nun pega un puñetazu enriba la mesa y pon el mesmu orde na casa”
Tamién recuerdo cuando don Alfonso XIII nos recibió n´audiencia privada. Nada más venos entrar, don Alfonso, con chaqueta de tweed y botes de montar, abrió los brazos:
¡Home, Franquito, cómo me presta vete!
De mano, don Alfonso paecióme un home mui simpáticu y abiertu. Fuma sin cesar unos cigarros de tabacu negro con boquiella de cartón que-y carguen l´aliendu hasta facelo difícil de soportar. Na conversación el rei te díxote aquello de:
“Pero Franquito, ¿Cómo se t´ocurre pensar qu´un día podamos marchar de Marruecos? Yo toi totalmente d´acuerdu colo que dixo Maura mil veces, esto ye, qu´una gran nación solo esiste pola calidá de la so proyección más allá de les sos fronteres”
Y de sópitu, díxote:
“¿Ye verdá, que siempre tas al frente de los tos homes montáu nun caballu blancu?
Dixísti-y:
“Faígolo porque El-Raisuli lo fai nun caballu negru”.
¡Yes un xabatu, Franquito! Díxote ´l rei.
En 1923 so Maxestá ´l rei don Alfonso XIII nomóte Xentil-home de cámara. Nun cavíes en pelleyu, y yo tampoco. Frutu d´esti nomamientu la ciudá d´Uviéu apúrrionos la medaya d´Oru.
Fuisti tu ´l que-y esplicó al rei lo qu´había que facer en Marruecos pa ganar la guerra. Dempués mandóte que-y lo contares a Primo de Rivera, y esti díxote que yera lo qu´ él llevaba tiempu pensando.
¿Pero por qué nun lo facía, Paco, dime , por que nun lo facía?
¡Yá!, yá sé que dixo aquello de:
“Nin una gota de sangre española va derramase en defensa de la mio persona”
Contásti-ylo a Primo de Rivera. ¡Vaya, ho!
Contaben que yera tan escrupulosu pa col dineru del Estáu que dalgunos llegaron a tachalu de tacañu. Sicasí, col so dineru Primo de Rivera yera escomanadamente xenerosu. Puen dar fe d´ello munches cupletistes, cabareteres y dalguna qu´otra aristócrata de mal vivir.
Primo de Rivera nun creía que se pudiere ganar la guerra de Marruecos. Como nos rimos cuando nos llegó la noticia de lo que mandares facer pa la cena con Primo de Rivera.
¡Mandasti sirvir solo güevos na cena! ¡Na cena que se facía pa Primo de Rivera en Marruecos! Don Miguel entendió ensiguida ´l mensaxe que-y mandabes, pero nun fizo comentarios delantre de la Lexón y comió con buenes ganes. Foi nos discursos cuando-y dixisti que la guerra de Marruecos podíeis ganala. A la mañana siguiente mandó que te presentares nel so despachu.
¡Hai que tener güevos, Paco, pa facelu tragar un menú como ´l d´esa nueche a un probe enfermu del fégado como Miguel Primo de Rivera!
Les coses con Primo de Rivera encauzáronse y foi él el que tomó primer Director de l´Academia Xeneral Militar de Zaragoza, qu´agrupaba les cuatro qu´hasta entós esistíen.
La oveya negra de la familia, el to hermanu Ramón Franco, ¡Cuántos disgustos nos dio! Acuérdeste de cuando se metió nun complot revolucionariu que llevó a la sublevación de los capitanes Galán y García más tarde afusilaos. Y dempués quixo matar al rei bombardiando ´l Palaciu d´Oriente. Impidiólo un grupu neños que xugaben nos patios del palaciu, dempués refuxóse en Portugal. Aquella nueche recemos dellos rosarios pola oveya negra de la familia.
Una mañana despertemos cola noticia de que la chusma revolucionario pendiente delles ilesies y que ´l to hermanu Ramón Franco presumía públicamente de contribuir a la quema proporcionando la gasolina necesario.
Una vez instaurada la República, tu Paco, supisti mantenete al marxe sin metete en xareos como ficieren Orgaz, Godel o ´l propiu Mola que se xugaron la carrera y la llibertá.
A los pocos díes, Azaña mandó clausurar l´Academia Xeneral diciendo que se ponía educación militar inadaptada pa los tiempos que vivíemos y, amás, suponía un gastu mui grande pal ministeriu. Tu y yo sabíemoslo, Paco, Azaña lo que quería yera liquidate dafechu, pero fuisti tu, como xurasti aquel día ante Alonso Vega y Pacón, el qu´acabasti con él. A los pocos díes llamóte al despachu pa rise de ti a la cara.Yo llimpiare toles tos medayes personalmente, arimósete al pechu y dixo:
¡Cuántes medayes! Y esta crucecina blanca sobre un fondu de lloréu, ¿qué yé?
¡La Lexón d´Honor señor ministru!
Contestasti arguyosu.
-Púnxomela ´l xeneral Maginot pola mio participación nel desembarcu d´Alhucemas.
Solo dixo:
-¡Ya!
Dempués mandóte a descansar y pensar nel futuru.
Y demientres que tu pensabes, Paco, a tolos tos amigos fueron apartándolos a destinos bien lloñe, y al to hermanu Ramón Franco punxéronlu de Director Xeneral d´ Aeronáutica, y Sanjurjo empezó a cavilar un golpe contra la República, a ti mandóte emisarios pa que t´implicares nello pero los rechazasti unu a unu porque nun queríes tratar con un home que dexó tiráu al rei ´l 14 d´Abril del 36 y menos con dalguén que tenía permanentemente alquiláu un cuartu nuna casa putes de Madrid, esto añádolo yo, Paco.
¡Mira que lo tenies dicho tu!
“Hai que contar cola Guardia d´Asaltu y cola Guardia Civil si queremos que trunfe un golpe”
Y Sanjurjo fracasó por nun contar con estos cuerpos. Y dempués les llamentaciones y que fueres tu ´l que lu defendiere.
Ehí tuvisti acertáu dafechu cuando-ye contestasti, “Ye verdá que nun mereces la muerte por golpe, sinón por fracasar”
Dempués, en 1933 la CEDA de Gil Robles ganó les elecciones. El gobiernu nuevu ascendiónos a Xeneral de División, otra vuelta ´l más mozu d´Europa. Con esti gobiernu les coses diben de mal en peor, quemes, revueltes, homes de bien-anque los revolucionarios los llamaben caciques-asesinaos. Había ruíu de sables nos cuarteles y el to nome, Paco, sonaba cada vez más nos cuartos de bandera.
Pero tu, calláu. Nun gorgutiabes. Comentábase con quién contaben, que si los militares , que si los carlistes, que si los civiles, que si la xente de José Antonio Primo de Rivera. De José Antonio falábate muncho Ramón Serrano Súñer, que yera abogáu como José Antonio. Lo que Ramón nun sabía ye que nunca te fiasti de los abogaos nin de los civiles que faen política con una pistola en bolsu.
Un día, Paco, recuerdas, entrugásti-y a Serrano Súñer por ónde comprare los zapatos y el díxote que yeren ingleses, a lo que-y contestasti que los tuyos yeren de Valencia.
-Hai que comprar español, Ramón, hai que comprar español…
Ochobre del 34, (Baxa la cabeza) entovia me pongo triste al mentar esta fecha, diben pocos meses desque morriere to ma, Doña Pilar Bahamonde y Pardo de Andrade. Nesa fecha estalló la tan anunciada fuelga de los mineros asturianos. Xente temible onde lo haya. Tu conocíes bien a estos revolucionarios, tratástilos con dureza, como si fueren moros.
¡Que nun quede nin unu pa contalo!
Dísti-y a Yagüe unes órdenes mui concretes:
“Solo quiero mineros muertos. Hai qu´arrincar de rabín los xérmenes del comunismu. Quiero dureza, dureza y más dureza”.
Afusilaron a homes y muyeres, destruyéronse les viviendes de los mineros, pueblos enteros.
La tía Isabel llamó per teléfonu pa felicitate. Preferíes provocar el mieu que ´l respetu. Habíalos que creíen que yeres el salvador de la República. Por esta fazaña te punxeron de Comandante Xeneral de les tropes españoles en Marruecos.
Dempués d´esti nomamientu foi cuando empezasti a pensar seriamente no que podía facese por España.
N´África yeres feliz, cantabes zarzueles en bañu, volvisti a montar a caballu, un caballlu blancu asemeyáu al que montabes pa desafiar a El-Raizuli. Se t´empezó a sentir dicir que nunca dibes permitir que la izquierda se ficiere col poder n´España.
¡Anque fuere pela vía d´unes elecciones democrátiques!
En 1935 Gil Robles llamóte a Madrid pa que llevares l´ Estáu Mayor, nomóte Xefe del Estáu Mayor.
La verdá Paco, siempre fuisti un poco pasteleru. Demientres que la República te daba honores, ascensos y medayes nun pensabes en valtala. Hasta Queipo de Llano t´acusaba d´oportunista.
Nel Estáu Mayor fuisti poniendo les coses nel so sitiu. Punxisti fin a la carrera de munchos oficiales republicanos, rehabilitasti a los tos compañeros y fuisti preparando les coses a la to manera.
N´ochobre de 1935 casó en Roma l´Infante D. Juan de Borbón, fíu de D. Alfonso XIII, cola so prima Mercedes. Nun quixisti dir a la boda y a mi la verdá ye que me paeció mui mal. Tol mundu tuvo ellí, toos menos nosotros Paco.
¡Yá sé, yá sé! Una cosa ye ser monárquicu y otra tar a sueldu de la República y presumir de monárquicu.
Aquel día lloré lo que naide nunca nun lloró.
¿Qué pensaríen n ´ Uviéu?
Lleí tolo que s´escribió sobre la boda y ye verdá lo que dixisti, agora tolos que fueron a la boda van tar na llista negra de la República.
Y mientres tanto tu decíes qu´había qu´esperar, esperar hasta que tuviéremos organizaos.Y tu como bon gallegu, que naide supiere lo que pensabes. Solo los íntimos.
En Febreru de 1936, el Frente Popular ganó les elecciones. Yo esmorecí al oyer la noticia pela radio. Cuando recuperé púnxíme de rodiyes a rezar hasta que llegasti a casa. Yera tarde, mui tarde. Recé seis rosarios. Esa mesma nueche díxite, con enerxía, qu´había que facer dalgo, que yá taba bien de cavilaciones. Yera la hora de salvar a España, Paco, ¡Como ficisti n´África!
Di un golpe enriba la mesa y añadí:
¡Toma ´l mandu, Paco! ¡Si nun lo faes tu, van facelo otros por ti!
Azaña encabezó ´l gobiernu y lo primero que fizo foi echate. Ehí, ehí foi onde te disti cuenta de que tienes que garrar el mandu de la sublevación.
Lo primero que ficisti foi convocar a una xunta a Mola, Orgaz, Yagüe y Godez. Tamién llamasti a Queipo de Llano, Valerita y Alonso Vega. Nun quixisti na xunta a Sanjurjo, dicíes que yera gafe. Too-y salía mal.
Esa nueche discutióse sobre si en dando ´l golpe había qu´instaurar la monarquía, yá que casi tolos presentes yéreis monárquicos.Y al final dixisti la frase clave:
“Quiero vevos a toos, d´unu nunu”.
Eso yera lo que facíes en Marruecos enantes d´empezar una operación d´envergadura. Mola, esi día, diovos los destinos a caún, a nosotros tocónos Canaries y enantes de partir pa ellí fuisti a despidiete d´Alcalá Zamora y d´Azaña como manden les ordenances. Al primeru teníes-y antipatía y al segundu odiu candente. Despidiónos diciendo que disfrutáremos del sol de les Isles Canaries. Xurasti axusta-y les cuentes.
Lo últimu que ficisti foi aconceyar colos xenerales pa intercambiar opiniones y dexar claro que lo que se buscaba yera la salvación d´España. Lo que díbeis facer nun yera fácil, tolo contrario, duro y sangriento. Diba ser una guerra civil. Quedaron toos en silenciu.
Viaxemos pa Canaries vía Cádiz, onde ´l Gobernador Militar t´informó de la quema d´una montonera ilesies sin que se ficiere nada. Mandasti que-y tomaren el nome pa que nunca ascendiere. A la llegada a Canarias recibiéronnos con abucheos y pitaes. Había carteles llamándote Carniceru d´Asturies.
En Canaries dedicástite a la buena vida de sociedá. A clases d´inglés, que, por cierto, nunca se te dio bien y a xugar al golf. Demientres esti periódu en Canaries tuvimos un intentu d´asesinatu, dispararon sobre nosotros.
Un día dixiste:
¿Por qué nun te metes en política?
Dalgo que yá se te pasare pela cabeza, concretamente por Renovación Española y pola ciudá de Cuenca. Pero too salio mal porque a José Antonio de Rivera tamién se-y ocurrió presentase por Cuenca y los votos dividiéronse y nengún de los dos salió, eso a ti fastidióte (Satíguase) porque siendo diputáu naide diba poder impedir dir y venir de la península.
Por estes feches, creo que yera Abril del 36, les coses diben de mal en peor: fuelgues, motinos nes cais, atentaos, etc. Per estes feches escoyeron a Sanjurjo como cabeza visible del llevantamientu, pol prestixu ganáu na batalla d´Alhucemas, a lo que tu contestasti gritanto enérxigamente:
¡El desembarcu d´Alhucemas planteguélu yo!
Ellí, n´Alhucemas foi onde punxisti en práctica per ver primera la frase:
“El mieu gana munches batalles”.
La nuestra acción tien de ser de muncha violencia, hai qu´encarcelar a los dirixentes de los partíos políticos y sindicatos aplicándo-yos castigos exemplares.
¡Afusilándolos!
Ye más barato afusilalos que mantenelos nes cárceles comiendo cada dos o tres díes.
Tamién nestos díes se falaba de les tos duldes nel procesu preparatoriu. Se comentaba ente los tos colegues que queríes dirixir la operación dende ´l sur de Francia y fui yo, Paco, la que tuvo que sacar de duldes a Padilla diciéndo-y que tu tabes con ellos porque yeres un home d´acción. Naide debía duldalo.
Bueno… y la bronca que tuvimos cuando nun te conté que te llamaben Miss Canaries 1936.
Entrugástime polo siginificaba… a lo que respondí que la xente rumoriaba que te dedicabes a too, a xugar al golf, a tomar el sol y a charrar sobre tonteríes. A too menos a solidarizate colos tos compañeros de la península.
Dixístime:
¡Mira Carmen… yo nun vacilo, Carmen, nun vacilo!
Dempués llamástime atontada y fata, y eso nunca lo ficieres, Paco. Púnxime a llorar compulsivamente. Dempués pidístime perdón y yo dite un besu na frente, delantre de Pacón, y sabes qu´eses coses nunca me gusto faceles en públicu.
Una vez que te decidisti, Paco, les coses fueron más rápides.
Ensiguida se fizo l´organigrama como Mola quería, a ti estrañáronte dalgunes coses, una d´elles yera que nun se-y a Goded Cataluña, siendo l´únicu qu´entendía de catalanes y anarquistes, la otra yera que Sanjurjo nun apaecía nel organigrama. Padilla foi ´l que te lo aclarió, “Sanjurjo va ser el Xefe dl Estáu” una vez que trunfe ´l golpe d´estáu y, contigo, taben seguros de que trunfaría.
A ti mandáronte pa Marruecos a mandar a los moros y a la Lexón, mandáronte darréu nun avión que salio de Londres, alquiláu para llevate a Marruecos, pagólu Juan March, creo que costó más de 2.500 llibres, se llamaba ´l Dragón Rapide. El dineru púnxolo ó ´l señor Juan Mach porque los monárquicos españoles refuxaos en Biarritz nun queríen poner nin un duru. L´avión recoyóte en Les Palmes porque en Tenerife, onde vivíemos, hai siempre muncha niebla y la disculpa pa dir a Les Palmes, foi la de presidir un funeral. Recuerdo que cuando preguntasti de quién diba a ser el funeral, Padilla díxote que yá se vería de quién, que ´l s´encargaría d´esi tema. Y la verdá ye que s´encargó, vaya si s´encargó.
El motivu de la to presencia en Les Palmes foi la muerte del Comandante Militar de Gran Canaria, el xeneral Amado Balmes, al que se-y disparó una pistola que taba llimpiando en casa.
Cuando-y comentasti a Padilla y a los que lu acompañaben que creíes qu´a Balmes nun se-y desparare pistola nenguna y qu´ellos lu mataren hubo un silenciu llargu, mui llargu, solo rotu poles palabres de Padilla diciendo que yera un xeneral leal a la República y que tu Paco, lu mandaríes matar.Y eso ye verdá, Paco, tu pudisti dar esa orde sin más.
Cuando los crímenes empezaron, foi cuando tomasti la decisión de mandanos a Carmencita y a mi pal estranxeru. Opúnxime con toles fuerces, pero nun valió pa nada, yá tomares la decisión. Y foi una decisión sabia, les coses taben mui revueltes. Embarquemos nel Waldi, un barcu alemán con dirección p´Hamburgo. Llevemos lo imprescindible. Viaxemos Nenuca, tu y yo xunto a Pacón hasta Les Palmes. El trayectu en coche, dende la Comandancia hasta ´l barcu, ficímoslu cola pistola na mano por si nos asaltaben. Cuando nos despidimos, nos besamos y nos abrazamos como si nunca más nos volviéremos a ver.
Cuando llegasti a Tetuán a bordu del Dragón Rapide recibióte una montonera xente entusiasmao que gritaba:
¡Viva España! ¡Viva España!
(Emociónase)
Nada más llegar mandasti reclutar el mayor númberu posible de marroquinos pa llevalos a la península. Dalguién, nun recuerdo quién, ¿quién sería?, nun lo recuerdo…. bueno ye igual… dalguién te preguntó:
¿Como crees que va reaccionar los españoles cuando vean desembarcar a los marroquinos, aquellos que mataren tantos españoles na guerra d´África?
Tu sin pensalo contestasti:
¿¡Como lo ficieron n´Asturies nel 34! ¡Atarrorizaos! Vamos pacificar España ¡A sangre y fueu!
Cuando tabes pronunciando estes palabres foi cuando Padilla, el temíu Padilla, entró nel despachu cola cara desencaxada, gritando:
Mio xeneral…mio xeneral…¡Sanjurjo morrió!
Tu pidisti-y calma, que s´esplicare con voz serena, que te dixere lo que pasare, preguntásti-y con cierto temor ¿Supongo que sería un accidente?
Y la verdá ye qu´ esta vez sí foi un accidente, nada tuvo que ver el temíu Padilla. Foi en Portugal, l´avioneta estrellóse contra un árbol y Sanjurjo morrió nel incendiu del avión. La vanidá de Sanjurjo causó ´l accidente, l´avión yera un biplanu pequeñu y fráxil pa evirtar la vixilancia del gobiernu portugués. Sanjurjo quería volar con grandes maletes cargaes colos uniformes de gala colos que quería entrar trunfante en Madrid. Anque intentaron convencelu él nun fizo casu y xubió tol equipaxe al avión. El pesu impidió qu´esti garrare altura y s´estrelló contra l´árbol.
Al final dixisti aquella frase de:
“Bueno…. de toes maneres, Sanjurjo nun diba ser más que Xefe del Estáu”
Esi día la ruleta de la muerte xugó al to favor, Paco. Agora solo quedaba Mola, ¿recuerdes que te lo comenté? Bueno, tamién quedaba, ya lo sé, el señoritu esi, el de la Falange, José Antonio, pero taba na cárcel y tu tabes seguru de que lu diben asesinar nella y Dios, Paco, Dios oyóte, ellí morrió o asesinaron al señoritu José Antonio.
Nesos primeros díes del alzamientu ocurrió lo del to primu Ricardo de la Puente Bahamonde, un hermanu pa ti. Esparramare gasolina de los depósitos del aeropuertu, yera un roxu fiel a la República. Solo tu podíes indultalu y llibralu d´una muerte segura, pero tu mandasti aconceyar darréu al conseyu de guerra y que te traxeren personalmente la noticia de que lu afusilaren. Tu nunca indultaríes a un traidor, por mui primu tuyu que fuere, nunca nun lo ficisti en toos estos años.
L´Armada nun taba contigo al empiezu la guerra, taba cola República. Asina ye que nun te quedo otra que llevar a los tos moros y lexonarios dende Marruecos a la Península n´aviones. Tu fuisti ´l primeru n´utilizar la palabra Puente Aereu, anque la idea yera de Kindelán, tu, Paco ficístite amu d´ella.
A los pocos díes el Alzamientu, Mola creó la Xunta de Defensa Nacional, que tomaba ´l mandu de toles operaciones, lo mesmo militares que polítiques. Tu non formabes parte d´esa xunta. Asina reafirmábase la mio opinión sobre Mola. A Queipo de Llano tampoco nun-y prestó la idea y, como siempre, espresó la so opinión gritándo-y a Mola:
“N´Andalucía solo mando yo”
Solo Queipo de Llano te llamaba “Franquito”, yera al únicu que-y lo permitíes.
Teníes que facer dalgo de sonadía pa que te tuvieren en cuenta. Ficisti negociaciones colos italianos consiguiendo d´ellos aviones, Mola tamién lo intentare pero solo-yos pidía munición, nunca aviones, d´ esta forma s´aseguraba de que nun podíes llegar a la península colos tos moros y lexonarios.
Alfonso XIII, per esos díes, taba seguru que si ganabes la guerra, diba reinar n´ España otra vuelta.
Los alemanes tamién apostaron por ti y, asina, col apoyu d´italianos y alemanes foi como empezasti a ganar la guerra. Pudisti pasar a los tos moros y lexonarios, más de 3.000 soldaos a la península. A esi desembarcu llamáronlu El Convói de la Victoria.
Tol mundu na península gritaba:
¡Que vienen los moros!
Tu tardasti casi un mes en llegar de Marruecos a Sevilla, agospiasti en casa de la Marquesa de Yanduri, dormíes nuna cama del sieglu XVII baxo la cansada mirada de la Virxe anoréxica d´El Greco.
Cuando alcontrasti a Millán Astray vos abrazastis y llorastis, sí Paco, llorastis.
En llegando formasti lo que mas tarde sería ´l to Estáu Mayor. Taben Kindelán, Millán Astray, Martín Moreno y naturalmente (Mirando pa Pacón) el primu Pacón.
La primera decisión que tomastis foi que Yagüe tomare Mérida. Y tomóla de manera despiadada, solo n´Almendralejo mandó matar a 1.500 prisioneros ente los qu´había 100 muyeres que previamente violaren los moros. Cuando supisti esta noticia solo dixisti:
“Les coses fáense bien o nun se faen”
Nun podíemos dexar enemigos tres de nosotros, había qu´ aniquilalos, incluyíos los intelectuales que coles sos plumes faen más dañu que coles bales.
Otra cosa que ficisti con verdadera maldá, foi asignate les rellaciones internacionales cola aprobación de Mola. Pa los güeyos d´ Italia y Alemania eso yera importante.
Dempués de Mérida, tocó-y a Badajoz, y queríes que la caída de Badajoz diere muncho que falar, más que lo de Mérida y Almendralejo. Pa ello Benjumea fizo lo posible porque la prensa estranxero tuvoere per ellí. Queríes que se supiere a qué tabes dispuestu, y Badajoz foi un horror pa los roxos, más de lo qu´unu podía imaxinar. Lluchóse cai a cai, casa a casa, al final de la tarde Yagüe, dende ´l centru la ciudá gritó:
¡Los que tán muertos son los nuestros!¡Los que tovía queden vivos nesta ciudá son los asesinos! ¡Asina que díi por ellos!
La prensa extranxero escribió que demientres hores, moros y lexonarios alloriaos violaron, degollaron y mataron a tiros a tou ser viviente qu´atoparon. Al final de la nueche, Badajoz yera un gran cementeriu y el mundu sabía que la to cruzada, Paco, yera en serio. Dempués de lo de Badajoz anunciasti ´l cambiu de la bandera republicana pola monárquica, la colorada y mariella. Mola llamóte pa espresar el so malestar por esa decisión. Todos demás xenerales te felicitaron y Millán Astray díxote:
“Ficisti bien, Paco, porque a munchos de nosotros diba resultanos difícil morrer por esi guiñapu impuestu ´l 14 d´Abril polos comunistes, socialistes, ateos, xudíos y masones”
Nel to primer viaxe a Burgos la xente recibióte al altu la lleva:
¡Franco!¡Franco!¡Franco!
Namás que pudisti, aconceyasti con Mola y preguntastei-y por Nenuca y por mi, diba díes que nun podíemos falar y eso preocupábate. Comentóse que la falta d´información yera por seguridá. Falasti con Mola de los políticos, de los intelectuales que la verdá, Paco, na zona nacional había bien pocos y, al final de lo que de verdá t´interesaba, del mandu únicu. Mola nun punxo problema nengún, y, comentándo-y a Millán que l´únicu que podría poner pegues yera Queipo de Llano, esti díxote:
“Borrachu como anda siempre acabará cayendo pela escalera y matándose, sinón tendremos que da-y un emburrión”
(Rises floxes)
Yagüe volvió a pasase. Esta vez en Talavera de la Reina. Comentástime que dibes a relevalu, qu´andaba mal del corazón. Y la verdá, Paco, yo creía que Yagüe ¡nun tenía corazón!
Traxístilu de llau tuyu y lu ascendisti a Coronel por facer el trabayu qu´a nengún otru de los xenerales-yos prestaba facer.
Agora decidisti dir al rescate de Moscardó y lliberar l´Alcázar de Toledo. Queríes que fuera un golpe d´efectu, un impactu emocional. Teníes que lliberar a los más de 1.000 guardies civiles, a los cadetes, a les families que s´ encerraron con él, taben sin agua, sin comida y casi que sin municiones. Mandasti a Varelita colos sos guantes blancos y les sos botes de montar feches en Londres.
Demientres se lliberaba l´Alcázar aconceyó la Xunta de Defensa, pa decidir el mandu únicu. Les negociaciones llevóles el to hermanu Nicolás. Prometió de too, vaya como yera ´l to hermanu Nicolás. A los monárquicos que diba volver el rei, a otros un estáu fuerte del que tu, Paco, dibes dibes la cabeza pero namás que de forma provisional.
Nesa reunión foi Mola ´l que tomó la palabra pa pidir que se te nomara Xeneralísimu de los Exércitos. Mira, entá recuerdo la to cara. Quedasti desconcertáu. Foi Mola ´l que propunxo, col mieu que-y teníemos porque creímos que quería ´l mandu pa él.
Y tamién añadió que yeres la más capaz de toos. Solo Queipo de Llano lo sabía y lo comentó en voz baxa a dalgún de los presentes, solo él sabía que naide yá nun diba poder apeate del poder.
Pero tolo facíemos por España, ¿verdá Paco?
Tamién por España foi la to entrevista con Walter Warlimont, del Ministeriu de la Guerra alemán, en vez d´esperanos a Nenuca y a mí que regresábemos de Francia esi día.
Inútil dicite agora ´l cabréu que garré, Paco
Menos mal que yo taba educada como una señorita d´Uviéu y una señorita d´Uviéu nunca se cabrea.
Fueron munchos los problemas que tuvimos pa pasar la frontera. Pero arreglóse too cuando nos reconoció un coronel que coincidió con nosotros en Palma de Mallorca. Nunca t´espresé ´l mio malestar pola to ausencia, dígotelo agora, esta nueche, en que nos despidimos (Llárimes).
Cuando volví de Francia la guerra diba bien, tu m´adelantrasti que díbemos ganala. Tamién me dixisti esa nueche que si tu yeres el que tenía ´l mandu únicu, eso de que volviere ´l rei, nada de nada, tu nun dibes poner nunca un rei n´España hasta que ´l país tuviere preparao pa ello. Y eso podría tardar munchos años.
¡Y vaya si tardó, años, Paco! (Emocionada)
Y too gracies a la idea del golfu del to hermanu Nicolás que te convertió en Xefe del Estáu.
Pero nesi momentu la to preocupación única yera lliberar l´Alcázar y a Moscardó.
¡Que gran home, Moscardó!
Dexó que-y afusilaren al fíu antes de dexar caer l´Alcázar.
Dempués d´eso llamáronte EL CAUDIELLU.
Tal como tu dixisti, Varela colos sos guantes blancos y les sos botes foi ´l primeru en llegar al Alcázar. Moscardó cuadróse ante él y dixo:
“Sin novedá nel Alcázar, mio xeneral”
Los dos homes s´abrazaron y Varela dixo aquello de:
¡Qué flacu tas, José!
Foi ´l 28 de setiembre cuando te nomaron Xefe del Estáu demientres durare la guerra, foi Kindelán l´encargáu de lleer el documentu que pasó a la firma darréu, sin dexar tiempu pa protestes. D´esti documentu cayeron les palabres “demientres dure la guerra”, el que lo suxirió foi otra vuelta ´l to hermanu Nicolás, que siempre ta en too. Protestaron toos, toos Paco, yá se que nun lo ficieron directamente, pero si me llegaron les protestes de Queipo que llego a dicir:
“Franco ye un sinvergüenza y vosotros vais ser los primeros n´enteravos, porque nunca, nunca va traer de vuelta a España a vuestru Rei”
Y Cabanellas añadió:
“Dímos-y a Franco, un títulu de propiedá sobre España, que yá nunca va devolver”
Esa nueche, Paco, agradecístime tolo que fici por ti, por creer en ti, por nun defraudate.
El 1 d´ochobre t´ entronizaron y empezaron a llamate a ti Escelencia y a la guerra civil Cruzada, tamién foi ´l primer día que saludasti col brazu n´altu como El Duce. Esi día desperté con un xeneral na cama y echéme con un xeneralísimu.
Dalgunes coses cambiaron ensiguida. Nel almuerzu (Mirando que nun tea Pacón na sala), Pacón llamóte, como siempre, Paco y tu-y dixisti que dende esi día te llamare Escelencia, en priváu permitísti-y que te llamare Xeneral, pero lo de Paco s´acabó por mui primos que fuereis. A Pacón nun-y gustó la riña.
Millán negóse a llamate Escelencia dempués de lo que pasareis xuntos y Queipo gritó nuevamente pa dicir que nunca diba llamate Escelencia, que yeres un sinvergüenza. Queipo nunca te llamó Escelencia, tratábate de tu y por esi motivu dexasti de velu.
A mi tamién quixisti imponeme que te llamare Francisco, yo que siempre te llamé Paco. Lo de Franquito, que solo te lo llamaba ´l Rei, nunca se volvería a sentir, la verdá ye que nun tuvo posibilidá de llamátelo yá que nunca más lu visti. Y la xente d´a pie llamábate Caudiellu y a ti t´encantaba. Dempués del to nomamientu recibisti telegrames de Hitler, Escelencia Dl Francisco Franco Bahamonde.
La Ilesia concediónos el privilexu d´entrar y salir baxo paliu de los templos. Naide anantes tuvuere ese privilexu sin ser Rei.
Un día suxeríte formar una guardia Mora con llanza en mano pa custodiate y tu ordenasti que los qu´acudieren deberíen facelo de xaqué si yeren civiles y d´uniforme de gala si yeren militares.
Ensiguida empezaron les conspiraciones. La primera ente Nicolás, el to hermanu y Serrano Súñer. Serrano Súñer fízote llegar les correríes del to hermanu, que yera bebedor y muyeriegu y Nicolás encargóse de facer caer a Súñer del aparatu del Estáu. Pero enantes, Ramón Serrano Súñer fizo tolo posible pa cargase a Millán Astray que vía un peligru en tolo que vinía de fuera. Esto ye asina que quixo afusilar a Arthur Koesther convencíu de que yera un espía rusu. Pero lo que remató a Millán foi lo que pasó na Universidá de Salamanca con D. Miguel de Unamuno….
¿Qué dices?
¡Ya! Yá se que te lo conté munches veces, pero una más, la última, nun te molestará.
Cuando nos comunicaron la muerte de José Antonio, ¿Qué dices?… ah, sí, cuando nos comunicaron que lu afusilaren na cárcel d´Alicante, la verdá ye que nun te punxisti nada triste. Yá sé que nun te caía simpáticu ´l mozu, pero nun foi xustu ´l so afusilamientu. Tu, Paco, la verdá ye que nunca ficisti nada por sacalu de la cárcel, yera un estorbu pa los tos planes, bueno pa los nuestros planes. Y pa ver cumplíos esos planes necesitábamos a la Falanxe. La lliberación de José Antonio sería un verdaderu problema pa España.
¿nun dices nada Paco? Siempre tan callau.
En morriendo José Antonio necesitábemos amoldar les idees a los nuestros oxetivos. Enterástite de qu´esi mozu dexare escrito muncho nel períodu que tuvo na cárcel. Quixisti consiguir esos escritos que mantenía bien guardaos Indalecio Prieto y sabíes que nunca diba soltalos, pero tu escargásti-y al eficaz Bravo Padilla facese con ellos, nunca consiguió los orixinales pero si una copia que manipuló y entregó a Manuel Herredilla, xefe de Falanxe naquellos díes. Esi probe home siguió al pie de la lletra les consignes manipulaes de José Antonio y enfrentóse a ti, detuviéronlu y condenáronlu a muerte por rebelión armada. A última hora indultáronlu y nunca más se supo d´él. Dende esi momentu, la Falanxe foi siempre fiel pa contigo.
D´esta forma tuvo llugar la reunificación ideolóxica ideada por ti, pol Caudiellu de tolos españoles. Los falanxistes punxeron la boina azul de los carlistes y estos vistieron la camisa azul de los falanxistes nun absurdu conglomeráu d´idees y vestimentes.
¡Nun t´enfades, Paco! Pero ye verdá, ficisti un amiestru que nin Dios podía entender (Santíguase y empieza a rezar un Padre Nuestru que va desapaeciendo adulces)
Otra vez que recibisti una carta del Infante Juan de Borbón.
¡Qué pesáu ye esi paisanu!
Volvía a pidir incorporase a bordu del Baleares pa lluchar por España. Tuvisti que-y volver a dicir lo importante que yera la so vida pal futuru d´España.
Por aquel entós los Republicanos resistíen en Madrid tolos nuestros ataques. Asina empezaron les cartes ente axentes alemanes ya italianos con Hitler y Mussolini diciendo que tu yeres un mal estratega y qu´usabes métodos anticuaus, y que si los republicanos tuvieren la metá de les armes que dieren, yá tendríen la guerra ganada…. (Silenciu llargu)…non Paco, non. ¡Cómo diba yo a opinar igual que los alemanes ya italianos! ¡Pa nada! Pero tienes que reconocer qu´esos comentarios nun te gustaron nada y que te cabriasti lo tuyo. Tocárente l´arguyu. Pa siguir ayudándote te mandaron 50.000 voluntarios italianos que te vinieron mui bien como carne de cañón.
¡Tardaron en venir, pero la verdá ye que vinieron, y eso yera lo importante!
¡Pero como vinieron!
Yeren borrachos, pendencieros y munchos d´ellos excomunistes de los que Mussolini se desfacía.
N´España tuvieron un éxitu grandiosu ente la montonera putes qu´invadieren Zaragoza. En poco más de dos meses tuvieron qu´abrir dos hospitales dedicaos únicamente a los afectaos por toa clase d´enferemeaes venerees.
La primera acción de los voluntarios italianos foi apoderase de Málaga, cosa que ficieron sin demasiada resistencia. El xeneral Roatta mandóte un telegrama… (Busca ente la caxa de recuerdos).. ónde tára, equí, equí ta.
(Con voz grave)
“Les tropes baxo ´l mio mandu tienen l´honor d´ entregar la ciudá de Málaga a Vuestra Escelencia”
Menuda gofetada te dio esti xeneral. Kindelán comentó que si él recibía un telegrama como esti pegábase un tiru.
En Málaga morrieron miles de persones y Carlos Arias Navarro, güei presidente de nuestru gobiernu, al que llamaben El Carniceru de Málaga en recuerdu a un toreru local, mandó afusilar a 5.000 roxos.
Nuna maleta olvidada pol Gobernador Republicanu de Málata taba guardáu ´l brazu incorruptu de Santa Teresa, que dende entós nos acompaña siempre a pesar del Obispu de Málaga que lu reclamó insistentemente.
Al pocu tiempu (Rises) vengástite de los italianos y del so xeneral. Dividisti les sos fuerces en tres frentes prometiendo-y l´ayuda de los tos xenerales. Ayuda que nunca llegó y la derrota foi K. O. Toos aplaudimos la so derrota ante los republicanos que, como buenos españoles que yeren, baxaron los fumos a los italianos.
A ti, Paco, la guerra gustábate y la guerra civil entá más. Ye la única guerra na que te pues cargar a un fulanu que te tuvo xingando vivu munchos años.
Cuando llevábemos un añu de guerra civil, de Cruzada, los alemanes probaron les sos armes sobre Guernica. La lexón Cóndor tuvo tres hores bombardiando la ciudá sagrada de los vascos. Más de 2.000 muertos ente homes, muyeres y neños. Ellí foi onde los alemanes probaron por vez primera les sos bombes incendiaries 250 kas.
Con Guernica metistis la pata, tienes que reconocémelo. Hasta ´l Vaticanu manifestó la so repulsa. Y dempués vinieron les declaraciones de Mola diciendo:
“Hai qu´eliminar físicamente a tol proletariáu español y pa ello tenemos que destruir foles fábriques que son un formigueru d´anarquistes y comunistes”
Y eso, Paco, fáise, pero nun se diz.
Encargásti-y a Bravo Padilla, otra vuelta, qu´intentare que Mola falare un poco menos. A los pocos díes Mola volvió a falar más de la cuenta y unos pocos díes más tarde morrió abatíu por un avión nacional. Dalguién-y dexó un avión inglés requisáu a un pilotu republicanu.
¡Coses de la guerra!
Al día siguiente de la muerte de Mola, recibisti a Bravo Padilla, que venía de Burgos. Preguntásti-y si tuviere dalgo que ver na muerte del xeneral Mola. A lo qu´ él te contestó:
¡Solo lo xusto, Escelencia!
Nun supisti qué facer, si afusilalu o mandalu de vacaciones. Al final mandástilu de vacaciones, agradeciéndo-y el trabayu.
El funeral de Mola foi de gran austeridá. Yo, Paco, tengo que confesate qu´eché unes llárimes, pero fueron de felicidá (Rises conteníes)
La guerra siguió col so cursu, ente altos y baxos como toles guerres. Los tribunales militares empezaron a funcionar y se punxeron a echar condenes de pena de muerte, nun conocíen otres penes.
N´ ochobre de 1932 creasti ´l Conseyu Nacional de F.E.T y de les J.O.N.S.
(Buscando ´l papel)
Nel discursu dixisti:
“La nuestra guerra, señores, ye una guerra de relixones. Una guerra en defensa de los valores eternos d´occidente, ¡Somos soldaos de Dios! Hasta los mios moros tienen el mesmu Dios, anque los mios moros nun lo saben”
Nun faltó de nada: moros a caballu llanza en ristre, trompeteros y tamborileros vistíos a la vieya usanza, orondos y satisfechos obispos, lexonarios patibularios y cientos de policíes de paisanu. Y esa mañana tuvi arrodiada de marqueses y dames de la sociedá, foi ún de los díes más allegres de la mio vida.
Pa finales de 1937, n´avientu quiero recordar, rompisti definitivamente col rei Alfonso XIII. Recibieres una carta onde te metía priesa pa que-y devolvieres la Monarquía, quería regresar darréu, él que foi l´orixe de la República y d´esta guerra civil. Na carta de contestación (Buscándola) dexábes-ylo claro:
“Que la Monarquía yá nun yera una prioridá. Que nesta nueva España nun caben nin lliberales, nin politiqueros, nin cortesanos. Que dib tar bueno que preparase al so fíu don Juan, por sí un día, entá lloñe, la providencia lu llamara a reinar”
Al mio entender, fuisti un pocu bruscu, yá sé que tu crees que nunca-y debixti nada al rei, pero él siempre foi ´l to amigu.
¿Qué dices?
Yá, yá sé que nunca tuvisti amigos.
Nel iviernu del 38 perdimos Teruel y pa volver a recuperalu tuvimos que xunir les fuerces de Varela, Yagüe y Aranda, y tamién al brazu incorruptu de Santa Teresa. Dempués de la victoria de Teruel formasti ´l primer gobiernu de la nueva España. Los ministros yeren falanxistes, carlistes y monárquicos alfonsinos. A Serrano Súñer dísti-y el Ministeriu de Gobernación pese a les duldes que yo tenía. Anque yá sé que me dixisti que si nun valía lu echabes. Al to hermanu Nicolás punxístilu d´Embaxador Itinerante, dalgo que sabe facer mui bien y que va colos sos horarios de trabayu y les sos costumes. Recuérdote que llevantaba a les 3 de la tarde, que siempre andaba metíu en xareos con muyeres y que d´esa forma ye imposible trabayar con él nin con naide. Pero mira que Nicolás fizo coses por ti, Paco, a pesar de los sos horarios.
El final de la guerra taba cerca. Mandasti dividir el territoriu republicanu en dos y concentrasti a más de 200.000 soldaos nel Ebro.
En marzu del 38 los roxos fundieron el Baleares. Vaya marrón tendríemos si llegues a permitir que l´infante don Juan tuviere a bordu. Nos encontraríemos sin futuru rei, anque toles dinastíes tienen un principiu y un fin. Y si los Borbones s´acabaren, tu, Paco, podíes ser el fundador d´una nueva dinastía. La dinastía de los Franco. Porque tu, Paco, reconquistasti esti país. Fuisti un Rei sin corona.
¿Cómo que nun diga tonteríes?
Yo nun digo nenguna tontería, Paco.
N´ochobre del 38 morrió en vuelu Ramón Franco, el to hermanu, recibisti la noticia con gran entereza. Mandasti a Nicolás a Palma de Mallorca, él sí que taba apenáu. A Ramón rindiéron-y honores militares que nun-y correspondíen.
En xineru de 1939, Azaña cruza la frontera y se niega a volver pa Madrid, tamién cai Cataluña y se fai la purga prometida. Miles d´homes son afusilaos por ser independentistes y falar catalán. Tamién per eses feches publicastis la Llei de Responsabilidá Política que declaraba culpable a toles persones qu´apoyaren a la República. Yera de carácter retroactivu a 1934 y consideraba culpables a toos aquellos que pertenecieren a los partíos d´izquierdes o a les loxes masóniques. El castigu yera la muerte.
En marzu del 39 Madrid cayó, la verdá, Paco nun sé si Madrid se rindió o si la tomamos.
Bravo Padilla foi ´l primeru n´entrar na capital y nos dixo que paecía un cementeriu. Too en silenciu, les cases cerraes, menos nel barriu de Salamanca onde la xente taba na cai gritando:
¡Franco, Franco, Franco!
Les cases nesti barriu taben intactes. Ellí taben los amigos d´España, los nuestros amigos, Paco, y tu encargástite de que nun-yos les bombardiaren.
Esa nueche emitisti ´l to parte de guerra últimu y tomamos la decisión d´ónde vivir el restu de nuestros díes. Tu decidisti que fuere El Pardo y non el Palaciu d´Oriente porque taba gagáu. Esa nueche dormí tranquila pensando nel porvenir radiante que nos esperaba.
“Nel día de güei, cautivu y desarmáu l´Exércitu Roxu, alcanzaron les tropes nacionales los sos oxetivos militares últimos. La guerra terminó”
El Xeneralísimo Franco
Burgos 1 abril 1939.
(Fai una seña y pon Pacón l´últimu parte de guerra este va cubriendo la voz de Carmen Polo)
La Victoria celebróse a lo grande con desfiles, festexos, cócteles y bailles nos palacetes de La Castellana. Demientres los vencedores baillábemos, los derrotaos yeran xulgaos y acribillaos a balazos.
¡Coses de la guerra!
Cuando se tranquilizó too, un día montasti una bronca tremenda porque nun atopabes el to sable, desapaeciere nel treslláu dende Burgos a Madrid. Mandasti buscalu hasta que dieren con él, al final apaeció nun baúl xunto a los uniformes entá manchaos d´África.
Ficístime prometer que cuando morrieres t´acompañaría, que nos enterraríen xuntos y asina lo toi faciendo.
(Llevántase y colocalu un poco meyor. Paez que-y cai una llárima)
Sobrevivisti, Paco, a tolos tos xenerales, a Benjumea, al asesín de Bravo Padilla que morrió por casar con una muyer 30 años más moza.
(Observando que Pacón ta al so llau)
Bueno a toos non, Paco, al to primu Pacón nun lo sobrevivisti, el sigue equí, fiel hasta ´l momentu últimu.
La paz, tráxote tranquilidá, empezasti a engordar, cambiasti ´l carácter entá más, tratabes a tol mundu como si entovía tuvieres na guerra, nun yeres nada finu, Paco, solo conmigo yeres tienru.
Empezasti a recopilar datos de la to vida pa crear una futura Fundación que guardara ´l to legáu. Tuvimos 35 años aisllaos de persones, llibros, películes, obres de teatru, eso ye, de la cultura xeneral y de tolo que falare d´idees contraries a les nuestres.
Cuando en 1941 morrió don Alfonso XIII en Roma quitástite d´enriba un últimu y mui llixeru pesu. Solo te quedaba mantener les males rellaciones ente don Juan y el so fíu Juan Carlos. Dormíes tranquilamente, anque con un güeyu siempre abierto.
¿Qué me preguntes?¿Que cómo foi la mio vida xunto a ti?
Pues la verdá ye que la vida xunto a un dictador ye aburrida. Solo ocurrieron caxigalines demientres estos años. Una tranquilidá solo rota polos estudiantes cuando corríen delantre los grises, los comunistes impactaron la imaxinación de los intelectuales burgueses y el nuestru xenru, el Marques de Villaverde, empezó a tar en boca de tou Madrid polos sos gatillazos continuos.
En 1948 mandasti traer a don Juan Carlos dende Lisboa a Madrid, pa la so educación. En vez de mandalu baxar nel mesmu Madrid, onde los Monárquicos podíen recibilu en con total almiración, mandástilu baxar en Villaverde, una estación pequeña a pocos quilómetros de Madrid onde nengún tren paraba. El príncipe Juan Carlos yera guapu y espigáu, dábase un aire al güelu, cola tiez mui blanca y rubiu. Tenía once años y falaba l´español bien.
Fízose-y saber, ya ´l primer día, qu´esistíen dos Españes, la de los vencedores y la de los vencíos y que so pá s´equivocaba cuando dicía que diba ser dalgún día ´l rei de tolos Españoles. Tardasti 15 díes, en recibilu, esi día llegó con pantalones curtios, corbata y zapatos negros bien llustraos, taba impresionáu colo que vía. Tuvistis media hora solos nel to despachu. Preguntásti-y pola salú del pá y e contestóte:
“El Rei ta bien, gracies”
Sorprendióte que la ropa que llevaba-y fuere xusto y que tuviera llimpio pero mui gastao, mariellento. Vamos que nun teníen un duru. Llamóte “Mio xeneral” y tu a él disti-y tratamientu d´Alteza, como debía ser.
Esa nueche dixístime que ´l príncipe don Juan Carlos diba ser dalgún día ´l to sucesor, que so pá, nunca diba reinar. Asina ye que lu eduquemos como Dios manda.
Otra cosa que ficimos como Dios manda foi casar a Nenuca y más tarde a la nuestra nieta Carmen. A Nenuca casémosla col doctor Martínez.
Yá sé que nunca te gustó ´l Marques. Un médicu sin dineru y sin grandeza d´España. Reprochástime que nun diera con nada meyor pa Nenuca, pero ella yera feliz y nun ye necesario ´l dineru pa ser feliz.
¿Qué dices?
¿Que Hitler te fizo saber que cuando nun se tienen perres, nun s´empieza una guerra?
¿Tas diciéndome que ´l matrimoniu ye una guerra?
Mira, Paco. D´esto meyor nun falamos, quédate calláu.
Sobre ´l Marques, recuerdo que te fizo gracia un comentariu d´un periodista francés que dixo que diba amarutáu de domador cuando casó con Nenuca.
Otra cosa foi ´l matrimoniu de la nuestra nieta Carmen. Yera la to preferida y por eso-y pidisti a don Juan que-y concediere a Alfonso de Borbón, col que casó, el título de Duque de Cádiz y tamién tratamientu d´Alteza Real. Don Juan Carlos taba tamién d´acuerdu. La boda foi maraviyosa, acudió tol mundu. Dalgunes persones llegaron a pensar, yo ente elles, qu´ Alfonso de Borbón y Dampierre podría ser dalgún día Rei d´España y que la nuestra nieta sería la Reina d´España. Pero pronto visti que nun daba la talla, ¿nunca dio la talla, verdá? Pero ehí lu teníes como posible pieza de recambiu.
Cuando te decidisti a nomar al to socesor oficial teníes 77 años.
Por eses feches foi cuando recibisti la noticia terrible de que descendíes de xudíos, foi Alfonso Vega ´l que te traxo al despachu al profesor Mas-Torroella. Díxote a la cara que tu, Francisco Franco Bahamonde, Xefe del Estáu español y Xeneralísimu de los sos Exércitos… yeres un Marranu. Vaya enfadu….. por partida doble yeres un Marranu.
Cuando me lo contasti y te dixi que lo sabía dende antes de casar contigo, contáramelo mio pà, t´estrañasti de que nunca te lo comentara. Y mira, Paco. Pa mi solo hai dos tilpos de xente, xente de bien y lo otro. Siempre que seya blanco, naturalmente.
Aquella nueche tardasti en dormite hasta las 3 de la madrugada, hubo que facer una tila, acabasti una novela de Salgari y te canté una nana gallega (Empieza a canta-y una nana gallega)
Unos díes más tarde, el profesor Mas Torroella morría aplastáu en coche por un camión na carretera d´A Coruña.
Nel añu 1969, foi cuando ´l príncipe Juan Carlos empezó a sospechar que podíes nomalu Rei d´España en morriendo tu, non enantes. Supi, Paco, que nel branu del 69 lo faló con so pá, l´Infante don Juan, y que decidieren que lo meyor yera traer la monarquía otra vuelta a España y non engarriase pola Corona, pues, yà ves… nun son tan tontos estos Borbones como tu dicíes, Paco.
Don Juan sabía que tu nunca dibes da-y la corona a él. Foi ´l 22 de xunetu de 1969 cuando nomasti a don Juan Carlos, socesor tuyu a títulu de rei.
Preguntásti-y:
¿Qué ye lo que decidís, Alteza?
Hubo un silenciu llargu que t´incomodó, volvisti a preguntar y, sabiendo que nun dibes preguntá-ylo una tercera vez, contestóte:
-D´acuerdu, mio Xeneral, Acepto.
Dístivos la mano y tu sonristi. Ganares.
A la tarde, el Príncipe llamó a so pá l´Infante don Juan y hubo bronca ente ellos, don Juan echába-y en cara al Príncipe que na so visita de branu yá sabía lo del nomamientu, dalgo que l´ Príncipe xuraba que nun yera verdá. La verdá, Paco, mira que xugasti con esos dos lo que quixisti.
Taba too llegando al so fin. Tantos años de felicidá xuntos. Nel branu del 74 empezasti con fuertes dolores na pierna derecha, en poques hores te cubría tola pantorría. Se decidió qu´ingresares nel Hospital Francisco Franco, ellí polo menos taríes lloñe de les males noticies que, a diario, recibíes d´Eta, Frap y Grapo.
Al día siguiente empezaron les visites, pimeros Arias Navarro, presidente del Gobiernu xunto a José Antonio Girón de Velasco, al mediu día ´l Príncipe d´España, don Juan Carlos, que te treslladó ´l sustu que tuvo al recibir la noticia pero que´ensiguida vio que dibes alicar pronto. Xunto al Príncipe entró doña Sofía, la que tabes seguru diba ser una buena reina. El nuestru xenru, Cristóbal Villaverde, llegó a Madrid dende Manila a les 48 hores y dempués de manda-y más de media docena de telegrames avisándolu del to ingresu, la verdá ye que nun sé que facía en Manila, Cristóbal yera ´l xefe de los tos médicos personales. En llegando esaminóte y nun-y dio importancia al edema, pero ´l casu ye que l´edema nun pasaba y que sufristi dos pequeños percances cardiacos. Los ministros falaron con Arias Navarro sobre la conveniencia de ceder los poderes de manera transitoria a don Juan Carlos.
P´Arias Navarro, conociéndolu como lu conozo, ye como si tuviere matándote, Paco.
Cuando entro nel to cuartu entró enllenu llárimes, hasta tal puntu que lu mandasti secase. Arias ye un blandengue. La noticia del to cese de mandu, anque transitoriu, nun sentó bien a Cristóbal que mantuvo una engarrada al altu la lleva con Vicentín, el to amigu y médicu personal de siempre.
Pero la calma reinó y el 30 de xunetu salisti del hospital que llevaba ´l to nome pa El Pardo, onde preparemos el viaxe al Pazu de Meirás onde díbemos pasar el branu. Yera ´l principiu del fin.
Y agora qué va pasar conmigo, Paco. Porque la viuda d´un rei sigue siendo una reina. Pero….
¿En qué se convierte la viuda d´un dictador?
¿Van permitime siguir viviendo n´El Pardo?
¿Van siguir tratándome col mesmu rangu?
¿Va vengase ´l futuru rei de toles ofenses y humildaciones a les que lu sometimos la familia ´l dictador?
Y los españoles, Paco. ¿Qué van facer agora que morristi?
¿Van ser capaces los militares de contener a los españoles o van van los horrores de la guerra civil?
¡Por qué me faes esto, Paco, por qué!
(Silenciu curtiu, sollutando)
Nel pazu, na to Galicia natal, te sentíes bien, lloñe de los problemas de Madrid. La verdá ye que toos pensaben que cascabes. Paco, que nun salés d´esa, pero a los 55 díes recuperasti ´l poder. Taben toos equivocaos. Cuando-y comentasti al Príncipe vía telefónica y a los dos díes de la so visita, que volvíes a tener los poderes, esti paeció enfadase.
¿Pero quién yera él pa enfadase contigo?
Lo primero que ficisti, Paco, nada más recuperar el poder, foi ordenar la execución de tres militantes el Frap y dos d´Eta.
La nueche que precedió a les execuaciones cenasti poco y mandasti que nun te molestaren demientres el sueñu.
Esa nueche llamaron reis, presidentes, toa clase de personaxes importantes pa pidite que perdonares a esos asesinos de neños y muyeres. Llamó hasta ´l Papa.
Quiciabes debisti dexar con vida a esos terroristes pero diba ser un xestu de debilidá del réxime.
Dístime tolos telegrames pa que los guardare, coles firmes de tantos famosos, sabíes lo que me presten eses coses, gracies, Paco, nuca te les diera.
(Va mirándolos y nomándolos)
El Presidente de la República Italiana, la Reina d´Hollanda cola so firma infantil, ¡Valery Giscard d´ Estaing! El Rei de los belgues, … el de los daneses…..el de los noruegos…. el canciller alemán, el doctor Kissinger, esti xudíu siempre metiéndose onde nun lu llamen…. el masonazu de Mitterrand, el conde de Barcelona, los fíos de Picasso…. Richard Burton y Elizabeth Taylor…..
A los pocos díes mandasti al Ministerio del Interior organizar una gran manifestación na Plaza d´Oriente, facilitóse la llegada de xente de toa España que vieno en trenes, autobuses, camiones y a la que se-y dio comida y dalgo de dineru por acudir. Mandasti que se gritaren dalgunes consignes contra Los Borbones. Foi ´l día 1 d´ochobre, la plaza taba llena. Más d´un millón d´españoles. Cantóse ´l Cara al Sol y gritos contra Eta, contra ´l comunismu, los xudíos y Los Borbones…..
¡Nun queremos apertura, queremos mano dura!
¡Franco, Franco, Franco!
A los pocos díes diote un infartu, anque Villaverde dexólu n´amagu d´infartu. El mesmo s´encargó de preparalo too n´El Pardo pa que t´atendieren.
Hassan, el rei de Marruecos, conocedor del to estáu de salú, convocó la Marcha Verde pa recuperar los territorios marroquinos. El to estáu de salú foi agravándose. Edema pulmonar, un estómagu reducíu a la metá, insuficiencies cardiaques y hemorraxes gástriques fueron rematándote Paco. Güei, 20 de payares de 1975, morristi. Y qué difícil foi pa ti morrer.
Muncha xente brindó pola to muerte, me dixeron.
Tamién los hubo que rechazaron brindar pola muerte d´un español, y el Príncipe don Juan Carlos debe tar agora en la Zarzuela esperando noticies. Nun sabe si la Guardia Civil va llegar pa detenelu o pa lleva-y la corona nun coxín.
Y agora ¿Qué? Paco. Agora qué va pasar con España.
A la muerte de Franco, el Rei don Juan Carlos I nunca la presionó pa qu´abandonare El Pardo. De fechu, indicó-y que podía quedar el tiempu que quixere. Unos díes dempués de la so investidura, don Juan Carlos I concedió-y el título de Señora de Meirás y a la so fía Nenuca, el de Duquesa de Franco. La Señora vivió dos meses y mediu n´El Pardo. Demienstres empaquetaben en caxes xoyes, antigüedaes, cuadros, tapices, los papeles de Franco… too ello pa llevalo en camiones a propiedaes de los Franco n´España o refuxos seguros del estranxeru.
Dalgunes coses yeren propiedá de Patrimoniu Nacional, pero naide lo controló. El día de la so partida, doña Carmen Polo lloró y dempués la guardia prestó revista y sonó l´himnu nacional. Grupos d´ultres s´axuntaron na carretera gritando:
¡Franco, Franco, Franco!
Y cantando l´himnu falanxista Cara al Sol.
El morriendo El Caudiellu, la familia Franco pasó a ser inmensamente rica. La Señora foi a vivir pal pisu que tenía nel centru de Madrid, enllenu lluxos. Tenía un cuartu cubiertu dende ´l suelu hasta ´l techu por 40 columnes de 20 caxones estrechos que conteníen, de manera desordenada xoyes. Los regalos de 40 años de dictadura. Y ehí solo taba o menos importante, lo de valor taba nos Bancos. Dióse-y una pensión que doblaba lo que cobraba ´l Presidente de Gobierno por ser viuda del Xefe d´Estáu anterior. A pesar d´esto se-y sentía dicir:
“Menos mal que Paco nun llegó a ver lo que ficieron conmigo. Quitáronme ´l coche, parte de la escolta y m´echaron d´El Pardo. Too ye ingratitú”
A la familia directa de Franco, por muncho que la so hermana lo solicitara, nun-y dieron nin un recuerdu, nada de nada.
Los papeles de Franco paez, solo paez, se destruyeron na quema del Pazu de Meirás del añu 1978.
Carmen Polo de Franco vivió munchos años, hasta bien entraos los ochenta. Vivió 88 años. A la so muerte vendiéronse les sos propiedaes, antigüedaes y xoyes.
Enterráronla n´El Pardo, en terrenos pertenecientes a Patrimoniu Nacional. Ente les persones que pasaron pela capiya taben: La Reina Sofía, Carlos Arias Navarro, José Solís, Manuel Fraga, Blas Piñar o Mariano Sánchez Covisa. A la ceremonia del entierru acudió don Juan Carlos I y doña Sofía, se cantóse l´himnu falanxista, el Cara al Sol y otra vuelta se gritó:
¡Franco, Franco, Franco!.
Teatru n´asturianu.
Bones nueches, mio xeneral. José Ramón López Menéndez. (Premiu Carlos Alvarez-Novoa).-
Comentarios
Publicar un comentario