Puerto de Somiedo-Braña de Sousas-Valle de Lago.
Carta cierrada
Cuntábamos qu´el pasau día 28 sería, á non dudar, uno d´aquesos dís d´escoyíes sensaciones, un día de abonda folixa, pa char á un llau el aburrimientu y les munches desazones que per de cuntau mos afrellen l´alma y amárguenmos la sistencia, ya ella de per sí non pocu desdichada.
Dame pena cuntar lo que pasó.
Si yo fixera con estos mociquinos, y les guapes llanisques otru tantu, cayíame la cara de vergüenza.
Peru, anque tou vaya pel mesmu llau,non chémos la soga antes qu´el calderu y vamos per partes.
Peru ¡ay chachu! si te digo que non puedo escrebir.
To pensando sin parar en dos llanisques, d´allá de p´hacia ´l muelle, en sos güeyos gayasperos y sesgaos, en so porte de reines, en sos centures cuasimente más delgaes que civielles en…¿pero qué digo? ¡to soñando! ¡Quien mete á un aldeanu á falar d´aquestes coses!
Llegó ´l día que te cunto; preparóse tou;axustóse la música y una lluminaria tan llujosa que metía mieu. A les nueve ya taba tou el mundu n´el paseu. El munchu llujo desllumbraba. Tabes á lo meyor mirando una neña guapa, entusiasmau, y lluego otra. ¡Claro ta, non hay delguna fea!
Dexóse oyir la dulciquina música y saltaben de gustu ya les moces.
De bones á primeres paró tou y armóse pe lo baxu un cuchicheu delque pudi enterame per dos moces de xunta ´l mió pueblu que fai un mes están equí tomando baños, á tres per día, como les cabraliegues.
-Entós-dixi-¿qué ye lo que yos pasa que non toquen?
-Usté vió otru tal, cristianu. ¡A quien se-i ocurre! ¡el demoniu del hombre; pos non tuvo mala ocurrencia!
-¿Peru q´asocede?
-Nada, hom, nada. ¿Paeci pocu? El diantre del alcalde que s´empeña agora que non hemos bailar.
-¿Entós?
-Porque diz que s´allevanta munchu polvu. ¡Vaya por Dios! ¡qué desculpes más probes!
-Tiés razón, neña,-dicía la otra- cunto yo pa min q´aqueso remanez d´otru llau. Pue que lu molestara á elli munchu ´l polvu.
-Tendría mieu que se-i metiera pe les ñarices.
-Pos qu´estornudara.¡Y miá que mal- vendría! Aforraba de tomar rapé.
-Non pos lo que yo no-i lo perdono, mialma. Miá pa qué me valió perder el bañu y la misa por tar toa la mañana del Señor chando un gordón aquesta saya, pos traía ´l otru esfilachau dend´el día que bailé tantu na Vega la Portiella.
-Y yo, muyer, que no más cuntando con esto merqué los zapatos de lona. ¡Qué necesidá tenía de gastar los catorce rialicos.
-Y agora que vais facer, neñes?
-Que se yo. Dir pa casa dándoles lo mesmu que viniemos.
-Y allá van en efeutu co les sayes apertaes en puñu, chando pestes y maldiciones de quien d´ aquel modu yos robaba la folixa.
Dimpués hubo chiflos, gritos y protestes. Paró la música; mataron la lluz á propiu intentu y ficiérense munchos comenterios.
Conque ¿qué te paez, amigu Gaspar? ¿Verdá que tuvo mal fechu? Seguru qu´el alcalde de nuestru pueblu non facía otru tal anque ´l mesmu San Roque-i lo mandara.
Non te digo más. Recuerdos de les dos neñes de xunta ´l muelle.
¡Si viés que guapes están!
Cuando toi xunta elles non hay allegría q´á la mía podia comparáse.
¡Solu falta agora qu´el alcalde me quite de pasiar con elles pel parque por si llevanto polvu.
Cuco. El Oriente de Asturias. Llanes, 3 de Agosto de 1907. Nº 1.157.-
Comentarios
Publicar un comentario