Ruta: Boo-Collado Espines- La Cobertoria
Cosadielles
Como si fos cornexa o esperteyu
Ñunca mira pal sol nin busca ´l día;
Pero de nuiche pa ´ llumar el güeyu
Chupa sain o aceite ´n demasía.
Y´un caxellín de fierru ñarigudu
Con espinazu llargu p aqu´ estea
Enriba ´l somerau como ´mbudo
Con ganchu pa colgalu ´na parea.
Pe la ñariz afumia con llapada
Si ´n bandullu contién aceite abondu;
Pero la mecha ha tar bien empapada
Y ha de vivir chupando de bien fondu.
El qu´entra ´una tenada o ´na panera
Sin elli ´ncesu non verá ´l camín,
Y pa mirar lo qu´hai e ´na masera
Sin tal recursu non se ve ´l tocín.
Direvos qu´ ha tener doble fondu
Pa que recueya ´l caldu que bazcuya,
Y además que so culu ye redondu,
Chaplau per baxu que si non pinguya.
De les señes que dí naide se quexa,
Al que lo acierte i llargaré un pernil.
-Señor Xuan, debe ser la candilexa,
Esa será la fema del candil.
...........................
Dos coses de maera ´ furacaes,
Que pa ser bones ha de ser de faya,
Y que pe ´riba tan pintarraxaes
Con garabatos fechos a navaya;
Pe la proa ternán pieu ´spurriu
Como faluches pa furar pel agua;
La popa redondiá com´ un cacíu
Porque ´nella ´l calcañu non se xagua.
¿Non sabes lo que ye? Lleven tres pates
Pa que con broques espotriellen folla
Y valen más que les alpargates,
Anque por corretiar críen ampolla.
Son ´galoches ¡mal añu pal pecau!
Gritó Manín: non hai meyores señes.
-¡Barájoles! tas mui enquivocau,
Non acertesti ¡borricu! son madreñes.
Pachu ´L Peritu.
Revista Asturias. Habana, Marzo 27 de 1921. Nº 346.-
Comentarios
Publicar un comentario