Camín Real de la Mesa-Pto de San Lorenzo-S. Martin de Odes

Textos:
-Veraneu baratu.
-La enfermedad.
-Musa asturiana.
-Diálogo de dos payos en una taberna de Oviedo.

González, José, Presi (1908-1983)

Veraneu baratu

Agora miá! ¡Non, si lo qu´está de Dios á la mano se vien, y non hay que dai güeltes! ¡Non hay bien que per mal non venga.

¡Estáte  como yó once dís  completos atenazada  contra ´l fierru la cocina iguando fartures  y chamuscando la barriga; tarázate los cadriles  acarretando agua, porqu´ en mió casa non hay  otra que dalguna gotera  cuando llueve:  echa ´l día llavando diez sábanes, y llimpia  tres neños que non chasti  tú al mundu… pa esto, sí  Dios, mío pa esto! ¡Maldita  sea mió suerte  perra!

Non, si ya lo barruntaba yo desmasiau, porque tengo un güeyu pa estes coses  que no me lu merezo.

Cuando en la calle de Jovellanos decía esto á Matilde, la probe Domitila  la de Infiesto, gruesas lágrimas  corrían por sus arrugadas mejillas, que  maquinalmente enjugaba, entre uno y otro suspiro, con las sucias puntas del  delantal.

-Ya ves, muyer,  decía la roncha que sacará  un pufu  de deciseyes duros á una probina como yó.

-¿Pero fó tantu?

-Sí, fiyina, sí.

-¿Deciseyes duros completos?

-Ni un perru menos.

-¡Vaya por Dios!

-Y juera d´esto les desozones que pasé por tratálos lo meyor que pudi; tou el santu  día del señor  aventando; non daba  la ida po la venida. Agora  de  tienda en tienda; dimpués  camin de la  pescaduría, andaba com´un  abeyón. Cuando que querín comer  de fiambre, cuando que ya yos  enfastiaben les parroches, ó ya  que si les sardines eren grandes y tenín mucha escama…, ¡Yó sí que debí tener escama de eses  doncenaes  fuera ´l alma!

Miá que marcháseme  con deciseyes  duricos, ye cuanto el  diañe puede descurrir!

¡Non, lo qu´es, mialma  ché  bon veranu!

En  cuantes  que volvia de Lieres el mió Ramón  y s´entere  de tou  ¡güena l´armamos!  Elli qu´ estuvo ´l probitin aforrando tou el mes  pasau pa poder mercar  una tixera  y una camuca de fierru, ambes á dos en la metá  de usu pa poner un par  de cuartos mediu decentes y poder arquilalos como Dios manda……

-¡Miá qué milagru!

-Y  sacayos bones perres,  pa que lluego vengan el caray d´unes  famiones  tirándoseles  de madrilanes, con unos sombreros com´ un sardu,  mal comparaos, á  comer el sudor  á una probe….¡ye  pa que lleve ´l demonio á cualquiera!

-Tienes razón, muyer.

-Ca vez  que lo pienso amorio.

-La cosa non ye pa menos.

-¡Qué va ser de  mín,  fiya ´l alma!

-Vasta, muyer, non t´ apolmones. Pero atendi p´ acá:  elles andaben bien portaes.

-Era per juera.  Pura  aparencia. Allí onde les vís, non  tenin otra consolancia  que los cuatro  trapos que llevaben puestos por non cargar -como dicín- co los baules;  pero, sí, cuerri p´ allá. ¿Tú sabes? Traín  unes sayuques blanques con unos insiertos de pontilla    d´esos  de quita y pon,  que cambeaben  ca dos dís  pa ensiñales per baxu daqué  blanques.

-¡Nunca  otru tal vi en los dís de mi vida!

-Si lo que non descurren eses  condenaes,  non lo descurre  el diaño!

-Y cómo metisti ´n casa  eses pejes?

-Verás, muyer;   recomendómeles Perfeuta, porqu´ ella y´  había arquilau. Túviles once dís, como te cunto, y el martes á eso de les nueve,  salieren cargando co los críos.  Dieren les diez, les once, les doce, y non había cuenta d´elles. Yo esmolíame  d´ afechu porque ya taba poniéndose duro como un peñu un trociquín  de carne mechau,  con unes  patatines, qu´era una  bendición. 

Canséme d´ esperar; saquélo  q´ atrás pa  que non s´ apegara ´l pote; coyí la manta,  chéla so los costazos y díme á buscalos; pero ¡ónde tarín ya!

-¿Non los topasti?

-Nin tuvi  cuenta d´ellos.

-¿Y nada t´ habín  dexau en casa?

-Como dexar, dexárenme  una maletina de mano que non pesaba muncho que digamos, y la  que non quisi abrir  tan y mientres que delantre no estuviés  dalgún monicipal.

-¿A qué asuntu?

-Por si ´  ella topaba  daqué cosa non  veme  comprometía.

-Bueno ¿y  dimpués?

-Vino aquél  y entre los dos xurgamos y  xurgamos hasta facer  saltar el  piesllu.

-¿Y por fin?….

-Aquí,  Domitila,  dió un prolongado suspiro, tornó á  limpiarse con las puntas del  delantal, y exclamó:

-¡Por fin…. non había dientro más que  tres postales d´un mozu de Xixón y dos puñaos de crepé!

¡Buen pago para once días de manutención de seis personas.

¡Probe muyer.

Gijón. 1907.- Triquiñueles. J. G. Lueso (Cuco).-

LA ENFERMEDAD

Amiga: estaba tumbadu Cuando recibí tos lletres, Les que en medio de miós males, Llácares y pataletes, M ’ asentaren muy al cuayu Y me vinieren de perles, Pos por tuyes un algaire Y un cordial a fayé n’ elles. Yo en retornu te debía Una retafila allegre Del viaxe de les rapaces Con so salsa y con so pebre; Pero, creme , q ’ aun ño estó Para gastar estes fiestes: Pos para llances de gorxa Con dixes y perendengues Y e menester otru puxu, Ye necesariu otru temple Muy destintu del mió humor, Que me tien fechu un vederre. Lo que puedo fer agora, Atentu el estau presente, Ye con colores paxizos Y con sombres verdiñegres, Pintáte de mió pelona Les matuxes y llaceries.  Mas, mira, que non lo fago Para que te me entristezques Nin llores como acostumbres; Si ñon pa que te entretengues, Pos fasta de les ortigues Saquen la miel les aveyes. Cuantu mas que to añadite Al fin miós convalecencies, Porque, pos sabes miós males Tamien de miós bienes sepies. Vamos, atendi, que empiezo En sin andar en más xeres. Mió fia, estó fechu un sacu, De sapos y sacaberes, De escorpiones y alacranes, Basiliscos y culiebres; Porque ño acabo d’ echar De min, anque lu escorrexe Un demoniu d’ un dolor Que me fai ver les estrelles; Y por más que lu conxuro Está siempre ten que tienes. Dolor, que ñeciu m’ obliga A facer mil bicoquetes, Y arróllame por el suelu, Tirám e pe les paredes, Andar á picos picaños, Y al pizopé angunes veces, Espernexar, dar corcobos, Romper sielles y tauretes, Con otres mil xerigonces Y doscientes xigomencies. Dolor, que me fai andar  Fiendo visaxes y mueques, Los güeyos arremellar, Ceyes agurriar y frente, Torcer ñariz y focicu, Arregañar bien los dientes, Esmordigañar los llabios, A soplar de los dos fuelles, Esperezóme, vociar, Y otres doscientes ximuestres; Q’ apuesto una pe de barru Y e un gustu de Dios el veme: Dolor tan desesperadu Que me pon fechu un bederre. Les quexades se me franchen, Les vidayes se me fienden, Sesos y cascu me salten, Los pelos se me enderecen, Los costazos se me fundien, Les costielles se me quiebren, E l cuerpu se me respiga, Les llágrimes se me suelten. Dolor, que á ñaide dé Dios Nin á los perros dolientes. ¡ Dichosu aquel que se viera Sin mueles, dientes, nin melles! Pero cuando yo pensaba Que en aquestes menudencies El mal se quedaba, entró Otru d’ otres cantaletes De non menos llicantines, Y de piores consecuencies. Isti humor ó puzcalabre Non contentu con facéme Todos los güesos gañipos Y toda la boca estielles, Se m’ abaxó al gorgoberu, Y apretando erre que erre,  Cerróme á rozu y palones Del pasapan les voleres. ¡ Ay, mió gloriosu San  Bras, Y qué apretures aqüestes! Entós, ya se vé, tomados Aquel les correspondencies, La cabeza prevalica,  Pónse amoriau el calletre , Los güeyos se m’ encandilen, Les palabres non se suelten, Abrásense les corades, Los polmones arrebienten, El corazón s’ entrastaya, Los pulsos se desconcierten: Todo agüele á concluídu, Todo á mortiza arreciende. Y , mir’ aquí, que el que yera Un toru con banderetes, En un dame acá eses payes, Y a se ve tumbadu n’ elles; Y aquel que gastaba plantes Ya non puede facer piernes. El home que co los g üeyos Tragaba toda la xente, Agora los tien cuayados Y tan parados les ñeñes, Que lo que puede ye solo Mirar á todos en tientes. ¡ Hay del probe que ñació Suxetu á tales miseries! La vida tien en un tris Y en un si xerve ó non xerve. Agora yo me feguro Que tu t' eches estes cuentes: Que al veme tan mal parau Todu yo fechu una peste, Entra el potru-medicatu Con sos paxes y corchetes Y , echándose sobre min Com’ unes utres famientes, Desalforxando sos chismes Entre dimes y diretes. Me esfarrapen á sangries, Me destocinen á esfriegues. Me chamusquen con ventoses, Con baños me despelleyen, Con xiringazos m' esfonden, Con supedanios me tueyen. Con agües me desbauticen, Con untures me esfelpeyen, Con emplastos me taracen, Con gataplasmes me afrellen, Con parches me destapinen, Con cantárigues me esfuellen. Que, dempués de habeme fecho Un desfolladu paciente Y e smielgádome pol chiste A tarrón les faltriqueres, Me dexen al ventestate Allá rumiando entre dientes, Como el que abandona un burru Metánes ó nes xuncleres A Dios á suerte y ventura, A si muerre ó si non muerre. Pos non, fía, non fo ansi: Antes lluego que supieren  Miós penuries y miós cuites Acudieron delixentes El mélicu y ceruxanu Dispuestos á socorréme Y , como bonos amigos, Fixeron lo que pudieren. Diórenme un par de sangries, Untáronme con aceite, Non s’ apartaron de min. Y pa llavar les mexelles Con yerbatos y mestranzos, Unos enxuagues fexeren. Con esto y co la pacencia, Y con Dios, que cuando quier De todos los vientos llueve, Comenzaren afloxar Del gaznatu los bruchetes. ¡ Oh fia! ¡ q' estadu aquisi Del otru tan diferente! Desde entoncia tomo fuelgu, El espíritu se estiende, Eos conductos se suavicen,  Les entrañes se refresquen, El polmón se desenrolla, El pulsu se desencueye, Pónse fita la cabeza, Despávilase el calletre Y , en fin, todo n’ un instante Se pon en tonu corriente. Mas cuando yo maxinaba Poder entre ñorabuenes Salvu de la gorruñera, Y sanu de carrasperes, Contentu estar com’ un cucu Y com’ unes castañueles, Comer com’ un descosiu, Beber com’ un reguilete, Vuelven les excomulgados Y malditos de les mueles (Mal desoñizu les pose, Males teñaces les vuelen), A cantar so palinodia Faciéndose mui de nueves. Así ye qu' ostó obligadu Aguardáme entre mantielles Fasta q’ asiente la sangre Y los humores s’ aquieten. Con todu, como ayuno Tantes semanes enteres, Por mas que les mueles chillen, Por más que á les mueles pese, Anque rabien y anque griten, Rebienten y desesperen, Mamo torrendos d' á palmu, Escancio sendos chisquetes Y paso una vidiquina D’ un abad ó un presidente. Pásalo tu bien tamién: Y Dios permitia que tengues Xunto co los tos Antones Unes pascues mui alegres, Que ansina te lo desea Aquel amigu de siempre Que lo fue, lo ye y será Fasta les Ares, do veres. D. B R U N O  F E R N Á N D E Z  C E P E D A.-

Musa Asturiana 

La Danza

Con chaleco de cien picos, 

faja colorada y nueva, 

los calzones de pedrosu

y terciada la montera, 

arrebálgase Perico

ena danza, y llancia fuera 

del pechu ijujú tan grande 

que plasma tóa la rueda.

Les moces mírenlu tienres,

pos ye de xentil presencia,

y tien  tierruques de suyo

y muy bones po la renta.

Non hay fuu más derechu, 

nin boca más pedigüeña,

nin cintura más lliviana,

nin cara más gayaspera,

nin güeyos más faladores 

nin voz más regusta y fresca…..

en fin, ye tal, que barrunto

que utru Perico non hebia.

Ye nel mirar más llambión 

que una gata  balboniega,

y es escurrir picardíes

atrás al raposu dexa.

Más que diez homes de cuayu

fai él solu nun ´andecha,

y cabruña el so gadañu

sin dexai castra de muezca.

Fora Sansón un enxencle

d´isti  rapaz a la vera; 

y aunque al añu  se tosquila

de veces una docena,

fai ceniza un regodón

y esmigaya una pertiella,

pos más que puños, los suyos

son porrones  en concencia. 

ye nalando  un esguín rial, 

com´ un algu na carrera,

y naid´ en blincar bardiales 

y aventaxa en lixereza.

Onde afinca el so calcañu

nin rastru  de tapín queda,

y al mirallu  con tortoriu

el cuayu al más finu tembla.

Non sabe lo que ye miéo…..

po les bones ye una seda, 

mas po les males….¡carape!

el que lu busca lu alcuentra.

Ya, galvaneros, los mozos, 

como la flor se ximielga

cuando el fresquillín del monte

muy sele, al colar la besa,

anden pa trás y pa lantre; 

ya llevanten la cabeza; 

ya taramiellen y griten

o dalgunu s´enduviella

echando la zancanía

al so vecín, que na tierra 

dexa el molde del renaz 

o designa una vaniella.

Ya, lo mesmo que nel prao

de xatos una parexa 

reviciando,co los cuernos,

el unu col utru enrieda, 

lo mesmo xunt´a Perico, 

la xente se engarapiella, 

y a lluego siguen cantando

¡mal haya una mala llengua!

El non fai casu de naide; 

sólo fala co la neña

que va agarrada del deu

de la so mano derecha.

Ye blanca como la lleche, 

son sos güeyos dos lluceros

y so boca una cereza.

Tuércese com´una blima

cuando el vientu la solmena

y ensiñ´al falar los dientes

tan blancos como la perla.

Fai pocinos al reíse

enos dos papos, y al vela, 

no hay home nisti mundo

que non quixera mordella.

Ye llista com´una xana…

trabayadora y artera, 

ye una paya la fesoria

en sos manines de cera.

Canta com´una xiblata 

la bendita Madalena;

si un roble podiés oilla

ponse tienru y empapiella.

Más molleres se fendieron

por querer falar con ella,

que quede cuntar de pelos 

en so abundante guedeya.

Mocáis, trescientos mil; 

tellerones, non hay cuenta 

los que se dieron los mozos 

mil veces a so presencia.

¡Bien lo merez en  verdá….!

¿Non ye honra pa cualquiera

perder por neña tan guapa

les narices o una oreya?

Non va vez a romería

que non s´entame quimera

y haiga más escalabrotes 

que cuetes hebo na fiesta.

¡Dios ena gloria la tenga!

y como diz el refrán,

“de bon árbol bona estiella”.

Quiérense  los dos rapaces;

¿qué muncho ye que se quieran 

siendo Perico tan machu

y Xuana siendo tan fema?

Mas golviamos a la danza, 

qu´el diañu, que nunca fuelga, 

fexo lo que fai mil veces, 

que a palos se desfixera 

Entamen nuevos trebeyos; 

canta la xente contenta 

hoy día vale quien tiene,

verdá  que non tien rempuesta.

De la parexa cercanu

va Xuanón de la Caleya, 

muy temíu nel conceyu,

pos ye d´entraña muy negra.

Ya vió de cerqu´ el focicu

más d´una vez en audencia

al siñor xuez, por la mor

de cortar co la foceta

les narices, en Andorcio, 

al fiu de Pín d´Andrea,

porque  birlando, tirólu

y estrapallói una deda.

Llocu está d´amor por Xuana, 

alloriau cuerre tras d´ella,

sin llograr  nunca el mazcayu

oilla falar siquiera.

Al mirallos como entrambos

gociaben en so presencia, 

entroi rixu d´entamar 

col so rival una griesca.

La sangre de sopetón

púnxosei na cabeza;

¡yeren celos! ¡probitín!

que güelven llocu a cualquiera.

Esperó qu´el bon Perico

golviés a falar con ella, 

y cuando lu vió agachau

garrólu pe la chaqueta.

-Todos los mozos- i dixo-

que vez danzando na rueda, 

se taracen les coráes

al vete tanta fachenda.

Déxanos en paz, borricu,

sálte a galantiar a fuera, 

anque pecao mortal

ye que t´escuche esta neña.

Non la mereces, porcaz;

dime si tienes vergüenza, 

¿a qué mozu d´un tochazu

fixiste besar la tierra?

Por enxencle non t´apurro 

metanes ena mollera

un palu qu´en remeducos 

te desfaiga la montera.

Fuxe de la danza, pitu,

que si como das la llengua 

dieres palos, dau el casu

podieres gastar fachenda.-

Fartu Perico d´ oillu, 

pálidu como la cera,

blinca p´atrás, y el civiellu

fai reflundiar en so diestra.

Sin dicéi “voy a purrite”,

sin avisallu siquiera, 

diói un palu na vidaya

que lu dexó  muertu en tierra.

Al mirallu  retorcese,

como fai la llagartesa,

si metanes en el ráu

sei piega con una piedra,

fuxó la xente plasmada; 

lluego la xosticia llega 

llevando presu a Perico

y al calavre  pa la iglesia. 

Tres años que presu xime; 

cinco i falten de condena,

y cuando  la xente danza 

llágrimes vierte una neña.

Teodoro Cuesta. 

Asturias. Revista gráfica semanal.  Nº 21.- 20 de Diciembre de 1914.-

Diálogo de dos payos en una taberna de las inmediaciones de Oviedo.

Blas: ¡Quiái Domingu! Bienveníu.

¿Cómo te foi per allá?

Dom: Foime bien pero non pude 

munchu dineru axuntar, 

porque fonon cinco veces

les que oí recetar

Sacramentos, porque ya

decín que iba a espichar.

Blas: Y lluego ¿cómo pudiste 

el venite para acá?

Dom: Porque yo solu quiería 

venir murir al llugar

para que pudiés mio padre

acompañame a enterrar.

Blas: Pos vienes mal, porque casi

estoy per asegurar

que de toda to familia

habrá Pachón ya no más.

Dom: ¡Home, déxesme aturdíu!

¿murió mio padre, mio ma, 

los mios hermanos, los fíos

q´eren tantos en verdá, 

y la mio muyer tamién?

Blas:  Y casi todu el llugar.

Dom:  ¿Foi en la guerra o qué foi?

Acaba, dímelo Blas.

Blas: Ojalá que fora ansí

(y non te parezca mal)

q´entonces morín per Cristo

y agora per Satanás.

Dom: Pos ¿qué foi? Fala más claro

sin nenguna escuridá.

Blas: D´una frebe condergada

que se vieno per acá

sin saber cómo nin cuándo,

y acaba co la ciudá.

Dom: Y los méricos ¿qué faen, 

que non la obliguen marchar

donde ´l diablu non la vea

non güelva a facer más mal?

Blas: Mingu, non me lo preguntes

q´acabo de confesar

y para decillo todo 

ye preciso mormurar.

Dom: Yo creo que non mormures

como fales la verdá.

Blas: Dices bien, pero non puedo

falar d´ellos sin estar 

enfadáu per un ratu,

y esto ye malo quiziás:

además, que si lo saben

y me da la enfermedá,

son capaces ellos solos 

mandame vivu enterrar.

Dom: Cáusame risa, compadre,

el oíte ansí falar

con tantu temor y llercia 

¿Si ´stás vivu, tienes más

que decir que non t´entierren:

que toabía quies andar 

pe los mercaos d´Uvieo

y dos pucheres echar

co los otros prestameros?

Y todo ello se fará.

Blas: Si ellos a mí me dexaren 

el podello  ansí mandar, 

non yos tubiera yo miedu

y los dunviara a pasiar:

pero puede que me corten 

la llingua, y entonces ya

non puedo quitar que manden 

los que tengan voluntá.

Dom: Non yos dexes tú cortalla

y ansí acabao está ya.

Blas: Pero, home, ¿paezte a tí 

que con nabaya será?

Non lo pienses q´ellos sólo

con melecina lo fan;

que me dixo un escribanu

yera tanta so maldá,

q´en unu d´ellos había 

papel… Meyor ye callar

y falemos d´otra cosa

que non faga mormurar.

Dom: Non sé lo que m´asocede:

vaya un tragu y non pensar

en la muerte, q´ella sola 

nos dirá…. veníi acá,

sin q´a buscalla vayamos.

Blas: Déxate de beber más, 

y volviámos pa casa 

que ya ´stá cerca el llugar,

y te contaré entre tanto,

sin que me vólvia enfadar,

lo que con ellos socede 

lo mesmo q´el pe a pa.

Antes que tú te marchares

sólo había en la Ciudá

dos Dotores, y eso entonces 

se asistía con caridá.

En el día ya son cuatro; 

y so los van a buscar,

todos dicen “non me toca, 

vayan a otru a llamar”.

Señor (si hi diz algún probe)

por Dios, que ya va a espirar.

“Pos que espire:  llame al Cura

que yo quiero descansar”

Dom: Serán acaso Xudíos

q´a todos quedrán matar;

o quiciá serán franceses 

d´en casa de Satanás.

Blas: Eso non, despaciu, amigu,

que tres son de per acá,

y el utru ye campesinu,

yo non sé de qué llugar.

Dom: Non da más, sigue contando,

porque me quiero informar

por si a mí me da la frebe 

a quién tengo de llamar.

Blas: Yo non creo que dempués

que me lo oyas pintar,

anque te dé  la maldita 

ningunu mandes buscar.

Dom:  Pódia ser q´ello ansí sea:

pero escomienzo a escuchar

Blas: Pos óyeme con cudiao

que ya vo a prencipiar.

Unu d´ellos, el primeru,

a quien mantién la Ciudá,

entra en casa d´un enfermu

y sin llegalu a pulsiar,

desde la porta pregunta:

“¿Qué sientes?¿Cuánto ha q´estás

malu?  ¿Duelte la cabeza,

y hay ganes de gomitar?”.

El probe enfermu con esto 

al ver tanta sequedá,

sin saber qué respondéi

y pensando que se va, 

dici que sí, y él entoncies

con muncha  severidá 

dici: “frebe; vomitivu,

agua fresca y nada más.

Ea, adiós, hasta otra vez;

yo volveré per acá”.

“Señor, faga la receta

para felu gomitar”.

“Non hay pacencia par´esto:

¿si ye probe qué i to dar?

Qe gomite como pódia;

si usté pudiera pagar”..

“Señor, soy una infeliz

que non lu podré aguantar

para poder sostentallu

cuanto más para pagar”.

“Pos si é probe, querida, 

yo non lu puedo curar:

pero oí q´un boticariu

lleváu d´humanidá

daba a los probes de valde

lo que podiesen gastar,

y la xente que trabaya

la metá de lo que val”.

“Póngamelo per escrito

so Mercé per caridá”.

“Vaya a un cuerno que son munchos

los que hay que vesitar”.

Con esto toma la porta

y non güelve a´ntrar allá

hasta tres o cuatro díes,

y esto si non tarda más.

Dom:  Está per cierto bon modu

de a los probes vesitar.

puede q´isti ansí lo faga,

pero los otros  serán 

más humanos, y esto faga 

los miren con más piedá.

Blas: Pior que pior, si te descuides.

El segundu q´ahí está,

cuando toma ´l pulsu a algunu

mira siempre pa cullá.

Toa la cara se atapa,

cuando en el cuartu va entrar,

co´la capa o col pañuelu:

de suerte que cuando va 

a vesitar dalgún neñu

plásmase y echa a berrar

cudiando que ye algún trasgu

que i vien a facer mal.

Cuando sal, si lu pregunten

¿qué tal el enfermu está?

El tou seriu y fincháu

responde com´un Abá:

“El canal alimenticiu

ye menester entonar

porque según  Abicena

Buárabe, Brunk y más

autores d´esta materia,

aseguren con verdá,

cavendo porlet usare

(el llatín él lu  sabrá)

de toda la melecina

q´al estómagu va a dar,

por q´en él se descompón

y suele dempués soltar

unos gases muy impuros

q´agafen  la enfermedá”.

Les xentes q´aquesto i oyen

se queden sin replicar, 

y él mientres tanto la porta 

entamó y échase andar.

Dom:  Dexásteme tou bobu

al oíte ansí falar

unes coses q´en mio vida 

les aprendo a refrendar.

Blas: Pos oye q´aún falta munchu

y  estamos ya en el llugar.

El utru ye ciruxanu

y méricu per demás.

Todu se güelve misterios 

pero non de santidá.

Si lu oyeres  me paez 

lu ponís en un altar;

mas en sabiendo sos coses 

has tenelu per Anás.

Si lu llamen par ´un probe

que non hi pueda pagar,

diz q´está enfermu y non pode

el salilu a vesitar

mas si pa un ricu lu busquen

sal él mesmu a pregunar 

“¿Qué padez so Señoría 

q´al istante voy allá?

Dios quiera que non sia nada

porque me fora un pesar 

el vellu estar paeciendo 

anque lu pudiés librar.

¡Qué Señor tan bonu ye!

Dios lu tenga per acá.

Vaya queridu a deciy 

lo que me vio ansí alteriar

por ver que hi acometiese

esta perra enfermedá”.

Dom:  Esti, si non m´ equivoco

ye peor que los demás.

Blas: Tobía non l´oíste todo:

escucha,  ya lo verás.

Va pa casa del enfermu

y empiézai a preguntar:

“¿Qué ye lo que tien, Señor?

¡Ay probe muy malu está!

Tengan cudiao per Cristo;

non s´arrimen per acá,

les demás xentes de casa

que se yos puede pegar.”

Todo esto non pienses ye 

movidu de caridá; 

sólo ye pa q´en sanando 

lu envíe a regalar.

Dom: Bono, va, sigue por Dios

y acábame de plasmar.

Blas: Ya te dixe q´era el otru

campesinu, y q´el llugar

no lu sabía: presumo

que non sía muy allá

porque a él nunca se fo 

des que s´halla per acá.

Si lu busquen  pa dalgunu

que ve que non tien arxán

pregunta en qué cay vive 

y dempués hi diz que va 

a buscar isti o el otru

que aquel obligáu está.

Otres veces los vesita;

y sin podelos pulsiar,

receta una melecina

con la q´enterró ya más 

que los tres que ya te dixe

y non lo fixeron mal.

Yendo a vesitar un día

un Vizcainín del Fontán,

tant´ agua diz que bebió

que hi fexo munchu mal.

Los tres compañeros suyos

que suélenlu  acompañar, 

lleváronlu pa so casa

casi a la fuerza en verdá,

porque illi non quería dir

si non que quería pasiar.

Dom: Home, aspera, te soplico;

non quiero que mientas más 

de lo que ya lleves dicho.

¿Cómo s´habrá tolerar

q´ellos  abrasen ansina 

y non los habín d´ahorcar?

Blas: Todu el mundu, mió queríu

se prencipió a trabucar;

la Xusticia cara a cara 

non s´atreve a gorgutar

que puede los necesite 

y se lo fagan pagar.

Dom: Pos yo desd´aquí te xuro

a dengún d´ellos llamar.

Blas:  ¿Y si te viniés la frebe

cómo t´habís gobernar?

Dom: ¿Non conoces a Fernando

el que nos suel ´afaitar,

y tamién va a les aldees

y acostumbra recetar?

Pos como me dé, con illi

xuro a San…. to consultar:

y si me manda sangría,

que será lo rigular,

aunque sienta quedar secu

sangría con mil y más;

y si manda que me purgue,

purgaréme hasta cargar 

toda la mio parentela 

q´en paz descansando ´stá.

Blas: Ten pacencia, amigu Mingu,

y déxame ya acabar.

Yo non sé quien viendo esto 

escrebió a So Maxestá 

y el Rey como ye bon home

mandó viniesen pa acá 

dos méricos muy sabidos 

en la cencia de matar.

Dom: Pos, home, si a matar vienen, 

que se queden per allá.

Blas: Faite cargu, te soplico:

¿tú puedes imaxinar

que los méricos aprienden 

otra cosa en realidá?

Pos estás muy engañáu,

porq´ellos nin pa so pá

saben más que faramalla,

y les coses ansí van.

Dom:  ¿Y entóncenes qué facer

si acaso m´empieza a dar?

Blas: ¿Non conoces un gallegu

q´está ´n aquesta ciudá

y vive ´na Ferrería 

pasada la Soledá?

Pos isti facultativu

ye home de probidá:

y si te paez y quies

con él iremos falar

el xueves, si e nel mercáu 

nos volvemos alcontrar.

Dom: Ora, adiós, hasta lo dicho

que yo vo a descansar.

Blas: El te guarde de la peste,

y quiera que yo en xamás 

los méricos necesite 

nin los tenga que llamar,

porque xuro que nengunu

ye cristianu a la verdá.

Lletres vieyes. Lletres Asturianes. Boletín de l´Academia de la Llingua Asturiana. 

Nº 18.-