La Polina (Rioseco)
Textos:
-Dibujo de la Ilustración Gallega y Asturiana.
-¡Probina! ¿que i dolerá?.
-Enfermedá.... pesá...
-De consulta.
-La Fontica.
-Del mal al menos.
-El remedio pa la tís.
-Necrológica.
-Les coses a so tiempu.
 |
| Dibujo de la Ilustración Gallega y Asturiana. |
 |
| ¡Probina !¿Qué i dolerá?
Non hay moza en todo Asturies dende Llanes fasta Navia, que ye como si dinxera n´el cielu y e´na rodiada, tan cenciella y homildosa, tan xentil y tan galana, con güeyos tan falanciosos, que si en ´angunu se llancan paréz como si-i ficieren regolvinos en el alma; boquina fecha de rosa, que dacuando s´arregalla con sonrisuca melguera, dexando ver de pasada la blanqueza d´un dentáme que mesmamente resplándia como la ñeve so ´l vesu de la lluz de la mañana......tan gayaspera, tan xira, tan facendosa y tan maxa, como Tina de ´l Raposu , la ñeta de "La Carrancia".
|
 |
| ¡Probina! ¿Qué i dolerá?
Y dempués de lo que dixi, ¿ye mester que vos añada
que los mozos tan regüeltos dientro y fora´la quintana; que i echánon la presona más de cien,, sin ablandiála, y que non pasen dos nuiches sin que s´arme una sanfráncia d´estacazos , mochicones, reguñatos pa la cara, frayadures de banielles, dalguna manu escordiada, güeyos que sóltien el zume, molleres rotes a esgaya, pelleyes escolingando.... y otres coses de sostancia, que preben todes d´afechu la ternura que s´enciarra nos cuayos amorosinos que llaten po la rapaza?.....
|
 |
| ¡Probina! ¿Qué i dolerá?
Pos...... con todo lo que oyéstes; con sé´la neña tan guapa y trayer al retortóriu los mozos de la comarca,
sin que sépian ya, los probes que facer p´afalagála.....
Por más que tien perruques y en Faro tien una casa
con tres dís de güés corridos, que déxen bona llabranza....Con tar sobrá de cancállos pa enllenar una tenada, pos los pás, como ye sola,non fan más qu´apompollála....Con tantísmes comenencies como son les qu´ entamánga....daqué lleva Tina dientro qu´en sin dúbia l´atristaya y non ye oriéganu tudu lo que sorte na collada.... qu´al empar, tamién hay toxu y esti...... sabédes qu´escaya.
|
 |
| ¡Probina!¿Qué i dolerá?
Illa tien dalguna cosa que la trái perablucada; dalgún pesar la empabulla, dalguna xera l´ablaya........Si non, ¿per qué lloraminga na cocina, de só casa, dexando´ l llabor qu´apéria de sópitu, y enritada tira con tó de la manu y allégase a laventana
pa ensugar ellí los güeyos co´l baxeru de la falda
secando les llamirimes que i esvarien pe la cara camo pulen so les roses les perles de la orbayada?.....
¿Qué ye lo que i pasa a Tina? ¿Quián i robó la só gracia? ¿De qué sofre? ¿Per qué llora¿ ¿Qué l´amusga? ¿Quián l´afála? Pos non vos esmolezades
qu´ illo non tien emportanza Ye...... pol morde la ciebolla que pica pala empanada!!
Melecina Casera. A. García Oliveros.
|
 |
| Enfermedá .....Pesá.......
Foi ver el mélicu Lin aquexándoi que caréz de munchísima pesantez nel botiellu y l´estantín. Amirólu don Xuaquín; y sabiendo que toviera n´isos dís de folixera po les fiestes del Patrón
y que llera muy fartón, entrugói d´ista manera:
¿Non será la collugada que toviésti antesdayeri con Marcones, Antón Peri, y el sobrín de "LaFallada"
|
 |
| Enfermedá ..... Pesá......
que sigún diz la cuñada, garró tala enfastiadura que
tevo que dir el cura, pos cuntaron que morría?
¿Qué comiéste tu isi día ? Desplícame la fartura Pos verá, foi bien senciella: Pa entamar, un centollucu;
depués, fabada con tucu, xamón, tocín y morciella,
pitu, setes en tortiella, llagosta, carne estofá, perdices en empaná, quesu, flan y el cafetinu, quince botelles de vinu y, ponga tres de coñá.......
|
 |
| Enfermedá .......Pesá......
¿Y pate q, haiga razón pa facerespantayáes
perque pesen les coraes depués d´ise aforfugón
qué yos dieste, mazdayón? ¡Al degoriu del camuesu! ¡Pos, non te esmuelas per esu que, si todu sei morgazu lu chares sobre costazu...... ta dibes ñotar más pesu!!
Melecina Casera.A. García Oliveros.
|
 |
| De Consulta
Gosefa de Sidoro ´l Cegaratu, la que estremen tamién con el ñombratu de Pepa " La Turrada" perque tá encoidína y engurriada de pelleya y faiciones lo mesmo que tocín fechu turriones; tevo enguañu pel tiempu´la costera como una gurrionera
qu´a juercia ´ cavilar y esmolecese andévo bien cerquina de morrese. Gracies qu´ al fin el mal se pónxo ´n claru, pero .... non cabe duda.....¡yera raru! .....
|
 |
| De Consulta
y duru de pelar, el porreteru, pos non quedo ´n conceyu curanderu, curiosu, nin curiosa,que no i mandara a Pepa anguna cosa. Peru, ná..... Nin los parches de boñiga que i fexenon poñer e´na barriga,
ni el colgala del techu, paver si se ciarraba ansí del pechu, ni el comer nueve pioyos con verdura, por si yera tiricia la gafura, nin otres mil reciétes qu´aconseya la céncia de caleya, non prestánon pa ñada...... Illa taba cá ´vez más amolada
|
 |
| De Consulta
C´ unos gómitos qu´eren degorios, flaquecida, con foria, con amórios, en sin poder col alma de cansancio..... Ansí que, escuerre ver a don Venancio, por más e que i costaba güen trabayu, y por falta de cuayu non s´atreviera ´nantes dir a velu. Pos güenu.... p´allí foi en sin consuelu como una Madalena, ximotiando que, mialma, daba pena. En lo que i dixo, yo no me entremeto,
|
 |
| De Consulta
pos bién sabés que toda ye secreto; y el mélicu non diz una migaya nin con una pistolana vidaya. Pero díxolo Xuaco ´l de "Reverte", que taba tres la puerte escucando por una rendexina cuanto diba cuntando la Pepina: Y dempués que, la probe, aforfugada faló sin ton nin son, sin dicer ñada, añidiói al doctor peraflixia: Que algo dientru de sigu, rebullía, que taba bien segura, ñotando fasta gólpies na centura.... y... ¡era paalloquecer!pos, si llegase....¿cómo diba a esculpase?..... El mélicu , pinsó qu´ eren chocheres, perque illa tien setenta primaveres y...... por muncho que juera..... en tales años....vamos... ¡que tien redaños!.... Pos non yera la cosa maxinaria.... qu´ al pocu tiempu.....¡¡chó la solitaria!!
Melecina Casera. A. Garcia Oliveros.
|
 |
| La Fontica
Allá ´n siglu deciséyes que de glories fo pa España,
manque Oviedo tenga d´illi non mu güena recordancia, ya que non faltó nin plizca paque, el probe, amagostara pe la cunta de un formacu que arroxó de forma tala que per pocu cuéz tó ´l puelu
sigún fo la llumarada N´esti siglu que vos digo, candu entá escomencipiada, y non pongo el añu xustu perque non me asonsonanta, buxando la cái Escura fora ya de la muralla, topábase ún mesmamente de focicos c´una campa, sin que hobiés allí enagora cases, múries, nin más ñada
|
 | |
La Fontica
|
 |
| La Fontica
Aperiánonla de modu que diba fondigonada nel tarrén dos o tres metros y era mester pa algamalla baxar ochu escalerines per ende yera l´ entrada. Sortiéndo en cérculo d´elles una múria s´afayaba pa sirvir tamién d´asiento, con discanso pa l´espalda, pos rodiánonla tod´ illa per derriba con baranda. Pal mió ver, y en demenutu, talismente someñaba como placina de toros dende un tindidu de grada. Tala yera "La Fontica" d´ágoa, de tan bona castra que, sigún decín los vieyos, tomando pe la mañana dos vasinos en ayunes, yera cosa comprebada
|
 |
| La Fontica
que endenantes de cien años dengún el güellu ciarraba. Tamién cunten les estories, qu´enroscáu n´ista fontana, depués que lu esconxuránon, foi onde espurrió la pata perrabiáu y dando blincos, aquil cuélebre qu, andiába pel Monticu y alredores xintando neños a esgaya. Hay mazcatos que non creyen en isto que se rellata y dicen que yera un sáurio que trixera de la Bana o les Isles Felipines ciertu flaire...... peru.... ¡ñada, yera cuélebre de xuru! selo yo bien por Sarafa, la ñuera de Lin el xernu de Pachón el de Loriana, queye la tatarañeta del ñeru
d´ una fulana que´ llí , de cuerpu presente, vió como ´l mostru palmaba, candu empués del esconxuru
diénon-i pa que españara medio quilu d´anfileres
|
 |
| La Fontica
metidos en una pancha.... Güenu, pos hoy, de todisto
malapenes hay migaya, juera ´parte de la ilesia que ye l´unicu qu´aguanta. Del conventu, ente motines y la guerra condergada, n´istos últimos diez años todo lo llevó la trampa....... La fonte, nel añu trece, yo mesmu vi sapozála pel orden del Untamentu, que mos vieno con la gaita de si l´ágoa yera dura.......
y.... per ser amanesiada, la barriga, delles veces, paréz que se enraxonaba con tormentes estantines,
(salva sia la comparanza). Y endemás dixo que diba poner xardines de plántias, y banquinos pa sentase si dangunu se cansaba, y colúnes lluminoses y.... ¡total, todu faláncia perque aquillo dende entóncies quedo fecho una corrada!
|
 |
| La Fontica
Con una Placina toros acomparevos anántia La Fontica, y hora digo de veres yera "Plaza" na que se podín ver toros sin pagar ná po l´intrada.... Con sos piques, banderilles y güenos llancies de capa.Y a la preba me remito, non curiédes que ye chancia. Po les noches del veranu, que ya non hébia xelada, per illí iben de tretulia munches xentes de criyanza,que, pa reflescá ´l gargüelu y falar co la voz clara sorbitábanse dacuando vasiquinos d´aquilla ágoa
cargá d´ esponxáos del cazu, qu´allí mesmo dispachaba Felisa, la exponxadera del barriu de Foncalada. Y apienzaba la corrida d´esti modu, verbo en gracia: ¡Adiós, Sunta! ¿Qu´ hay, Gertrudes? Pos, que yo sépia n´ hay ñada... por no haber ....nin esponxáos.... ¿Non ves isa folganzada de Felisa? ¡Trái tan pocos que n´un Xuaxús los acaba, candu fayen falta a cientos con tantu qu´equí se gasta....Será que non tien azucre.... Pos, l´ azucre non afalta.... Non sé yo, perque ya sabes que quian los fai ye l´hermana Conceución, que tien diabetis, y..... ¡ta muy amejorada!
|
 |
| La Fontica
¡Debes dir muy estraída que non ves a naide , Xuaca! Ya te dixe "adiós" tres veces y golviésteme la cara...... Non facís ansina antañu candu yo te galantiaba !.... - Pos, non te amusgues, Perico, que non foi arrede, mialma! Quedánonme mal los güeyos de llorá ´ la tó mudancia y, denque aquilla la vista menorgóseme qu´aplasma.... non vexo un burro a dos pasos, asín que.... ¡non te estremaba!.......
- ¿Cómo sigue la to ñuera, va alicando, Regustiana?
- Sí, muyer, paréz que d´ista - Ye sabido.... ¡Cosa mala! ¿Vióla ´l mélicu? - Sí neña, tovia ayeri que i dió l´alta.
|
 |
| La Fontica
¿Don Celipe? - Non, don Foro, que diz que ya la tretaba dende fai más de venti años..... ¿Cuántos... Pos, tas amañada, non vas ver al fiyu viudu por munchu que vivas, chacha; perque tien, el diañu d´ illa, más salu qu´un perru´caza.... ¡Mira qu´aguantar venti años al mélicu y... tar tan guapa!..... ¡Ah Ramón! ¿Tú qué toviéste con Sidora "La Carrancia"
que te pon de ensinvergoña, de porcón y de fanfárria per dayuri que se tercia? ¡Ay non sé!..... Ye cosa rala...... Pos, non tévi ná con illa.... pa ponesi tan´moxada....... Como non sia perque i dixe na verbena ´la Esperanza "que hasta pa gocha ye feya! non sé perque me desfama!........
|
 |
| La Fontica
Y agora, siñor Alcalde, premítame una pallabra: Vusté, que ye elencargáu de curiar de "La Quintana" qu´andia siempre esmolecidu por tenéla bien tresnada, y acorica cuanto aquilla de los vieyos tiempos guarda.... ¿Por qué non fai que se poña La Fontica como taba? Cuartos, non i costa munchos pos, non ta mas qu´entiarrada sin quitái cosa denguna de mó que.... ye esatapála. Sáquela, siñor, pa que juera, mire que yera muy guapa.... Y, si ´l ágoa tien manesia pos, entá miyor ¡caráila! qu´asin la fiel cuerre llibre y el fégadu non s´atasca.... Per iso yeren tan xuscos los que enantes la tomaban!......Hoy, pa to se reciéta la "sal d´higuera" a´mbozáes, (que ye la sal de manesia que tenín aquillos ágoas.....)
Mélicos y boticarios fayen con illa la Bana...... y claru...son los que dicen que "La Fontica" ye mala,
porque si vusté l´abriera...diba facéyos la Pascua....
¡Ente el "Siguro" y la fonte.....lametá d´ illos palmaban!!!!
Melicina Casera. A. García Oliveros.
|
 |
| Del mal..... el menos.........
- Tardi vas pa ´l eru, Fonso, ¿Qué millagru ye pa tigu, tan esquil y tan amigu de xuncíte a trabayar?
¿Apiegóseti la fueya po la mor de la xelada, o toviéste ´na llacuada d´ista nochi ´nel "Llagar"?
Pos, diréte, Regustiano, que tresmanes el carreru:
Rispetive a lo primeru..., non to´ná de dormiyón, iso sábeslo de sobra; lo que, si, non saberíes ye que llevo cuatru díes que non poso ´nel sergón.
|
 |
| Del mal...... el menos..........
y tocántenes a ´l ´utru que decís......-Non ye perciso
que t´ escúlpies de ná d´ iso, bien sé yo que yes formal.... Y hora ´n seriu: ¿Qué te pasa? - ¡Cuasi ná..... que tá mió casa que paréz el Espital!..... -¡_Cordia, no me digas! -¡Home, debe ser cosa del diantre perque..... -¡Bien, tira palantre y arrevienta
d´una vez!... - Pos verás: Tengo la suegra.... -Ya lo sé... ¡menudu choyu!.... igüena bruxa ye!.... -¡Recoyu, calla tu, si te parez!
|
 |
| Del mal ...... el menos.........
-¡Déxame falar y ascucha! - Piesllo ´l picu.... - Pos, la tía, como enantes te dicía, ta col rema n´un cadril, que n´hay modu d´aguantala por que ye lo más bederre.... peru n´hay cuidáu, non muerre, ye más dura qu´un petril! Claru qu´isto non m´abluca. Lo que agora más me amuela ye que tó con decipela del focicu a la muyer; y que dos de les rapaces tan qu´españen col agullu, tusicando dende Xullu que non son pa samecer.
|
 |
| Del mal........ al menos..........
Pon, tamién qu´el pequeñacu ta enteláu de la barriga, y amucáa de lá vexiga la cuñá que tengo ´n cas; que tampocu, dende ´l gripe quedé yo mu llasparderu....... y hora dime, compañeru, si se pódie pidir mas......... -Mira, Fonso, non te digo que todiso non sia malu, gora.... non ye pa roñalu.... ye pa dar gracies a Dios.....
|
 |
| Del mal...... al menos........
-¡Home, yo non me repucho s´il me manda les desgracies! Peru.... ¿ye pa day les gracies el que temos malos tóos? - Non, per iso non ye cuentu; peru bien tá el qu´agradezas que te llibre de gafezas tá piyores n´utru lláu.... Ponte tu en lo que siría, s´isa peste que apregones que te intró po les presones.... t´añiciáse ´nel ganáu!!.
Melecina Casera. A. García Oliveros.
|
 |
| El remediu pa la tís........
-¿Vas dir a la fonte, Mada? - Sí, cuntaba. -Yo tamién. Dexa pañá ´la ferrada que tengo desacupada y abaxo ´nun santiamén. ¡Hale!, por min candu quieres. -¡Recontra! baxéste aína, tienes les pates llixeres!- Ye qu´hay poques escaleres....... peru... ¿qué te pasa, nina? ¿Per qué tas lloramingándo?
¿Toviéste anguna quistióncon isa bruxa de Pando
|
 |
| El remediu pa la tís.......
po la que amória el to Nando y asolmenóte, el fartón? ¿O ye per cúlpia la ñuera; que vos oyí espatuxar endenantes na panera? ¡Ye una bona sacabera... non te dexó gorgutar!.... Yo que tu, llárgola fora, non se monflaba de mín! - Si non hébo ñada, Dora, si el poñente ansina agora ye que tó malo ´l neñín..... -¡Arreniego! ¡Non me digues!
¿Pos que tien el to rapaz ? A lo miyor son vexigues
|
 |
| El remediu pa la tís.........
o daqué de les llombrigues, porqu´ il ... non tien mala tráz. -Non, peru ´l casu ye feu, perque mos dixo don Lluis, esi mélicu de Ovieu, qu´el neñu dai munchu mieu, que ta apuntáu pa la tís...... -¡Ay, neña, pos non t´abluques, qu´entá se pódie amañar! ¿Pa qué non vas a don Lluques, qu´ estrema d´istes cosuques, a ver si lo quier iguar?
|
 |
| El remediu pa la tís.........
El, ye muy consideráu..... -Peru ¿qué mos va facer?
-¡Cordia..... pos si ta apuntáu... que fale col deputáu
pa que lu borren, muyer!!.....
Melecina Casera. A García Oliveros.
|
 |
| Necrológica
-Vaiga, Pachu, non seyas tan fosqueru, que lo que te convién ye destrayéte. Sal d´esi coruxeru, vamos a char un "mus" en cá ´l Ferreru, tomamos un chisquete pa esmorgar lo que seya en sin trabayu y, verás cómo espardes esi ablayu que va golvéte llocu.... A más, n´hay que poñesi ansí tampocu, qu´al fin, tu chaste el cuayu cuandu la to muyer taba doliosa.... ¿Ye verdá que morrió.... peru d´aquella
|
 |
| Necrológica
y al xenru de "Manín de la Pelosa" , que estrema de gafures..... Ansí que, si la céncia, non i fó p´ atayá ´les callentures, pos, chachu, non t´apures, que pues tener trenquila la concéncia! ¡Fasta mélicu tevo pa morrese! ¿Non fó ´l de Les Segaes, p´ axudái a que diera les boquiáes ? ¿Qué más púdio facese? -Non, Chinto, si non ye esa la que berra"; lo que ye que per cúlpia d´esti enrieu, llevánonme los cuartos que da mieu, quedé sin una perra
|
 |
| Necrológica
y ansina.... non se pué dir de xareu... -¡Coya! ¿Cómo lo dices siquiámente? Dentós, ¿non semos xente mosotros pa brindate c´un sorbiatu? ¡Yera pa non miramos más en tente! Pos, home, ¿tu yes fatu?
¡Llistu!.... ya tas mangando la chaqueta y vamos a chumar dos botellines pa´spiertar un poquín la llapareta. Per ´oyes: ¿Tantu chaste en melecines, pa escorexá ´la orcheta?
|
 |
| Necrológica
-¡Déxame en paz, Remiciu, non me fales, que me esgració de veres la defunta...... Y depués , el entierru y fonerales, que me costanon más de tres mil rales, con que.... vota la cunta! - Non barruntaba yo que jués tan caro baxar pa la furaca. Peru, ¡coyes! agora que arreparo n´esu que tas cuntando, vese claro que te quedás escosa la buchaca!.... ¡Home , nada, quedé fechu un rodiellu: Sin perres, sin cebera, vendides les dos vaques y el noviellu... de móo que,.... pal aquellu.... valime cuasi más que non morriera!!
Melecina Casera. A. García Oliveros.
|
 |
| Les coses a so tiempu....
Ramonín de los Cabiellos, el sobrín de La Sapiada,
que tévo de barrenista munchu tiempu ´n "La Mariana" y dexolu pe la morde qu´al polmón no i asentaba; casóse, ya fai abondo, c´una moza de la Braña, n´ onde vive dende entóncies dedicáu a la llabranza. Tien allí la casería la madre de la rapaza,
que lo yera al mesmu tiempu d´utra que con illa taba;
y, col frutu de les tierres, más el d´un rabil de escanda,
|
 |
| Les coses a so tiempu.......
que tamién dexa lo suyu, po lo munchu que trabaya,
van metiendo pel botiellu y apinando la buchaca
Ramonín y la costiella, mas la suegra y la cuñada.
Yera ´l mozu muy leitible, parcial y de güena pástia, trabayador y enemigu d´armar griésques nin baraya; po lo cualo se desplica qu´anque juera cosa rala, morasen todos xuntinos muy en amor y compaña, sin andiar a madreñazos mas d´una vez por selmana nin metése en descusiones más que.... en cuanto se falaban; perque, Ramón ye muy güenu,
|
 |
| Les coses a so tiempu..........
como vos dixen anantia, peru la suegra..... ye suegra y la cuñada.... cuñada... Güenu, pos illo fo ´l casu, que paréz qu´ una mañana llevantáronse tós illos con resuellu pa entamala y.... conózse que ´l descursu
debió de ser de sostáncia, perque d´ il salió la vieya c´un patatús pala cama; y colaren ya doce hores sin que moviés una pata nin entrabiera los güeyos, nin penunciase pallabra. Y ansina taben les coses allá po la madrugada;
|
 |
| Les coses a so tiempu.........
les fiyes dando berridos y rezándoi ya por alma,
candu al ve ´la mala pinta que ´ l asuntu persentaba
descurrió ´l xenru, dentoncies, baxar pol mélicu a Ablaña. Como hay de la casa al pueblu gora y media un pocu llarga, yeren cerque de les cuatru candu Ramonín llamaba na casa don Gosé ´l mélicu, qu´hébia pocu que s´echara, per cúlpia de Pepa ´l Coxu, que lu tevo de candanga
|
 |
| Les coses a so tiempu.........
fasta les tres bien corrides pa desacupá la panza.
Tará de más que vos diga que no i fexo plizca ´ gracia la vesita del collazu y entá menos l´antoxancia de dir a ver a la suegra, tiniendo qu´andiar a pata muy cerquina de dos llegües esguilando la montaña. Peru, per más que ´l galenu pescudó y espatuxaba pa ver si c´una reciéta yera a dispachá la gaita, non i valió ´l ardiluxu pos Ramonín entercaba que tinía que dir a vela, que debía de tar muy mala, perque non se rebullía, nin comía, nin falaba
|
 |
| Les coses a so tiempu.........
y.... bien yera que morriese peru... non sin vesitala!
Tarreció ´l mélicu mesmu que hobiés algu d´emportanza y que jués a ser aquillu, pongo ´l casu, una almorragia, o parális al celebru o algu asín de la tenada; y sin más desplicaciones llevantósi de la cama y salió tres del fulanu pa ver qué diañu pasaba.
Pasoles ñegres, el home, p´algamar, al fin, la casa perque ´l camín yera malu, la nuiche, taba ñublada y n´hebia árbore nin múria co los que no enfocicara.
|
 |
| Les coses a so tiempu..........
Peru llegó de tós modos, unque fechu una filtraya
y atopósi co la tía.... tal como ´l xenru pintaba: Sin dicer oste nin moste, nin mover una pistaña, nin facer casu dengunu de tó lo que la rodiaba. Miróla d´enriba a baxu; golpióla en brazos y patas con un martillín de goma, rescói el pié po la plántia pescudando si la deda subía ´l rescar o baxaba; púnxoi un relós en brazu c´una collera amarrada,
chói la lluz d´una candela nos güeyos, mirói la cara.... y de tóu esti desámen non topó cosa alteriada. Allumó entóncies un pitu,
|
 |
| Les coses a so tiempu.........
dió dos güeltes po la sala descurriendo escontra sigu sobe ´l mal de la paisana; y un pocoñín amusgadu po lo que ya barruntaba, fo utra vez pa xunta d´ella, garróla po la papada dándoi güenos ximelgones d´una banda a l´ utra banda y, díxoi sin más aquillu: - A ver... ¿usted por qué no habla? Abrió los güeyos la enferma, sentose lluegu na cama mirando al mélicu ´n tentes y, repostiói del tóu gafa: - ¡ Siñor, perque
fasta gora.... dengunu me entrugó nada!!....
Melecina Casera. A García Oliveros.
|
Comentarios
Publicar un comentario