Iglesia de San Vicente de Nimbra (Quirós)
Textos:
-Non hay bien que siempre dure.
  |
| San Vicente de Nimbra. San Vicente. Casería de la parroquia de Nimbra (Quirós), situada en la margen izquierda del río Ricao, dista 6.3 kilómetros de la capital municipal Bárzana. Su población es de 7 habitantes. |
 |
|
Non hay bien que siempre dure.
Dirá facer del soceso,
que se rellata p´anicio
de más de mil semeyantes,
mui cerca de medio siglo
pe les castañes serondes,
al madurar los oricios,
cuando allegó a la parroquia
mayor de Villasimplicio
de padre de almes el cura
párroco, don Agapito.
Non era, por referencies
de feligreses antiguos,
pozo de cencia el siñor,
nin home de pergaminos;
pero con todo y con eso
tomó tan bien el oficio,
que yera lo que se diz
el ídolo de los vecinos.
La manga de confesar
con todo ´l ancho preciso
pa que colasen por ella
les sacaveres y grillos
usábala todo l´año,
lo que se diz de continuo,
sin apertar la jareta,
nin apurar el destingo,
a todos y a cada uno,
en sin tocar en lo vivo,
nin espetar el sermón
de pública, tan preciso
pal fin de qu´el penitente
detenga sus apetitos,
y que desand´el camín
de los profundos abismos.
Aconseyaba pacencia
na misa de los domingos
al pueblo trabayador,
que tá non era el diablico,
diciéndoi que yera el cielo
el premio de los probinos,
tenín que atopar de juro,
al dar el postrer sospiro.
Les cuentes de los derechos,
por bodes y por bautizos,
cobrables a los probes
sin apuralos. Amigos,
decía, cuando pudáis,
que non ye palo de pícaro;
y asín quedaben contentos
y satisfechos, y vínlo
y cuasi que lo estrumiaben
al bon de don Agapito.
Non yos pasaba la cuenta
de funerales y oficios
de animés, mises, ecetra
si se trataba de ricos,
hasta que diben pedirla
cuidando que fos olvido.
Y entoncies arrespondía:
Ya pagarán, un domingo….
un lunes….. cuando yos pete…..
en enrestrando el maizo….
cuando se pise la sidra
si tan en sin compromiso;
y asina diba viviendo
siendo de todos querido,
porque a cadún i dexaba
el que andiviés a capricho,
viviendo a sus anches todos,
en sin andar con remilgos
el siñor cura con naide
nin con denguno y consigo.
Cantaba nes esfoyaces
co les rapaces a gritos;
cazaba co los marqueses,
y mayorazgos, y primos
de los señores del pueblo
a los ñarvatos y mirlos;
rezaba co les cofrades
de San Antonio bendito,
y asín, a gusto de todos,
llevaba don Agapito
la vida más sosegaa
que si tuviés en el limbo.
Pintaba con el Alcalde,
cenaba con el Menistro
de la Xusticia, fumaba
cigarros de los legítimos
de Güelt´Abaxo de Cuba,
que-i los unviaben los primos,
los xenros y los cuñaos,
los tíos y los sobrinos
de todos los habaneros
nacíos en el distrito
de la parroquia del cura
mayor de Villasimplicio.
Los güevos y les gallines,
los tucos y los chorizos,
entraven a tonelades
en ca de don Agapito,
como regalos de Antroxo
de los cristianos vecinos.
Así de modo y manera
que taba nel Paraíso
el cura de la parroquia
mayor de Villasimplicio.
Mas como todo na vida
se acaba, como los figos,
llegoi al cura la hora,
que todo llega en los siglos,
de que se-i vos guardabaxo
la mina del paraxismo.
Un día del Obispal
dixeron-i por escrito
de que tuviés preparándose,
que diba dir el Obispo
a confirmar a los neños
de la melicia de Cristo.
El cura llamó al Alcalde,
y al Xuez y a los homes ricos,
y Su Ilustrísima el día
de su llegad´al destrito,
foi recibíu con la música,
con arcos y farolinos,
y tuvo una xinta en forma
con todos los requesitos.
Les antes autoridades
y los fidalgos vecinos
xintaron con Su Ilustrísima
y el cura don Agapito,
y todos aponderaben,
por enterar al Obispo,
les cualidades del cura
en tono tan efusivo,
que oyéndoles el Prelau,
asina diz que yos dixo:
Un cura que quieren todos
y que non tien enemigos,
ye porque dexa que fagan
los feligreses el pino.
Non me convien esti cura
que siga en Villasimplicio
un día más. En la Braña
tien arreglau el destino……
Pos Cristo Nuestro Siñor,
con ser el Bien Enfinito,
foi muerto y crucificau
como si fos un bandido.
Orbayos de la Quintana. José Benigno García (Marcos del Torniello).-
|
Comentarios
Publicar un comentario